狗狗四腳朝天瞓＝性格成熟獨立 破解汪星人各個睡姿

撰文：PC | 圖片來源：新假期資料室、網上圖片

破解狗狗各個睡姿代表的性格：

四腳朝天式

狗狗瞓覺嘅時候四肢都一同向上，睇落好似怪怪地咁，但咁樣係代表狗狗對四圍嘅環境都好安心，除此之外都反映到狗狗性格都比較獨立。

側睡

呢種姿勢通常都係淺層睡眠嘅狀態，狗狗都好隨意咁唞下。而呢種睡姿反映出狗狗覺得周圍環境都好安全，但係有異樣嘅時候都可以隨時應對到，通常呢種狗狗性格都比較樂觀同平靜，比較無憂無慮，仲對主人好忠誠。

超人式

如果狗狗瞓到好似超人咁，成隻趴喺度，手仔伸出嚟。代表佢哋都係比較好動鍾意玩，因為只要瞓醒就可以即刻彈起身去玩喇！而呢種睡姿都係大部分狗狗都鍾意嘅一種嚟㗎～

手放胸前、背部貼地瞓

同超人式相反嘅姿勢，狗狗會背脊貼住地下，手仔放喺胸前。咁係代表狗狗想keep住保持涼爽，但同時都唔想俾人打擾。但同時都表示佢哋玩到好攰，要chill一下呀！

捲睡

假如狗狗瞓覺時都會全身捲埋一齊，縮埋一舊。咁就姐係代表住狗狗內心缺乏安全感，對周邊環境都好警戒，連瞓覺都要捲縮去提防有外界襲擊自己。雖然佢哋瞓成咁，但都代表狗狗性格都比較溫馴同友善，不過同時都缺乏愛，好想主人保護一下～

背對背

如果你有養多一隻狗，又發現佢哋都好鍾意一齊瞓。姐係代表佢哋都互相信任對方，同時亦知道對方係同伴，一齊瞓嘅時候可以更加有安全感，係互相保持溫暖嘅最佳方式！

你屋企隻狗狗平時瞓覺又係咩睡姿呢？多啲留意下睇下佢哋嘅內心世界啦！