父親節禮物2020！齊做孝順仔女 7大香港買禮物推薦提案 買衫夠穩陣 送呢樣最實際！｜好生活百科

編輯：GW｜撰文：Si｜圖：新傳媒資料室

父親節禮物2020
健康型父親：保健養生產品

現時養生食品種類繁多，功能各異，豐儉由人，建議仔女們注意吓最近爸爸有冇幾聲咳，有冇周身骨痛，因應爸爸嘅需要選購適合的保健產品。另外，好多爸爸都嫌身體檢查太貴而作罷，關心爸爸身體健康的你，甚至可以為他預備一個全面的身體檢查，既貼心又實用。

舒適型父親：按摩椅

對經濟比較充裕嘅仔女們，按摩椅係送禮熱門選擇，不過香港地方淺窄，未必擺到咁大部按摩椅，咁就可以考慮體積較小嘅按摩椅墊、眼部按摩器、頸枕等。手勢好嘅話，親自為爸爸來一節肩頸按摩，爸爸實冧！

穩陣型父親：配件服飾

配件服飾例如恤衫、領帶、皮帶係最穩陣嘅選擇，款式夠多，而且好多舖頭都會有父親節優惠，適合工作繁忙，冇乜時間買禮物嘅仔女們。

實際型父親：現金

「送現金會唔會太求其呢？」可能有人會咁諗，但其實好多父母都不諱言「折現」最實際，如果覺得誠意不足，可以加一份小禮物、心意卡，一定令爸爸笑逐顏開。

心意型父親：DIY禮物

沒有比手作更能表達誠意的禮物，如果你自問有一雙巧手，DIY皮革品、心意卡、蛋糕一定難唔倒你，但就算手藝唔靈巧都唔緊要，有時笨拙嘅作品反而讓人更能體會到你背後所花的努力和嘗試，即管試吓啦！

相聚型父親：食飯／親自下廚

相比起收禮物，好多爸爸其實更渴望一家人齊齊整整、開開心心咁食飯呢！仔女們留意吓爸爸鍾意食啲乜，趁父親節請佢食豐富大餐，若嫌年年都係請食飯冇新意，親自下廚更是誠意滿分，記得要洗埋碗呀。

好動型父親：小旅行

同相聚型父親一樣，好動型父親鍾意同仔女花時間多過收禮物，小旅行並唔係情侶同閨密嘅專利，仔女們可以視乎爸爸嘅身體狀況同興趣，計劃一場父親節小旅行，兩日一夜嘅澳門遊、國內遊，或是留港消費，尋訪香港好去處，一齊製造珍貴的家庭回憶。

無論係咩禮物，心意係最重要，讓爸爸能夠感受到子女們滿滿的愛，小編祝天下爸爸父親節快樂！