返工兩年半無加過人工 打工仔呻好失落 網民斥不知足：唔減人工、唔炒人都偷笑
撰文：Katie｜圖片：Unsplash、政府新聞網、中新社
打工仔呻：返工2年半無加過人工 最慘上司以為我好高人工
早前，有位打工仔於香港討論區，以「公司又唔加人工，好失落」為題發文，大呻返工2年半，但從未加過人工，感到十分失落。雖然居住於公屋，但又要交家用、租金、保險，幾乎無錢剩，形容自己「好似生存緊」。
「成33歲人，人工得$17,000，做咗兩年半，未加過人工，點搞？（人工）中位數係（一）萬九，最慘上司以為我好高人工。唔使畀家用咩，唔使交保險咩？」
網民：要為自己發聲啊
打工仔帖文一出，不少人建議他應該爭取在年度評核前，向公司反映人工的問題，為自己發聲之餘，更要主動爭取加人工。
- 「有無老婆仔女要養呀？有就同公司講，公司自然會安排。」
- 「要為自己發聲啊，老細唔知呢下都好弊！」
年度評核前係爭取加人工嘅最佳時機？
有網民認為，年度評核前，是爭取加人工的最好時機，因為年度預算尚未確定。
「睇下做咩工？如果係做普通文員嘅話，就差唔多到頂薪。如果係做跑數嘅工，又有戰績嘅話，就係評核前幾個月同公司講要加人工。唔好到評核個日先講，因為年度既budget一早做好！可以有技巧地同上司傾下加人工嘅問題。」
「喺年度評核前，同直屬上司傾吓，當然唔係直接話加人工啦，同佢講話嚟咗兩年幾，又做咗乜嘢大嘢，人工方面會唔會有調整？P.S.到年度評核講就太遲，因為budget已經定咗落嚟。」
網民：公務員都無人工加，你點解有加人工嘅想法！
雖然有部分網民認為打工仔應主動爭取加人工，但不少人卻認為他應該知足，尤其在現在這個時勢，公司沒有開源節流減薪，已經要「偷笑」。
- 「呢個時勢，公司唔減你人工都偷笑。」
- 「呢個情況下，唔減人工已經算係唔錯嘅公司了！」
- 「唔放無薪假、減人工，已經偷笑。大行好多過年前後交人，樓主可能太後生，未經歷過返工隨時執包伏，返工怕嘟唔到卡（俾人炒）種快感。今日咁嘅環境，唔好想太多，做好份工吧。」
亦有網民直言，今年連公務員也要凍薪，沒有人工加亦屬正常；更有網民認為，現在不少打工仔失業，在這個大環境下，有份工已經好好。
- 「公務員跟機制要加都無得加，私人公司唔減算好。」
- 「公務員都無人工加，你點解有加人工嘅想法！唔炒都笑！」
- 「𠵱兩年環境，大把人陪你凍薪，遲正面啲，總好過連工都無得返嘅！」
- 「大把人失業，有份工都好好了。」
- 「加人工係為咗追上通脹，𠵱家咩環境啊！」
轉行好過等加人工？
不過，有網民認為樓主的月薪已經算高，又認為既然不滿意現況，應要主動找機會「開源」，或是考慮轉行。
- 「$17,000 一個月，真心係高人工，以一般非管理層、非決策員工、非銷售人員（嚟講）。」
- 「考慮下轉行…」
- 「一係搵其他開源方法，一係靠增值自己轉工/升職，𠵱家呢個經濟環境喺私人企業仲有得開工真係已經算好，唔減唔炒都執到。」
香港打工仔最新月薪中位數僅19,000元
事實上，新冠肺炎疫情已經1年，據政府統計處去年最新發表2020年第三季（7月至9月）的《綜合住戶統計調查按季統計報告》，香港打工仔每月的就業收入（不包括外籍家庭傭工）為19,000元，與第二季度公布的結果相若。至於最新得整體失業率則攀升至6.6%，創16年新高。
