出海釣墨魚！夜釣墨魚團4小時體驗記者試玩！船程15分鐘＋即釣即食

出海釣墨魚！夜釣墨魚團4小時體驗記者試玩！船程15分鐘＋即釣即煮

每年5至7月都係釣墨魚旺季，當然要把握最佳黃金時機！今次參加呢個釣墨魚散客團由市區出發，25人成行，可以選擇油塘三家村或西灣河嘉亨灣碼頭上船，船程只需15分鐘，非常快捷！今次記者就嚟到三家村碼頭，準備出發體驗人生首次釣墨魚，由於墨魚是夜行活動，所以最早都要夜晚7至8點起行，大約4個鐘返航。

釣墨魚工具相當簡單，唔需要平時釣魚嘅魚餌，只需手執一個船家提供嘅八爪鉤就可以Ready Go！鉤上方夜光位置可以用作吸光，墨魚就會誤以為係食物，追住個光源，最後就可以用八爪鉤去鉤佢上嚟！新手初次體驗都唔使擔心綁鉤及解鉤等問題，專家會提供協助，通通都會幫你處理好，兩手揈揈就可以上船玩！

新手擢墨魚必學技巧

技巧方面，船家教路，只要將八爪鉤照一照燈光，待八爪鉤吸收光線變得螢光後放下海約3-5米深，然後不時輕輕拉一拉，等墨魚誤以為係食物，就會追上並「攬實」魚鉤，呢個就係「擢墨魚」嘅動作。記者體驗完之後，覺得整個過程都係一個耐力戰，隻手要無間斷咁擢，直頭好似做手部運動咁。

最後連埋船上其他參加者，釣到嘅墨魚都有起碼過百條，單望都相當壯觀！記者自己就只係釣到寥寥幾條，不過用嚟過下手癮都幾開心！

4小時任釣 墨魚即釣即食

煮食方面，船家先將墨魚作清洗，然後再燒紅煎鑊，加入墨魚先輕輕煮一次，將水份逼出再倒出。然後第二次燒紅煎鑊，再加入油，倒入墨魚炒香，熟度差不多就加入些蝦醬提香。

記者單坐係船上已感受到香氣四溢嘅味道，超級吸引！即釣即煮嘅墨魚口感滑嫩爽口，味道鮮甜，海鮮果然係愈新鮮食愈Happy！如果想屋企人分享美食，都可以選擇拎走自行烹調，又或者帶埋佢哋一齊出海！

喺船上嘅4個鐘都可以無限任釣，釣到攰亦可以係船上唔同角落打卡影相。如果成班朋友包船的話，仲可以使用船上娛樂設備，包括卡啦OK機等。

BB Boat Channel

• Facebook：BB BOAT Channel
• IG：bb_boatchannel_852
• 聯絡電話：6652 2308
• 墨魚團日期：即日起至另外通知
• 墨魚團出發時間（6-8月）：
  星期一至四 730pm（西灣河嘉亨灣）、745pm（油塘三家村）
  星期五至日7pm（西灣河嘉亨灣）、715pm（油塘三家村）
• 價錢：墨魚散客團$260（25人起成團），散客只包即場烹調，不連晚餐到會；另提供包船服務，詳情可向船家查詢。
• 上船地點：油塘三家村或西灣河嘉亨灣碼頭