盤點6大共享空間推介 最平每小時$7起！免費茶飲零食／獨立充電位／落地大玻璃／24小時工作室／手工咖啡
盤點6大共享空間推介
Work from hone日日要對住屋企四幅牆做嘢都咪話唔辛苦，其實香港都有唔少共享空間比初創人士及打工仔專注工作，環境舒適寧靜之餘亦相當有特色，更可以任用Wifi及無限充電，到訪前毋須預約，收費亦相當彈性，其中更有共享空間提供24小時工作室，無論WFH人士定Freelancer都可以隨時都可以搵到合適嘅空間！
1.「Desk-one 溫室」 分店最多最方便
「Desk-one 溫室」分店遍佈全港，包括銅鑼灣、旺角、荃灣、沙田、灣仔及北角，住港九新界各區都可以搵到最就腳嘅分店！店內設計感十足，主打溫室風格裝潢，環境舒適寧靜，亦免費提供咖啡、花茶及零食，更有微波爐、租借投影機、打印及掃描等服務，平日收費每半小時$22，全日$128。
2.「Wooder Space 木．讀」日系榻榻米座位
「Wooder Space 木．讀」同樣位於人來人往嘅觀塘區，環境以日本禪風為主題，座位有別於一般自修空間，除咗特色梯級座及相當舒適嘅豆袋梳化，場內更設2至6人用嘅榻榻米房間，設計感十足，打卡一流，更有種置身於日本和室嘅感覺！做嘢做到攰仲可以喺雜誌及書籍區借閱書本，即使唔係WFH，嚟呢到放鬆心情都係唔錯嘅選擇～
3.「Somewhere 森程」森林風特色打卡位
「Somewhere 森程」有九龍及銅鑼灣2間分店，以大自然及森林作為設計概念，希望透過放鬆人類五感去提升學習及工作效率，設有唔同主題嘅區域，其中橙色洞穴空間外型最有特色，工作之餘仲可以打埋卡！場內設吊椅、4人及6人桌等座位，無論工作定開會都適用。店內亦有免費自助補給站提供咖啡、茶飲及小食，平日收費每小時$38，全日$138。
4.「Pen House 文房」 夜貓24小時工作室
「文房 Pen House」位於新蒲崗工廈區，糅合書店及共享空間，裝潢以木系色調為主，充滿文青氣息，更有24小時工作室，即使凌晨都可以到訪，非常適合半夜工作嘅彈性上班族！場內有平板電腦及電腦螢幕擴充器借用等服務，亦有自助茶水間，平日收費每小時$33，全日$98，性價比相當高！
5.MeTime 超吸晴180度落地大玻璃
位於觀塘嘅「MeTime」位於大廈高層位置，擁有相當吸晴嘅180度落地大玻璃，早午晚都可以欣賞到窗外景致，唔少人長期WFH都會感到局促及困逼感，環境開揚嘅「MeTime」絕對係不二之選！平日收費每兩小時$30，而全日則$100，坐足全日13.5小時，除返開每個鐘$8都唔使！
6.「MyBase」內藏手工精品咖啡吧
「MyBase」專為初創人士、Freelancer及學生而設，分店遍佈旺角、銅鑼灣及荃灣，設計走木系簡約風，空間寬敞開揚，透過落地大玻璃窗更可以隨時欣賞窗外街景，心情自然格外舒暢！銅鑼灣店更內藏小型精品咖啡店，即使喺共享空間工作都可以享用到駐場咖啡師手沖嘅咖啡及甜點，真係夠晒嘆！
共享空間收費如何？
平日1小時單次收費約30元起，全日則由$98起。即按此睇詳情
香港有哪些共享空間適合工作？
港九新界各區也有不同的共享空間，即看：WFH必去6大共享空間推介
