深水埗燒味舖上日本節目!天價四併飯 網民:唔信砌咁靚囉|飲食熱話
深水埗燒味舖 衝出香港上日本節目
近來日本節目「屋台メシ部」介紹香港美食,來到深水埗介紹地道的特式美食-點心及燒味。從節目的預告片可見,被日本人力推的燒味店是燒味老字號鴻昌燒臘飯店,足足30多年歷史。節目片段中師傅手起刀落,俐落地斬料,節目推介的是叉燒、燒肉、雞髀、鵝髀四併飯,份量十足,賣相非常四正,燒味油光閃閃,令人流曬口水,女主持更夾起雞肉,遞向鏡頭,令人食旨大動。
![深水埗燒味 高登有網民發帖,上載了日本節目的截圖。](https://imgs.weekendhk.com/wp-content/uploads/2022/11/whatsapp-image-2022-11-18-at-11.30.43-am_1776420416637704a111046-755x1024.jpeg)
高登:打死唔信砌咁靚囉
事件亦引來香港連登討論區網友的關注,有網友出帖:「深水埗燒味舖上日本節目」上載多張節目相片,當中亦有四併飯的靚仔相,樓主發言:「打死都唔信會砌咁靚囉」、「假過好假的肥仔」、「笑死,擺碟靚到」、「全部都斬最靚既位同埋咁大份唔係上節目都無可能」甚至有人覺得靚到超現實:「兩舊都無咁靚啦, 深水埗呢間喎, 呢件事點睇都係超現實主義 – surrealism」。有人覺得為了節目效果,砌得靚仔點也無可口非:「上電視就梗係要砌靚啲啦」不過日本人來幫襯時可能會有落差:「之後班架仔遠洋過海黎香港,以為真係有咁大碟」。
就食味來說,網民似乎都覺得節目推介得好,有不少人力撐老字號,燒味有質素,外賣還有湯送,幫手介紹:「呢間深水埗老字號有兩間,呢間以前係轉角位,今年搬咗過隔離,舊舖掛哂琵琶鴨、金華火腿出來,有平價燒味飯賣,上個月食過新舗乳豬飯外賣,送湯,唔錯。」亦有人盛讚叉燒富熏木味:「鴻昌叉燒個人覺得幾好,熏木味幾重,第一次食叫外賣雙併,返到去打開,成個飯盒都係果隻熏木味」。
![深水埗燒味 網友覺得現實係咁樣,不過這個飯盒不是鴻昌出品。](https://imgs.weekendhk.com/wp-content/uploads/2022/11/whatsapp-image-2022-11-18-at-11.30.43-am-9_5600577516377049d2df65-1024x706.jpeg)
盛惠$180!究竟值唔值?
四併飯的價錢亦成為討論重點,網民留言揭露價錢:「依個要180港紙」盛惠$180,立即引來熱議,有人覺得太貴:「去旺角風味園都有咁大碟$50」、「200元夠買半隻雞、半斤叉燒,孖寶,買支酒慢慢歎,真係好少見人食燒味飯食到咁貴」而且覺得用近2百元買燒味不太值得:「香港好小人用成2舊水食個燒味頹飯」、「即係你會唔會比2舊水食個M記餐一樣」亦有人思疑日本人會否以4千日元買一個燒味飯:「呢碟二舊水都無咁多,架仔聽到4千YEN 仲食唔食?」。
![深水埗燒味 咁大碟真係可以$50就搞掂?](https://imgs.weekendhk.com/wp-content/uploads/2022/11/whatsapp-image-2022-11-18-at-11.30.43-am-6_20805062216377049a2a285-1024x567.jpeg)
不過亦有大班網民覺得值錢合理:「$180,雙脾加叉燒燒肉,差唔多啦」、「個價差唔多食開ssp燒鵝大王都係咁上下價錢」、「幾年前見個深水埗雙脾飯賣$80呢度加埋叉燒同燒肉,計埋通脹$180呢個價差唔多」甚至已經算平:「雙脾飯都200上下,講緊5、6年前」而且價錢視乎水準高低:「港島食樓主果碟兩舊水都唔得..燒味有分整得好同整得西,簡單d你樓下買盒廿蚊燒味飯。同去樓主講果間買一盒試下有冇分別咪知囉」
而且深信日本人願意科水食:「日本食中華料理好貴的係高級野來」更有人上載日本的中華料理Menu,以2千5日元走跳。不過有位朋友講出了重點,覺得價錢其次,食味才最重要:「人哋介紹覺得佢好食,唔係介紹佢平。」