醫護8號風球Call的士自願加巨額小費 的士司機見到竟嫌棄 網民:仲唔夠?
颱風蘇拉襲港 醫護返工Call的士畀Tips都被嫌棄
超強颱風蘇拉襲港,雖然大部分市民都停工停課,留到家中「Work from home」或享受颱風假,但仍然有不少行業需要照常上班緊守崗位。一位的士司機就在Facebook群組「的士乘客及司機行為分享區」上發文,指自己在Call車APP內看到一張由醫護人員的訂單,寫明9月1號掛8號風球而預早落單Call車。訂單上寫明自己是「預約」,要求在「9月1號上午6時30分」,更強調「請準時」、「醫護人員返工」。
![颱風蘇拉 醫護照常返工Call的士要求6點半準時到。示意圖,非當事人)](https://imgs.weekendhk.com/wp-content/uploads/2023/09/whatsapp-image-2023-09-01-at-11.41.59-2_212943220564f15dc49f120-1024x683.jpeg)
自願加驚人小費 車程僅3.2公里
因為是有限時間的預約及遇上颱風天,這位醫護人員為了能夠順利Call車返工,主動提出加小費,寫明「小費$100」,而Call車的起點為馬鞍山「大水坑停車場」,終點則是沙田「廣源邨廣楊樓」,全程其實僅得3.2公里,正常的車資大概為$48-53元。
![颱風蘇拉 自願加100蚊小費。](https://imgs.weekendhk.com/wp-content/uploads/2023/09/whatsapp-image-2023-09-01-at-11.41.59_169229280364f15dc759943-1024x540.jpeg)
的士司機反而唔想接 網民:加咗咁多仲想點?
這張訂單一出,旋即引來不少的士司機熱議,有司機表示路途極短加上晨早時段,理應「無乜車」、「10分鐘就賺成嚿水」、「好著數喎,貪到咁?」,更積極鼓勵發文者接單,揚言「唔好咁貪心啦」、「100蚊好多啦」、「醫護就接啦,人哋都係救命」、「又話無生意,有生意又唔接」。不過,亦有大批司機紛紛勸喻「唔好制」,只因在8號風球下行車無疑是「搵命搏」、「唔好為咗100蚊搞咁多嘢」。
![颱風蘇拉 司機反而唔太想接。示意圖,非當事人)](https://imgs.weekendhk.com/wp-content/uploads/2023/09/whatsapp-image-2023-09-01-at-11.41.59-1_159713830164f15dc3383ec-1024x682.jpeg)
另外亦有去機場的旅客指的士獅子開大口,由尖沙嘴去機場原本$300,但司機加價加到$600;而有大水坑出發機場的人亦指上車時司機沒有告知要加價,到機場落車後才知要加$50。
打風保險無得賠?保險機構咁樣講!
其實風球下搭的士經常都會聽到司機以「打風保險無得賠」為由「坐地起價」,但其實根據國際保險機構「美國國際集團(AIG)」,車主自願購買的汽車保險「綜合汽車保險(汽車全保),保障範圍擴張至「第三者責任保險(三保)」以外,涵蓋投保人、投保汽車及在惡劣天氣如8號風球、黑雨下所造成的人身傷亡及財物損失等,保險公司會在條款細則内列明相關賠償範圍,當汽車因天災損毀,例如被重物或大樹壓毀、被風吹翻、玻璃窗損毀、車輛因水浸而報銷等,保險公司會根據車主是否採取合理預防措施保障其車輛免受打風或天災破壞而賠償;如評估後保險公司得知車主在8號風球或者黑雨期間,在沒有必要下駕車前往高風險地區,會認爲車主沒有合理地盡力避免意外發生而拒絕理賠。