全城熱議「邊個會為$2萬而生仔」　港人稱4大惡夢難以想像：無眼睇

港人熱議：「為$2萬生BB有咩人願意」　反稱用2招即可催谷生育

最近不少網民於LIHKG討論區上熱議有關「為$2萬生BB有咩人願意」的話題，事關施政報告下周三即將出爐，坊間傳出政府將會新增一項鼓勵生育政策：「港人每生一個新嬰兒將獲派2萬元」。消息指，只要父母其中一方為香港永久居民，每生一個新嬰兒即可獲派一次性2萬元，吸引父母生育。網民得悉後，隨即討論「2萬蚊到底夠用D乜？」，有人計算過新嬰兒出生，首要的必需品為尿片及奶粉，$2萬元可買到大約72罐嬰兒奶粉，或者大約140包尿片，更指「會因為呢2萬蚊而生嘅人，一定唔係有錢同中產個班，仲慘」。

小紅書即湧現香港生仔攻略：龍寶寶還趕到！

港人誕一名初生嬰或獲派$2萬的消息傳開後，不但本地熱烈討論，就連小紅書上都備受關注，相關話題報道旋即洗版，更有人指「龍寶寶趕得到」、「2萬雖然不多，但也比甚麼都沒有的好」、「我家的娃第一個估計趕不上，但是可以考慮老二了」、「我家現在15天，不知道有沒有機會」、「2萬雖然不多，但是可以成為一個推動，算是錦上添花」、「你看看香港多缺人吧，我們來幫你沒問題」。

除了一眾人稱自己有興趣生BB外，小紅書亦有大量來港生B攻略，包括「赴港產子流程，孩子出生即永居」、「如何調較時間生B」等，令不少港人再度於討論區熱議，指「會唔會又新一輪衝關生b潮」、「又會有好多假結婚出現」、「香港人唔當2萬蚊係一回事，自然有班新移民等住嚟代你拎」、「都話所有嘢好快都現眼報，今朝講完，晏晝就嚟料」。

爸媽：請個陪月都3萬蚊喎

有已為人父母的網民指，要養大一個小朋友，最基本入場費是600萬元，2萬元連請陪月都不足以付款，「而家請個好少少陪月都要3萬，普通去醫院檢查都已經無咗」，認為2萬元作為吸引力的話未免有點「搞笑」。而有網民更指「以為話3歲前每個月都2萬，咁就會多D人考慮啦，一次性真係玩嘢，奶粉夠食幾耐」。此時網民再提起Steven的情況，指他已為香港出生率不停貢獻，但因「生BB」開支大，兩夫婦常為此而有爭拗，雯雯更經常出Post求「賺快錢」方法，可見「生BB無錢真係唔掂」。網民指「Steven生咗4個，都係可以拎到8萬，8萬蚊養成頭家，夠用幾耐？2個月？不如你請佢做代言，如果佢好輕鬆地只用8萬蚊養BB，我哋就信你啦」。亦有人嘲「雯雯急用錢唔使驚，你生多46個可以做到百萬富翁」。

港人：若果屬實，真係有4大惡夢即將降臨

港人續指若然屬實，有4大惡夢必然即將降臨：

1.只有一種人先會為$2萬而生BB

網民指「中產唔會為咗2萬蚊而生，因為唔生唔單止係錢嘅問題，仲有好多其他環境因素；有錢嗰班更加唔使講，到頭來就係得班淨係識靠政府拎資源嘅最低層人不停生仔，根本對成個社會向上流嘅作用都無」、「我已經可以想像到會為呢筆錢而生BB嘅人，就係靠福利生活嘅人，你諗到個惡性循環係點」。

2.棄嬰問題增加

網民又指有一大擔憂而衍生出來，指「你估生BB嘅人就一定成熟？你知唔知幾多人生完BB放去保良局就算？你擔保呢班因為2萬蚊而生B嘅人，唔會拎完錢就唔理BB？」、「身邊真係見唔少人生完B唔理佢，甚至連奶粉錢都可以拎去玩，知有2皮嘢玩，到時仲理得你？」、「拎完2萬蚊，然後放BB去孤兒院咁點算？咩責任都唔駛負」。

3.綜援家庭一定大增

網民指「香港人睇個勢都唔會突然狂生，新移民就會嘅，到時養唔掂咪拎綜援，有埋政府幫手養掂，都唔驚嘅」、「生完拎完錢，用晒唔夠養就靠政府同一班納稅人啦，生完無煩惱」、「到時加稅又唔關佢哋事，係關其他『唔生B』嘅人事咋嘛，跟著就會話『鬼叫你唔生BB搞到要出呢啲方法吸引人生咩』」。

4.生仔要考牌的問題越來越嚴重

亦有擔心現時即使香港生育率低，但社會上的「生仔要考牌」事件和怪獸家長都已經「夠惡頂」，「到時人人都話有2萬蚊派開心到生仔，唔敢想像嗰班家長係咩人」、「到時越嚟越多怪獸家長被放上網，仔女又唔教，放養咁，真係無眼睇」。

網民：其實用2招已經可以谷生育

反之，網民指若然真心想刺激生育，不如先解決房屋問題，指「生1個咪派3人單位，生2個就派4人單位，有樓住，無咗最大1煩惱，其實D人咪會考慮生仔」、「講真，個個都要為層樓煩，先係最大因素令人唔想生，唔想一齊捱苦，你搞掂樓嘅問題，大把人會考慮生」；亦有網民指「其實你整個無兒女稅，個個都驚啦，同時提高子女免稅額，兩樣嘢夾攻就多D人生仔啦」。