港媽巴士大鬧婆婆「坐咗我個位」 出言恐嚇令乘客極不忿：公主病就返屋企
港媽巴士大鬧婆婆「坐咗我個位」 婆婆好心問一句即被「單打」
最近在Facebook群組「真.屯門友」中，有網民轉發一則帖文及影片引來熱議，不但在群組內帶來高度關注，在討論區亦有人以「見到呢個女人嘅嘴臉，有邊個仲會想生仔」為題作討論。有目擊事情經過的巴士乘客描述事發當日經過，指當時正乘搭港鐵巴士K54線，他上車時「架車本身坐到爆晒」，而該名港媽本抱着BB女坐在車廂右邊的關愛座，而大女站在左方的空位看管BB車。
巴士駛到兆康站時，因有不少乘客上落車已騰出空位，大女見有位便坐到左邊的關愛座。當時港媽見大女身旁有空位，就打算轉位坐在一起。惟此時有位婆婆見有空位便坐下，誰知「個媽咪就開始發癲，喺到單打個婆婆」。而婆婆後來問對方一句「你哋想坐埋一齊呀？」，港媽立即「瘋狂X阿婆」，七情上面，語氣極差地稱：「頭先我咪大大聲同我個女講咗我一陣坐過去囉」。婆婆得知後即表示：「吓？我點知，我聽唔到」。誰知港媽仍不收聲，即時爆粗再鬧：「咁X大聲你都聽唔到？」，又恐嚇婆婆「出屯門小心啲」。
港媽全程「扭身扭勢」 乘客睇唔過眼：你公主病就返屋企啦
影片中可見，港媽一直爆粗兼扭身扭勢時，其實正抱着BB女在懷中，而身旁的女兒表情相當無奈，且明顯地扁著嘴。惟港媽一直忙於露出不屑的表情及翻白眼，並無察覺到。而當時巴士上有另一名中女乘客指港媽野蠻，港媽即回一句：「你屋企人就你，你都可以野蠻啲㗎」；女乘客終以一句「你公主病就返屋企，你唔好喺度嚟發爛渣」收尾，但勢不罷休的港媽旋即腦袋急轉彎，反擊：「呵，我點止公主病，我仲係皇后病呀，你呢？太后病呀？」
女乘客說，「嘩，發爛渣真係要死㗎真係呀，未見過咁惡死個人，真係」，港媽則繼續嘲諷「呵呵，見識下喇要」。女乘客遂續罵「咁就真係要見識下喇，野蠻到」，港媽再回罵「係呀，見識少呀嘛，井底之蛙呀嘛，明㗎」。最終被一名男乘客勸大家「一人少句啦，好冇呀？」，雙方爭論才停止。
網民：有啲咁嘅老母真係羞家
片主不禁留下一句：「有啲咁嘅老母真係羞家」，又講明自己用匿名出帖文的原因，指「匿名係我驚驚呀，佢咁惡，我又住屯門，要小心啲」。而網民亦紛紛批評港媽，指「睇見佢郁嚟郁去，個樣咁衰都覺得乞人憎」、「咩叫啱啱話咗會坐過去，你估成車人都留意你呀？」、「真係最壞身教，個大女好無助，個老母咁樣樣」、「2個女將來有樣學樣」、「唔駛咁惡囉，個位俾阿婆坐都得啦，個囡自己坐都無問題，個女人本身又有位坐，都唔明點解要嘈咁肉酸，同阿婆爭位」、「咩叫坐錯？巴士幾時劃咗位？皇后病應該坐車頂」。而另有聲稱目擊後續情況的網民指，「原來一早已經嘈，到屯門市中心落車再嘈過，一個喺車裏面，一個車外面」。
