港人家庭搭金巴回港 內地女不滿幼童車上喧嘩 怒斥「冇家教」惹罵戰

內地女投訴港人小孩太嘈

有網民從「小紅書」上轉載爭執影片到Facebook群組「香港突發事故報料區及討論區」，見到一家5口的港人家庭和2位內地女子在香珠澳大橋穿梭巴士站發生爭執。據悉，該2名內地女子和該對家庭乘搭同一架金巴經港珠澳大橋回港，乘車期間2名年約1歲的幼童在車上大叫數分鐘，而涉事的港爸港媽已經即時盡量控制及勸說；惟該2名內地女子仍然感到不滿，落車後截停該對家庭並指罵他們「冇家教」。

片中見到，該2名內地女子表示自己在車上已經曾多次勸喻幼童「唔好嘈」，但嘈吵聲持續而令她們無法好好休息，怒斥港人家庭沒有好好控制小孩；港爸就解釋「你控唔控制到呢兩個啊？控制下先」，又強調孩子們只有1歲所以難以控制，在車上已經極力控制他們；內地女又指「咁你可以同佢玩呀嘛」，港爸反問「玩？點玩呀？」、「你有錢呢，有錢其實你可以搭嗰啲兩地牌（包車）㗎嘛」，此時內地女反駁「你都可以呀，點解我要坐啫，你咪歧視我哋大陸人咩」。

港爸又問「搭車係咪一定唔可以嘈嘅先」，內地女就表示「肯定唔可以囉，公共場合呀嘛」，又不滿港爸曾在金巴上揶揄她們「你哋返大陸啦」，提出質疑「呢啲唔係歧視係咩呀？」港爸否認並反問「你唔係歧視我帶小朋友出街咩？係邊個歧視邊個先呢？我帶細路仔出街就有問題，小朋友係咪唔應該出街呀？即係佢哋唔可以講嘢嘅」，又稱「我同佢哋3個一齊去泰國一樣係咁，冇問題」。

雙方持續你一言我一語，港爸憤怒地大喝「我點會蝦你啊，你蝦我帶3個小朋友呀，你蝦我先咋喎，邊X個話我無家教呀？搞返清楚件事先」，此時連港媽都沉不住氣，大聲說「你去控制一個1歲嘅小朋友，你去控制下，可唔可以控制到」、「我而家揞住佢把口啦，你仲想我哋點呀！你講呀！」。眼見雙方僵持不下，另一名內地女介入勸交，港爸就提議先過關報警處理，普通話女稱「沒空」並稱致電去金巴投訴，影片就此完結。

事後港媽澄清事件經過

事後涉事港爸港媽在「小紅書」上發文澄清事件經過，她表示2名子女只是在車上大叫數分鐘，期間間一直極力控制「我已經嘗試揞住佢哋個嘴，不斷叫佢哋唔好大叫，不斷提醒佢哋唔好再叫，又氹佢哋，抱住佢哋」，另由於他們一家坐在車尾，該2名內地女子坐在車頭，卻對於她們未有擰頭理解情況就辱罵他們「冇家教」而深深感到不忿。

「我哋知成程車叫會好影響人，已經準備咗零食、玩具，但有時佢哋有時突然要喊、要叫，真係唔係咁容易控制！亦唔可能喺1分鐘內可以收到聲……有邊個父母想自己小朋友影響到其他人，但亦唔係話撳個掣，佢哋就可以即刻收聲……有時你越唔想佢哋叫，佢哋就係要叫。」

他們又表示，歡迎對方找巴士公司查看閉路電視畫面，查證有否控制小朋友，強調「我哋亦唔係放養小朋友，我哋絕對係有控制小朋友不當行為」。

網民反應兩極

事件引來網民熱議，有人批評表示「小朋友忍不住大喊大叫，你就不應該帶他們坐交通工具，要麼打車、要麼開車、要麼扔在家」、「其實叫足幾分鐘都好嘈，一家人搭的士其實唔貴」、「明知年齡細嘅小朋友唔嘈係有難度，車上其他人無義務去遷就！」、「影響到成車人要即刻落車啦，又抱又氹係咩教育方式」。

不過，有支持的網民表示「小朋友很多時候都容易出狀況，可能是不舒服，扭眼瞓，或者在陌生的環境感到緊張，真的沒有那麼容易控制的，重點是父母已經有在盡力控制，難道真的有小朋友就不能出街嗎？只是幾分鐘，大家互相包容一下」、「我覺得而家啲亞洲社會對小朋友太苛刻，如果見到父母有控制佢哋，我覺得冇咩問題」、「無湊過細路仔嘅真係理解唔到，其實真係好無奈」。