港男提早10日找卡數反被罰$400 客服現身揭真相竟與魔鬼條款有關

Mar 15 2024

不少人都習慣用信用卡，只因電子化的付款方式已逐漸取代現金交易，加上申請信用卡及用信用卡簽帳時，總會有不同類型的禮品或回贈，吸引市民使用。不過，有時真的要看清楚條款細則，否則很容易被魔鬼條款導致得不償失。早前，一位港男就指自己明明在信用卡還款日期前找數，但仍然被罰款$400「逾期利息」，無助之下只好向客服查詢，豈料背後原因竟與魔鬼條款有關，引來大批網民震驚表示「以後唔會再用」！

港男苦呻信用卡亂收息提早10日找數仍被罰$400

使用信用卡的確方便快捷，加上現時手機銀行發展得越來越好，只要一機在手就能夠簽帳和找數，間中又會有禮品或積分、現金回贈，吸引愈來愈多人使用。不過，有時的確需要睇清楚優惠的條款，以免得不償失。早前，一位港男就表示自己在還款日前10日已繳清卡數，卻仍然收到銀行的「逾期利息」通知，更直接罰款$400，令他一頭霧水，只好發文向一眾網民求救。

網民質疑事主睇錯日期客服咁回應？

有網民就質疑事主自己睇錯，懷疑他「找漏毫子尾數？」或睇錯截數日及繳費到期日，不過事主就表示以上猜測均不對。其後，他排除萬難終於成功與客服對話，才揭露原來與魔鬼條款有關。客服回應指事主「用積分扣咗嘅錢係扣喺下期嘅數，不過系統會當今期已扣數，所以會當你交唔足錢」，客服再舉例進一步解釋「當你碌咗$10000，佢畀你用積分扣$100，咁你交$9900，咁你就中咗計。因為系統當你只係交咗$9900，係欠$100。之後會罰你錢。而同時下期張單開始就會畀返$100你。等你完全唔知發生咩事」。

客服揭原來是積分扣錢出事。（劇照，非當事人）（圖片來源：ViuTV《IT狗》劇照）

魔鬼條款惹禍網民：以後唔會再用

事主是次的經歷疑與信用卡「兌換積分」的條款有關，條款上有提及「憑分消費之賬單信用額將會抵銷合資格客戶認可卡下一期之月結單總結欠，而無法抵銷已發出之月結單最低付款額或總結欠。合資格客戶須依認可卡合約條款每月償還已發出之月結單最低付款額或總結欠的全數款項」，奈何大部分用戶都會誤以為是直接扣數，因而造成以上誤會。不少網民表示「中過伏」、「我都中咗招，佢哋好x街㗎！話積分找數唔可以計落嗰一期嘅單，只可以計落下一期！所以技術上你變成冇還到卡數！」，更有人揚言因此而「嚇怕咗」、「以後唔會再用」。