余德丞泰國手信派20塊芒果乾被DO姐串爆 澄清有苦心再被窒:之前仲離譜
余德丞派幾廿塊芒果乾做泰國手信 DO姐: 好差啊啲手信
由鄭裕玲(DO姐)、余迪偉、傑朱、Dickson主持的電台節目《口水多過浪花》,週一(30/10)一集Dickson遭大家砲轟,原來大非常嫌棄他從泰國帶回來的手信,DO姐直言:「好差啊啲手信!唔係一包完整嘅,好似喺屋企食剩咁嘅,一陣真係要影相畀大家睇!得個幾廿塊芒果乾以為好矜貴啦,我就率先食啦,甜到漏啊!難食啊!」於是Dickson馬上為自己平反,他先是表示要先好好品嚐味道,隨後就解釋自己在機場買手信,當中有著各式各樣的手信,就連芒果乾都有3款,其中一款牌子更是被大家公認最好吃,不過Dickson就沒有購買該產品:「首先,佢個包裝好大包,你當係家庭裝,真係好大包!」不過DO姐反駁道:「宜家你唔係每人都有手信,而係一人一pat!」又抱怨表示:「我去日本排隊幫你哋買啤酒,拎返嚟原封不動!」
余德丞用心良苦原來背後有原因 網民: 見到實物先知少得誇張
隨後,Dickson再次解釋,原來背後用心良苦:「佢真係好大包,第二!佢每一塊都好大塊,我拎返嚟你哋好難食到。同埋我知道大家下午茶未必會食太飽『梅下梅下』,所以我就揀咗個容易食嘅,細細條嘅芒果乾。」之後他在補充表示自己買了豬肉乾等的其他手信,不過忘記帶回來,澄清說到:「我唔係咁樣嘅人」。
![余德丞 泰國 DO公審余德丞](https://imgs.gotrip.hk/wp-content/uploads/2023/11/%E8%9E%A2%E5%B9%95%E6%88%AA%E5%9C%96-2023-11-02-%E4%B8%8B%E5%8D%881.15.05_844198635654333092e99e-1024x588.png)
《口水多過浪花》Facebook貼相 網民:唔怪之得Do姐咁嬲
同日下午,《口水多過浪花》的Facebook帳號更新帖文,當中寫到:「余德丞非常大方得體,去完泰國,買咗呢『小半包』芒果乾俾我哋口水多過浪花全體仝人。」照片中就見到他把芒果乾用密實袋重新包裝,令網民紛紛說道:「嘩!咁大包嘅,點食得晒呀」、「用心良苦,小食多知味!」、「呢個節目以來最有心手信」、「唔怪之得Do姐咁嬲」、「獨孤九寒」、「見到實物先知原來少得咁誇張」、「咁有誠意,係余德丞先做到」、「臨出門口醒起:哎呀!唔記得買啲野返去塞住班友仔個口添,班友一定口水多過浪花啦……唔驚!搭飛機果陣食淨左半包芒果乾,拎個密實袋裝返去,搞掂」。
余德丞為補鑊即送「林真香豬肉乾」 網民狂笑:一定係香港後補買
隔日,余德丞馬上補飛向大家送上「林真香豬肉乾」,大家馬上表示:「有人話要補鑊,好彩都幾好味!」不過網民就搞笑表示:「你寒酸的形象已經深入民心」、「肯定香港買,即係慳咗機票錢,要買多幾盒補數」、「一定係香港後補買」、「已經cheap左兜唔返喇」、「依家最冇誠意就係買呢啲!仲要喺香港補貨」
![余德丞 泰國 網民震驚!](https://imgs.gotrip.hk/wp-content/uploads/2023/11/397207042_720785266754201_7313975412316246918_n_18921411976543286b51c82.jpeg)
DO姐再揭余德丞黑歷史:之前買日本手信仲離譜啊
後來DO姐再開台時,因節目剛好提起收過最伏的手信話題,DO姐因而又再點名余德丞,更指其買手信「黑歷史」一籮籮。DO姐指,有次Dickson去完日本旅行,帶手信回公司時直言於日本機場買了蛋糕回來,大家當時滿心歡喜,「日本加蛋糕喎,一定好食啦」,誰知DO姐指「個蛋糕難食到呢,甜到好難食,食咗半啖,已經同佢講唔好食,又無心,連咩都食嘅余迪偉都唔食,個綠茶蛋糕無綠茶味,好鬼甜,真係唔知咩嚟㗎呢D,有無搞錯」。蛋糕無人肯食,DO姐一心以為扔咗,誰知過了一星期後,打開自己櫃筒時即嚇親,指「嘩,一開櫃筒見到個難食蛋糕仲喺度,即係放咗喺度成個星期,即刻扔咗佢。余公子真係Top晒所有人,手信長期No.1,打個突呀我」。
而傑朱後來再補多飛,指當時無人食個蛋糕,叫余德丞「求奇搵個蛋糕擺埋,點知擺咗落DO姐嗰度,好彩無惹蟻」。