澳門美獅美高梅 正式開幕！$288抵食海鮮自助餐＋15大注目話題＋訂房攻略
Text：孖田｜Photo：Day
澳門新MGM 美獅美高梅 15大話題位
澳門第二間MGM位處路氹一帶，與新濠天地、永利皇宮為鄰居。酒店稱為美獅美高梅，賣點有開揚的室內天幕廣場、動感劇院、超過三百件藝術品、名廚餐廳等，聽落就夠晒吸引，記者嘗試上官網訂房，要到3月中先有吉房，不過酒店本身都好多賣點，即睇有乜打卡位，過年可以來一沾金運！
01｜搶眼！豪氣真金獅
美高梅又點少得招牌獅子，今次呢隻獅子足有11米高，38噸重，最好意頭是用32,000張24K金箔鋪成，是全球獨家；金光閃閃過美國同澳門半島嗰隻，尤其晚上打燈後，金光燦爛過小鳯姐！想睇美獅，就要來到劇院旁的美獅大堂，一出就近距離見到萬獸之王，沾沾旺氣！
如果想影獅子全相，就要去到對面的Grand Hyatt影過去；不過就見唔到成幢33層樓高的美高梅酒店。
02｜高科技！開揚天幕廣場
酒店大玩高科技，由美獅美高梅大堂入來酒店，一眼就望到開揚的視博廣場，網狀天網夠晒光猛。廣場有標榜為全球最大嘅室內永久LED熒幕，由25個小LED熒幕組成，上面播的片有中國名山大川、節慶活動、瀕危動物、宇宙星空等。
記者採訪時，LED熒幕日頭播放張家界、雲南潑水節，晚上則有動物影片，配合音效，整個廣場光猛有活力，較澳門半島MGM的天幕水族館感覺更新穎。記者睇過幾次，片段拍得有動感唔老土，據知片段有成7個鐘長，仲會隨季節天氣變化，好有心思。
到了晚上，視博廣場會有燈光效果，整體氣氛更浪漫，份外適合情侶，比起澳門半島MGM更浪漫（如果唔多遊客的時候）。
✅開幕優惠房價！澳門美獅美高梅訂房按此
03｜室內最大花園 絕種植物都有！
唔好以為廣場內嘅植物園係假嘢，「自然之藝」種咗超過十萬棵、逾二千種植物，當中包括超過二百種好意頭的蘭花，唔少仲係澳門同香港嘅原生品種，好有意思。呢度仲種咗多種19-20 世紀時已絕種嘅植物，係專程由香港同歐洲種子庫搵來。
04｜價值連城藝術品
MGM向來都主打富藝術氣息，美獅美高梅都一樣。三百幾件的藝術品中，有四十幾件係何超瓊女士同主席馬仁傑親自挑選的「主席典藏」，包括清朝名貴古董，同當代澳門藝術家作品。
轉到另一個大堂，以高雅淡綠色做主調，掛着27幅清朝御製的地氊，上面繡有九條龍象徵九五之尊，仲有一幅就在雍華府別墅。
每幅地氊旁都有QR code，用電話掃瞄就可睇到導賞，記者試過facebook、wechat 都得，旁邊仲有職員樂意講解導賞。
另一焦點係用咗9萬粒Swarovski串成的水晶燈，造價都過50萬美金！Bling Bling 到暈！
✅開幕優惠房價！澳門美獅美高梅訂房按此
05｜金色飄逸藝術時裝店
國內名時裝設計師郭培，曾為Rihanna設計一條金色拖尾長裙備受注目，也設計過Angelababy+黃曉明大婚中式禮服，今次酒店內開店，位於視博廣場中央，像一件玲瓏浮凸的金色雕塑，也像揚起的金色布匹，不過店舖尚未開，但走廊上已有展出她的作品。
06｜好意頭！三色珠寶盒
外形貫徹澳門美高梅的3色長方塊設計，寓意「升級版的珠寶盒」，3種顏色代表金、玫瑰金和銀色，夠晒好意頭。要找位置看到整排珠寶盒，暫時只有住客才可以走到泳池旁觀賞。
✅開幕優惠房價！澳門美獅美高梅訂房按此
07｜入房睇！酒店房勝在夠大
酒店房間數量都好多，合共1,390間客房，當中有4款房，入門級嘅度假客房都有463-550平方呎。開幕住宿優惠價HK$1,398（未連稅），再送$500酒店消費額，適用於餐飲、水療、劇院及來往香港的船票優惠，變相一千有找可入住，都真係好抵玩。另外仲有兩款的套房，由1,500-6,000呎的獨立別墅，跟足拉斯維加斯標準，就要遲啲先啟用。
所有房間都走高科技路線，以touch screen 控制燈光、冷氣外，仲配備似足智能電話的綜合遙控，可以直接遙控電視、開關燈、套房的窗簾開閂等。顏色就用上酒店招牌的玫瑰金，感覺高雅舒服。
✅開幕優惠房價！澳門美獅美高梅訂房按此
揀房貼士：尾數84-76 對正永利噴泉
房間全設落地玻璃，分為城市景、海景房及噴泉景，城市景就最輸蝕望地盤，噴泉景則可以望見永利皇宮的噴泉和吊車，據記者首晚入住經驗，房號尾數84-76 好啲，其中76 號再近正面一啲，景觀正，住到高層的話，可以高角度睇噴泉唔使同人迫，房內都聽到輕微噴泉聲同音樂聲。
✅開幕優惠房價！澳門美獅美高梅訂房按此
08｜4大名廚坐鎮 話題多多
酒店總共有9間餐廳，其中有4位名廚，有2位仲係首次在亞洲開店。最注目就有津村光晴開設的澳門首家日式秘魯菜，以及新加坡甜品女王Janice Wong 的甜品店。提提大家，如果以開幕價入住，仲有住客優惠，最平加$150已有兩人下午餐，連米芝蓮星級午餐3道菜都是$500兩位。
日式秘魯菜「雅吉」Aji 的大廚津村光晴，其位於秘魯的餐廳Maido 剛於2017年被選為「拉丁美洲最佳餐廳」及「全球最佳餐廳」第8位。
餐廳由世界各地運來新鮮海產，魚類多採用野生貨；像秘魯菜最招牌的魚生Cheviche，就每次來都可能用上不同時令鮮貨，充滿驚喜。
09｜超親民Janice Wong甜品店
另一注目餐廳，有來自新加坡的甜點女廚Janice Wong MGM。她曾多次被選為「亞洲最佳甜品師」，總店除新加坡外，只曾在外地開pop up。今次是首次在新加坡以外開設長期店，有全球最高之一的朱古力噴泉。
店內有朱古力、餅乾等禮盒外，仲有雪糕、pancake 等甜品。甜品櫃有馬卡龍、閃電泡芙、瑪德琳蛋糕等，價錢由$18起，都算好親民。雪糕口味獨特，像香茅香米、斑蘭椰糖開心果、茉莉花綠茶、充滿南洋風味，一球$38勁吸引！
✅開幕優惠房價！澳門美獅美高梅訂房按此
10｜抵食！$288海鮮自助餐
有睇開英文台就會認得《Master Chef》嘅評判Graham Elliot，佢首次在亞洲插旗，餐廳「濤岸」走加州風味，除咗是住客食早餐的餐廳，午餐都有任食薄餅及意粉套餐，頭盤甜品、咖啡或茶外，仲有8款Pizza意粉任食，每人$188勁抵。
而晚市更有自助海鮮吧，平日$288／假日$388位可任食龍蝦、即開生蠔、長腳蟹、翡翠螺、青口，其他熱食就要另點。不過生蠔大隻新鮮，食半打蠔再食龍蝦都輕易回本有凸！
不得不提有米芝蓮二星名廚、2017最佳餐廳第四位的Mauro Colagreco，主理扒房盛焰，入面特設喜馬拉雅山鹽的風乾房，所有牛扒都會至少熟成20日。除扒房外，另外仲有14個座位的鐵板燒吧枱。
11｜超高清熒幕 動感劇院
開幕日暫時未有表演睇住，不過入到呢個可容納2,000人的美高梅劇院，都幾期待睇騷㗎！因為劇院內的900平方米4K超高清熒幕，足足3個網球場大，又係全球最大，只係睇下簡單投影都覺得幾震撼；劇院仲可變身舞池或電競比賽場地。
酒店方面公布暫時會有3個駐場表演，其中《炫》就以交響樂、舞蹈等，在10分鐘內帶觀眾穿梭古今。另一套《追夢》就以電視遊戲節目和電子遊戲做靈感，創造出像真度極高的互動戲劇。
12｜珠寶盒外 露天泳池
泳池位就唔算大，水深由0.3-1.2米，頂盡係嬉下水，唔好旨意認真游。位置剛好被新濠大堆酒店包圍，都有椰林樹影同好多躺椅曬太陽。另外仲有4個按摩池，勝在望到美高梅個珠寶盒設計。
13｜住客免費上堂 闊落健身室
超大片落地玻璃， 挑高的天花，令到健身室的採光好，外面風景都有綠草地。酒店住客可免費參加多款的健身班，外國正流行的Surf set，呢度是澳門獨家有得玩。如果常來澳門，都可以Join 健身會籍。
✅開幕優惠房價！澳門美獅美高梅訂房按此
14｜中泰合璧水療
水療中心就當然唔少得，treatment 由泰式草藥、中式推拿都有，價錢由$780起，抵唔抵做就睇閣下荷包喇。另外都有Hair Salon 和美甲，價錢同香港中級髮廊差唔多，剪頭髮$380起，又唔係太天價喎！
15｜發財巴接駁澳門市中心
酒店總共有5條免費接駁巴士，分別由關閘、澳門港澳碼頭、氹仔客運碼頭和機場接駁酒店外，還有連接市中心英皇酒店的路線，以及路氹專線，可到澳門銀河、澳門百老匯、新濠影匯、新濠天地、澳門威尼斯人、永利皇宮及金沙城中心。去碼頭口岸的巴士到晚上12點，另外兩條就到晚上10點半左右。
美獅美高梅MGM COTAI
網址：www.mgm.mo/zh-hant/cotai
✅開幕優惠房價！澳門美獅美高梅訂房按此
