GM Diet 美國大熱減肥「奇跡食譜」！《新假期》編輯部5人實測！每餐任食＋不運動瘦8公斤？附註冊營養師建議｜假期實驗室
撰文：GW ｜來源：新假期編輯部、新假期資料室、[email protected]
GM Diet美國「奇跡食譜」減肥
一星期真係減到8KG？
到底甚麼是「奇跡食譜」GM Diet呢？其實GM是代表美國通用汽車公司（General Motors）。1985年，GM為了可以提升員工的健康，從而得到生產效率，因而得到美國食品藥品監督管理局、美國農業部協助而研發的GM Diet。
號稱「不用運動、極速且健康」的GM Diet是標榜只需7日的時間，有系統地攝取大量低熱量的蔬果，另外，也配合吸收複合式碳水化合物如糙米，並且喝大量水來減重，根據統計，GM員工因為食譜，而平均每人減了約4.5 – 8kg。由於這個方法能在短時間內減肥及見效，不少人用作短期有效減肥的手段，這次編輯部決定實測一星期GM Diet，試試係咪真係減到咁多！
《新假期》編輯部5人實測GM Diet！過程＋結果大公開！
GM Diet號稱一星期減到8公斤真唔真？（足本影片在文章最底！）
《新假期》IG：傳送門
《新假期》實測開始！
記者高矮肥瘦全都有 平均減到幾KG？
背景資料：
編輯部參加者共5人，包括：
男記者：Garie
女記者：肥龍、飯飯、菜、苗
6月15日為實測正式開始第一日，初始體重數據如下：
GM Diet Test 第一日：
6月15日（一） – 水果日
餐單內容：整天只能進食除了香蕉以外的水果，可少食多餐，不限量任食，另外配上至少8-12杯水。
飲食目的：水果高纖維、低脂、低熱量，另外飲用大量的水加速身體排毒。
第一餐（早餐連午餐） – 奇異果＋火龍果＋蘋果＋梨＋橙＋士多啤梨＋藍莓水果拼盤
第二餐 – 與第一餐分別不大 另外加上葡萄
第一日的食後感
Garie：「萬事起頭難，第一日真係超辛苦，前一日仲食緊好西，今日就只能食水果⋯⋯好餓，覺得個人好凍，第二朝瞓教起身隻手痺到醒咗，可能無咩血到。」
肥龍：「記得前一晚食咗打邊爐，第一日心諗應該好易過，只可以食生果，但全日個人好肚餓，渾身無力，坐喺office個人係好凍好凍！」
飯飯：「好X凍好X凍！但原來食生果比我想像中飽肚。」
菜：「全日食生果好難捱！周身無力！另外，生果推介食蘋果同梨，奇異果、士多啤梨好酸！但的確幫助排便！」
苗：「第一日減重就全日只可以食水果，感覺身體完全未適應到，好餓好餓。」
GM Diet Test 第二日：
6月16日（二） – 蔬菜日
餐單內容：全日只吃水煮／烤焗／生的蔬菜，早餐可吃一個薯仔，配上至少8-12杯水。
飲食目的：蔬菜纖維豐富、少量蛋白質、脂肪含量極低、薯仔有澱粉可提供能量予日常活動。
第一餐 – 水煮秋葵＋紅蘿蔔＋焗薯仔／西蘭花／金菇／翠玉瓜
第二餐 -與第一餐分別不大 多了水煮娃娃菜
第二日的食後感
Garie：「好綠，成檯都好綠，食完個人都清新晒，味蕾得到淨化，比起前一日飽，但食完都係好凍。」
肥龍：「仲未有得去大便，只食菜都開心嘅，學識咗焗菜嘅技巧，發現翠肉瓜同金菇都好好味，食暖嘢個人冇咁凍啊，不過都仲係會餓，無乜熱量，夜晚返到去好早訓。」
飯飯：「屙咗好多屎！食菜叫做有啲暖野落肚，有返少少精力！」
菜：「蔬果可揀茄子、金菇，再配生菜、西蘭花會無咁悶！焗一焗更美味，比第一日飽，但好快餓，同樣無咩力！」
苗：「蔬菜選擇多，烹調方法都多咗，食到多啲唔同嘅嘢。成個人比第一日更飽肚同有精神。」
GM Diet Test 第三日：
6月17日（三） – 蔬菜水果日
餐單內容：全日只吃水果及水煮／烤焗／生的蔬菜，配上至少8-12杯水。
飲食目的：水果及蔬菜擁有高纖維及多種植物營養素，多攝取水果及蔬菜，可讓身體自我修復。
第一餐 – 菠蘿＋西瓜＋哈蜜瓜＋橙＋火龍果＋奇異果＋葡萄＋藍莓＋士多啤梨
第二餐 – 沙律菜＋西瓜＋菠蘿＋蜜瓜＋葡萄＋烤茄子翠玉瓜金菇＋水煮秋葵
第三餐 -沙律菜＋西瓜＋菠蘿＋哈蜜瓜＋烤茄子翠玉瓜金菇＋水煮秋葵
第三日的食後感
Garie：「早餐食生果原來唔錯，同埋身體好似開始習慣呢種飲食，無咁難捱，個人精神咗，行路都輕盈咗。」
肥龍：「食生果加上蔬菜，選擇彈性較大，但已經有少少厭惡，但都要頂硬上！」
飯飯：「第一餐一食返生果即刻血糖上升，勁眼瞓。但時間比第1、2日易捱。」
菜：「食返第一日同第二日既野，好折磨！明明未飽，但已經食到唔想再食！」
苗：「雖然感覺到身體習慣咗自己食唔飽嘅感覺，但都仲係好想食餐單以外嘅食物。夜晚餓到瞓唔著⋯」
GM Diet Test 第四日：
6月18日（四） – 香蕉牛奶日
餐單內容：8-10根香蕉＋4杯牛奶（可改成豆漿）＋8-12杯水
飲食目的：香蕉含豐富的鉀質及果膠，提供身體能量。牛奶含鈣、蛋白質、礦物質，補充身體營養所需。
第一餐 &第二餐&第三餐 – 蕉 全部都係蕉＋牛奶
第四日的食後感
Garie：「我覺得自己好似馬騮，但今日比前3日是食得最飽的一日。（超市一次過買40條蕉嚇親收銀姐姐⋯⋯）」
肥龍：「最瘋狂的一日！去了三次大便，好暢通愉快，唔使煮嘢食好輕鬆，攪拌機香蕉加奶好好味，但血糖瞬間上升，做嘢時好眼瞓⋯⋯」
飯飯：「估唔到香蕉同豆漿係食得最飽最易捱嘅一日，香蕉加豆漿好好味！焗香蕉到底係邊個諗出嚟，我到依家仲會諗起浸臭底褲味。」
菜：「終於有飽嘅感覺！但一日食8條蕉，好多！建議可作多變化，如製成奶昔，但千萬唔好焗香蕉，極度不推薦！」
苗：「雖然唔太喜歡香蕉，但食落真係方便同飽肚～覺得食咁多條香蕉太辛苦／麻煩的話，可以加牛奶打做milkshake，感覺會攝取得比較輕鬆！」
（編按：新假期編輯部的共識：「食材唔可以平凡地食，煮成其他形態會開心啲。」）
GM Diet Test 第五日：
6月19日（五） – 番茄蔬菜豆肉日
餐單內容：每人6個番茄＋水煮／烤焗／生的蔬菜＋500g魚肉或雞肉＋12-15杯水。
飲食目的：肉類含蛋白質，魚肉更有Omega-3，是補充身體所需的重要元素。
第一餐 – 番茄豆腐湯＋蕃薯苗＋蒜蓉焗雜菇＋檸檬汁羅勒焗鯰魚
第二餐 – 與第一餐大同小異 加上焗茄子及清蒸星斑魚
第五日的食後感
Garie：「成餐都係我煮有啲攰lol，只用極極極少量調味，終於有返小小食家常飯的感覺，滿足飽肚！」
肥龍：「全靠Garie幫手煮！真係豐富又好味，調味到位，焗魚原來可以咁正！！！番茄豆腐湯暖胃又飽肚，之後減肥餐會繼續食，少咗澱粉質個人感覺好輕盈。」
飯飯：「有Garie神嘅加持，終於有餐係食得飽！！如果日日都係咁食法，我係可以繼續～」
菜：「可以食返肉，簡直人間美味，而且有蔬菜，均衡營養，飽！另外全靠有Garie大佬，發揮強勁廚藝，食到世上最好減肥美食！」
苗：「有肉食喇！係7日內食得最飽最享受嘅一日～ 食返有少少調味嘅食物，感動！」
GM Diet Test 第六日：
6月20日（六）- 水煮／烤蔬菜日
餐單內容：500g魚肉或雞肉＋水煮／烤焗／生的蔬菜＋8-12杯水。
飲食目的：混合多種身體所需的營養素及纖維。
（編按：因為星期六及日是休息日，全員星期五已提前做好飯盒帶回家吃）
食飯盒紀錄
第六日的食後感
Garie：「放假係應該食好西⋯⋯但呢一刻嘅我唔可以背叛隊友！聞咗當食咗No Problem！」
肥龍：「星期六要靠自己啦！好想念隊友！！！好彩Garie煮定俾我哋，翻熱就得啦，但見到親朋好友開大餐，心情難免有忐忑，但心諗仲有一日，不要放棄！」
飯飯：「出街食飯係煎熬！見住朋友食肉無得食係最痛苦！我要食肉啊X！！！」
菜：「六日最難捱，望住大家食好野，有得睇冇得食，而且無同伴一齊，好孤單！」
苗：「假期無同伴互相監督住，要自律！」
GM Diet Test 第七日：
6月21日（日） – 糙米蔬果汁日
餐單內容：2碗糙米飯＋任何蔬菜&水果都可進食，或打成果汁飲用。
飲食目的：果汁可助身體排毒，高纖糙米也可以幫助消化，提供身體能量。
（編按：因為星期六及日是休息日，全員星期五已提前做好飯盒帶回家）
食飯盒紀錄（飲品是紅菜頭＋甘荀＋蘋果打成汁）
第七日的食後感
Garie：「父親節無得喪食垃圾食物，感覺有啲怪，雖然今日有飯落肚但感覺好餓，果汁同蔬菜太單調，無肉食係差小小。」
肥龍：「最後一日！第一次試紅菜頭、蘿蔔、蘋果打成汁，顏色超似巫婆湯，飲落口都有青味，尚可接受，食糙米飯加少少蒜蓉好正！」
飯飯：「最頭暈嘅一日，暈到要即刻食啲提子先見好轉。但紅菜頭加蘋果加甘荀比我想像中好飲。見大家無破戒，更加覺得唔可以再破戒，唔可以辜負大家！」
菜：「只有蔬菜同飯，依然冇咩力，出街都好易攰！而且好快餓，要快快趕回家吔飯！另外，撞正父親節，但冇得食好嘢，好慘！」
苗：「最後一日，堅持！父親節，帶埋餐盒同屋企人出去食晚飯，望住成枱餸，我只能食自己準備好嘅糙米飯同菜。」
GM Diet Test 第八日：
6月22日（一） – 完結及結算日
5人GM Diet實測完結感想
Garie：「終於完咗地獄一星期，成單嘢係我提出要實測，所以好似無資格怨辛苦？！Btw感謝有隊友互相扶持！經過呢一個星期覺得自己除咗體重下降咗以外，最重要嘅係身體係輕盈咗健康咗，成個人無咁水腫，屋企人都話我瘦咗一個Size，同埋皮膚明顯好咗。如果是想短期內有瘦身效果的話可以試試，但長期維持的話千萬不要，一來太辛苦，二來食蛋白質不夠會減少身體肌肉量！長遠減肥都係要靠控制飲食，有時間就要運動啦～」
肥龍：「冇諗過減到咁多！全靠隊友無條件陪伴我，體重上其實只有我需要減肥，但佢哋都不辭勞苦，陪我買餸煮飯食餐單，更加意識到自律的重要，原來澱粉同糖對人體咁大影響，食少一點個人更加精神，建議大家可以試試，可做到排毒效果，個人感覺更加輕盈，回想返都唔係咁辛苦，因為有同事滿滿嘅愛，難得減到少少，就唔想放棄！我要爭氣呀！！！！！！！」
飯飯：「如何在無油少調味情況煮到大餐請睇我哋拍嘅片！其實有一班朋友同你一齊食係最開心，呢一個星期好似去咗ocamp咁，每日買餸煮飯就過一日，雖然口講好辛苦，但實際上都幾享受。不過問我要唔要再嚟多次就不了，因為太易反彈，同啲皮會鬆啊X！！！」
菜：「最重要係要有人陪你一齊減，會冇咁痛苦！但其實呢個餐單有點太極端，瘦是必然，但同時亦一定會反彈，最重要係之後都要keep住健康飲食，或者可以當呢次係一個改變，從此提醒自己唔好太放肆亂食！」
苗：「覺得GM DIET雖然能有效減重，但飲食上比較極端，唔可以長期進行，適合想急住短期減磅嘅人。雖然好似好廢話，但最重要真係平日要養成好嘅生活同飲食習慣（屋企人話我呢星期後皮膚明顯好咗）。認真控制飲食，食清啲，效果已經會好好。想試GM DIET又自制能力較低嘅朋友，有同伴一齊互相扶持會好好多～會記住呢7日嘅美好回憶，多謝同事！」
註冊營養師Michelle專業建議＋Q&A：
Q1. GM Diet能快速減重的原因是？
A1. GM Diet餐單上每一日的平均卡路里攝取量大約800-1,000卡路里，而成年男性及女性每日需要分別攝取約2,200/1,700卡路里，在消耗量大於攝取量的情況下，體重快速下降是正常的。
Q2. 以GM Diet減掉的體重，真的是「減肥」嗎？
A2. 在數據上可以看到，5位的體脂率都沒有太大改變，甚至有兩位有上升的情況，減掉的只是水份或有機會是肌肉，而正確的「減肥」是令體脂率下降。
Q3. 建議減肥人士使用GM Diet嗎？
A3. 不建議，尤其有糖尿病或血糖不穩的人士切勿嘗試，可能會有健康風險。使用餐單的人士因為吸收的熱量過低，新陳代謝會減慢，可能會出現專注力不足、無精神、情緒變差、活動力下降等問題。
Q4. 其他建議？
A4. 營養師一般建議減重速度為1星期0.5-1kg左右，以編輯部5人為例，進行GM Diet一星期後，每人至少減重1.5kg，最多減4.4kg，但減重速度過快對身體不是健康的跡象，所以還是建議想減肥的人士，進行健康飲食及配合運動，長期而有效地進行。
Michelle Lau 是營養顧問公司NUTRILICIOUS 的創辦人及首席營養師，致力於鼓勵及教育亞洲數百萬人，讓他們吃出健康美麗人生。Michelle和她的團隊積極教育所有受眾採用均衡有營飲食生活模式，並為不同媒體、品牌、機構主持烹飪示範和健康講座。
