防潮攻略對付回南天！7大預防家居潮濕發霉招數＋DIY防潮包

7大家居防潮法 輕鬆對抗回南天

1. 用酒精抹牆身

喺回南天嘅時候牆身都特別容易發霉，有時牆身仲會黑得好勁，想解決呢個問題，大家可以試用乾布把牆身抺乾，再用酒精抺牆就可以啦！

2. 蠟燭

點燃蠟燭其實有除潮同除霉嘅作用，有助令水氣無法凝結，更可以降低空氣濕度。大家可以試下用蠟燭抺牆壁縫隙，以形成保護膜，有助減低霉菌滋生，如果用有香味嘅蠟燭，更可辟走霉味。

3. 舊報紙

大家千奇唔好睇少舊報紙嘅作用，報紙其實係天然嘅吸濕好工具！只要放報紙喺衣櫃入面，就可以防止昆蟲走近，亦可以加快晾乾衣服。另外，如果將舊報紙貼喺窗上更可防止霧水結聚！

4. 粗鹽

粗鹽有助令水氣快啲吸乾，如果再以30-40溫度嘅水去拖地，仲會令地板更乾爽同有效地殺菌。

5. 梳打粉

最低成本嘅防潮方法，莫過於用梳打粉，而且係一種較天然嘅清潔方法。如果洗衫時加梳打粉入去洗衣機內，有效杜絕霉菌積聚。另外，將白醋加梳打粉混合後倒入排水口或馬桶，都可以防止霉菌滋生！

6. 漂白水

潮濕天氣最容易滋生細菌，大家其實可以用1:50嘅稀釋漂白水抺牆身，不但可以清除牆身上嘅霉菌，更可以有效將昆蟲殺死。

7. 防潮珠

大家買嘢嘅時候成日都會見到防潮珠，話明「防潮」咁就緊係對吸濕好有功效啦！雖然防潮珠吸濕能力唔算強，但就勝在夠平同易買到，最適合放入衣櫃或鞋盒內。

防潮小錦囊DIY

吸濕防潮的小包包，雖然唔算太貴，但其實日常生活中有好多可以自製吸濕小錦囊的材料！

1. 破舊襪或不織布袋

首先可以把已清潔的舊襪或不織布袋製作小包包待用，只要不穿窿就可以當作小錦囊袋以下材料！

2. 咖啡渣

咖啡渣其實有好勁嘅乾燥及除味功能！

3. 洗衣粉或梳打粉

洗衣粉除咗洗衫之外，同時可以吸水氣！打開洗衣粉時不時會見到一嚿嚿嘅粉出現，其實就係濕氣重所致，但就不影響洗衫！另外，梳打粉同樣亦有吸濕功效，結塊後就不建議再製作食物，但仍可作清潔霉菌之用。

4. 舊茶包

茶包吸濕方面未必有顯著功效，但係吸味除臭方面表現亦唔錯，除鞋臭味一流！

原文刊於：Sunday Kiss