【週末遊懶人包】 浪漫拍拖遊 長洲

第一站 分享甜到漏手造焦糖餅

Sweet Sweet來到長洲拍拖，當然要食一啲好sweet嘅嘢，呢間小店嘅焦糖餅係即叫即整，仲可以揀餅上面嘅圖案，拍拖喎，梗係揀心心啦！

店主將煮熱嘅砂糖，加入雲呢嗱油同梳打粉，待糖漿發脹後，放上金屬板再壓扁，印上圖案就完成！焦糖餅口感十分脆！食落係濃濃嘅焦糖香，有少少苦澀味。不過一個人食比較膩，最好同BB豬開心share(希望佢唔好食完又嗌要keep fit啦！)

海盜王張保仔
地址：長洲新興後街152號地下(顯示地圖)
聯絡電話：6130 7939

第二站 情人鎖留影

繼德國、美國、南韓之後， 長洲 都有可以掛情人鎖嘅地方啦！同BB豬唔使搭飛機都可以浪漫下！

啲情人鎖遠睇就五顏六色十分靚，但一行埋去近睇，部份鎖嘅金屬位都生咗銹，所以影Selfie時唔好「跟鎖太貼」喇！

買鎖去對面B&B舖頭就得，不過$30個就真係唔太抵，但愛情嘅嘢，都係無得計咁多架啦……如果真係要為將來結婚計數的話，自備情人鎖又得唔得呢？即係咁，場邊有個伯伯長期在鐵絲網邊「打躉」，見有人將其他的鎖放上去之時，就會埋嚟「關心」吓，唔知算唔算唔得呢！

情人鎖
地址： 長洲 東灣路12-14號(顯示地圖)

第三站 創意甜品店撐枱腳

去 長洲 ，唔少人都鍾意買返個平安包食，兼做手信。不過同BB豬出嚟，食平安包又好似唔係咁啱Feel喎，唔知有平安字樣嘅馬卡龍又啱唔啱佢嘅胃口？

馬卡龍嘅味道係香片茶味，味道芳香，唔會太甜。

第一眼見到以為係心太軟，一樣都係有啲朱古力漿流出嚟，但點知食落去係凍架！原來係朱古力慕斯嚟！

脆皮朱古力外殼下係軟滑慕斯，慕斯下層係海棉蛋糕及曲奇餅底。

呢度嘅甜品師Keily，整甜品嘅功架原來係自學！哪裡來的勇氣？原來係基於一個情字，因為佢個BB豬鍾意食甜品囉！So Sweet！

U Can Cook
地址：長洲海傍街91A地下及82號全幢(顯示地圖)
營業時間：12:00pm-10:00pm(逢星期四休息)
聯絡電話：2981 6533

第四站 孖住遊賣藝手作小舖

看完情人鎖，吃過焦糖餅，又要周圍行下，近東灣泳灘，有一間小店，長期都人頭湧湧，裡面賣的，大部份產品都是人手製作或設計，好啱同鍾意文青feel嘅BB豬行下。

由本土工作室製作，將香港美食變成袖珍飾物。

飛行棋、維他奶充滿集體回憶，手繪風設計更顯懷舊。

陶瓷碗圖案精緻，可放生果、沙律或飾物。

手鐲由結他弦線整成，中間穿上珠仔，型得嚟又帶點可愛。

賣藝
地址：長洲東灣路慶安台3號地下(顯示地圖)
營業時間：11:00am-7:00pm（逢星期二休息）

第五站 後街歐陸小店搵信物

穿過橫街小巷，就會搵到Nitti-gritti，門口設計令人印象深刻，咁細嘅舖面，但有齊窗戶、大門、台階、而且仲泊咗架復古造型單車喺門口，充滿歐陸風，入店就好似去探朋友嘅，好有親切感。(同BB豬又多一個影相點！)

店主Packy於墨爾本讀書期間，經常行當地嘅Brunswick Street，街上有各式各樣嘅小店，間間都好有風格，回港後，Packy希望喺自己嘅居住地- 長洲 ，開一間有自己風格嘅小店，好型呀~！

店內貨品都係店主由世界不同地方採集回來，來自蘇格蘭、丹麥、韓國等地嘅精品及生活用品，亦都香港手作人製作嘅飾物。(太多野揀，記得錫住另一半荷包！)

由蘇格蘭設計師製作，走復古少女風路線，陶瓷公仔有多款造型，有小狗同小羊等。

南韓插畫師Jaesun設計，作品富童話味道。

本土手作人製作，手工細緻。

店主自家設計嘅抱枕，不少客人買來做新婚禮物。

店主問年輕 長洲 紙紮師傅特別打造，作為店內裝飾。

店主愛犬Alloy幫忙「睇舖」，十分聰明，而且很親人。

Nitti-gritti
地址：長洲新興後街105號(顯示地圖)
營業時間：星期四、五(12:00pm-06:00pm)、星期六、日(12:00pm-07:00pm)
聯絡電話：3689 1242

第六站 碼頭看日落

食到飽，行到攰，又仲未夠鐘搭船？其實喺碼頭附近睇到嘅日落係好靚架！我都知睇日落有啲娘，但橋唔怕舊，最緊要受！如果當日個天唔厚雲，仲會見到鹹蛋黃添！

延伸閱讀：

【 東京旅遊 】點止食玩買咁簡單？東京另類文化體驗！

荔園效應：　懷舊玩具 大眾化的集體回憶
新假期食玩報料：[email protected]
歡迎Instagram / facebook 使用#weekendhk 報料，資料一經選中會為你公告天下！