第三跑道 食腦就搞好？@杜遊珍
廣告
上周的財政預算案，財爺聲稱第三條跑道，可以喺明年展開工程、2023年落成啟用。不過反對聲音一直冇少過，由阿珍做女開始，講到家下依然未解決。
阿珍讀得書少，但都覺得「三跑」實在多餘，須知道三跑的緊急復飛航道，與澳門及深圳機場常用航道重疊，環保觸覺就計過數，若真係有三跑，單是在過去的一月，就會有4,403次撞機的機會！
放遠啲眼光，睇下跟赤鱲角一樣只有兩條跑道嘅倫敦希斯路機場，當局曾經研究興建第三條跑道，但最終冇動工，因為只要提高跑道系統的效能，唔使石屎就可解決問題。
下個月開始，希斯路機場將會採用新一代航空交通管制技術（ Time based separation），保障飛機降落頻率穩定，從而提高跑道的使用效率，即使航班和乘客數目比香港多出20-25%，依然應付有餘。再者，希斯路兩條跑道同時用作升降，但香港嘅國際機場，兩條跑道，一條用作起飛，一條用作降落，效率自然唔及倫敦，呢個先係問題所在啊！
其實香港人唔係唔肯使錢，不過要用得其所，下下填海劈山使成千億，都係得個吉，為咩呢？
