最佳男主角──機場篇@杜遊珍

梁家輝──勁Gentleman

姊妹Ｙ入行四年，都算閱人無數，講起梁家輝，忍唔住勁讚係「超級好男人」，話說有次影帝同太太一齊Check-in，地勤要將佢哋行李拎上磅，梁生竟然第一個撲出嚟，仲話：「呢啲嘢梗係男人做！」如此有禮貌的乘客，咪話明星，一般搭客都習慣繑埋手好少理，難怪姊妹Ｙ印象難忘。點知故事未完：「檢查佢證件時，張相竟然係呂奇造型，我即翻轉張相忍笑，點知一抬頭，佢竟然笑瞇瞇望住等我反應！」又細心又風趣，唔怪得知姊妹們咁冧。

發哥──魅力迫人

發哥係 Superstar毋須多講，有次 Check-in排喺姊妹L條隊，現場霎時引起小騷動，首先失控的竟然係排頭位的商務艙洋人乘客，興奮到狂問姊妹L識唔識發哥，L心諗：「我細細個睇許文強大，當然識啦！」之後發哥仲相當nice咁跟洋人吹陣水先離開，但最爆笑係 L話翌日喺娛樂版見到發哥見報，張相咁啱影到佢於 Counter 工作中，變相合照，勁開心！

小齊──唔雞晒

就算明星Check-in親力親為，但有無得臉對臉接觸，都好視乎彩數──好似勁 Like 任賢齊的姊妹J就話，有次睇住小齊明明朝自己方向邁進，居然畀隔籬位男同事截糊，J惟有邊做嘢邊豎起耳仔偷聽小齊真人發聲，最後只係聽到佢講咗一句：「唔雞晒」。事隔多年，姊妹J最近睇電視，發覺小齊講廣東話依然無乜進步，依然咁 Cute……嘩，估唔到淨係好人好事，已經數夠一期，仲有幾單奇趣寒酸「揞名爆」，睇嚟要喺下星期爆多一周先得嘞！

杜遊珍
在旅遊界打滾多年，熟悉旅遊產品動向，得悉業界內幕，揞名登場指點大家出遊秘技。

延伸閱讀：喊出嚟！ 邊度買日本威士忌？@杜遊珍