嚴選！高科技單車裝備推介 @ Gadget專男

公路戰士踩山路都啱使

我見嗰班「偽型」爸爸身上嘅裝備都得頭盔護膝，我心中不禁講咗句︰「呢個年代，單車並唔係咁踩嘅。」淨係得頭盔護膝點夠㗎！等我Gadget專男同你推介幾款高科技裝備，無論你係公路戰士定係鍾意踩山路嘅山系挑戰者，呢幾款裝備都必定啱你用。

運動版Google Glass

有唔少朋友都鍾意戴部藍牙耳機踩單車，方便聽歌聽電話。又或者戴部 Gopro喺身，記錄自己嘅行車狀況。而呢副智能眼鏡 Senth IN1就集合晒所有功能於一身，Senth IN1可以話係運動版嘅Google Glass，眼鏡前配備咗攝影用嘅鏡頭，影相得！拍片亦得！咁就可以輕輕鬆鬆踩到邊影到邊。

一系列感應器

眼鏡亦內置一系列感應器，例如GPS、加速計、感光器等，所有踩單車時嘅數據都可以喺眼鏡上嘅螢幕顯示。當中亦可以邊踩單車邊喺螢幕上睇地圖，仲有方向指引，咁就唔使再成日停車睇地圖

4種適應不同光線鏡片

眼鏡亦有語音識別功能，只要用口講出對方個名，就可以隨時打電話send信息，而且大部分功能都係用單車手把上一個「擦膠」一樣大嘅藍牙遙控切換，方便快捷，唔使停車都搞得掂。Senth IN1更有4種適應不同光線環境嘅鏡片，無論日頭出車定係夜晚踩夜車都絕對啱用。

抵買！

Senth IN1暫時可以喺Indiegogo以199 美元（約 1,550 港元）優惠價進行預訂，並暫定今年12月出貨。千幾蚊就已經有google glass嘅質素，戴上面仲成個Aaron咁嘅款，又型又實用，絕對抵買吖。不過都係勸大家一句，踩單車唔好掛住睇螢幕，要睇路啊！

想知更多Senth IN1資料，可以瀏覽indiegogo網頁: https://goo.gl/CAMd5X

啱踩夜車

香港地個個日頭都要返工返學，好多單車發燒友都唯有選擇夜晚出車。但夜晚燈光昏暗，有啲車手更加鍾意喺馬路踩單車，真係一不留神就隨時出事。

人肉背脊打燈

呢款Cyclee投射燈就係針對踩夜車嘅朋友而設，投射燈可以將各種警告提示如停車、轉彎等指示直接投射到車手的背脊上，將車手嘅背脊變成人肉指示牌。用家亦可以安裝cyclee應用程式，喺應用程式上自行修改及設定各種提示樣式。而射出嘅紅色提示燈喺夜晚亦十分明顯，能有效避免意外發生。不過Cyclee仍未大量生產，有興趣嘅朋友可能要再等等。

智能發熱保暖

話晒冬天都就快到，踩慣單車或者玩慣戶外活動嘅朋友都知道，雙腳嘅保暖真係不容忽視，雙腳凍嘅話就成身都唔暖。

-25°C都唔怕

Digitsole Warm就可以令鞋內溫度一直保持溫暖，Mashable網頁稱，就算你喺-25°C嘅環境，鞋墊都可以保持溫度30°C，咁就話知你踩單車踩到落雪都唔驚啦。

(網上圖片 來源: Mashable)

準確計步功能

Digitsole Warm主要sell兩樣嘢。分別係計步功能同發熱功能。Digitsole Warm鞋墊內置感應器，開發商表示感應器安裝喺鞋墊上比手腕嘅計步器準確得多。

鞋墊將於10月推出，暫定售價199美元（約1,550港元）。有興趣嘅朋友可以瀏覽官方網頁公布: http://goo.gl/nMqK2A