Harmony of the Seas 玩盡全球最大郵輪!! 36小時試玩全面睇
撰文：Perfect Hill | 攝影：Chi
除了由船頭行到船尾需時10分鐘外，船上仲窩藏高達10層樓高的巨型滑梯、3條滑水梯兼多套百老匯歌劇，另有20間餐廳酒吧全天候供應美食，完全夠我玩足36小時有餘！今次真係出海旅行忙過返工啦！
Harmony of the Seas 玩足36小時 仍未玩夠
排水量 ：227,000 噸
載客量：2,747間客房 5,497人
上船前，記得搵我哋呢身水手造型的船員幫你Check In！
瀡落十層樓 個心離一離 （Day1, 11am)
上郵輪，第一件事做咩？記者連行李都懶得放，直接衝去郵輪主打的海上最高滑梯Ultimate Abyss！這條滑梯可謂萬眾期待，船公司由年頭放風神神秘秘，Lonely Planet、Cruise Critics 仲瘋傳幾張滑梯虛擬圖片，今次記者有幸上船見真身，從滑梯底部向上仰望，要條腰拗後先完全睇得晒這條10層樓高的雙滑梯，簡直睇見都心慌慌，有嚇人氣勢！
滑梯入口處位於15樓，玩前要先聽職員的安全指導，不過這時講什麼都不太入耳，因為更搶耳的，是從滑梯傳來的無間斷慘叫聲！加上進入滑梯前需走過透明玻璃地板，腳下是一片大海，未玩先腳軟。在職員一聲Go，坐上軟墊，我咬實棚牙推自己落深淵，即刻一陣涼風掠過耳
邊，加上2個360度急彎都令我心離一離，不消10秒已瞬間到地，快咗啲囉！不過最Sur pri se 是，滑落途中竟有迷幻燈光同詭異音樂，有如墜入多啦A 夢的時光隧道，好玩！
滑梯猶如扭曲的水管，造型好似心心。
平日玩慣機動遊戲，今次挑戰Ultimate Abyss，未驚過！
挑戰Ultimate Abyssy連環圖
點知，排隊途中，滑梯筒內傳來陣陣慘叫聲，令阿妹想縮沙……
穿過黑洞時，梯內突然出現陰間的燈光同音響，嚇死人咩。
燈光慢慢轉變成萬千星星，好靚！
10秒唔夠，就重見天日，快到嚇親。
完發現滑梯摩擦力太勁，膝蓋損了，阿妹建議大家玩前換長褲。
濕身玩大喇叭 Let’s get wet！！（Day1, 1pm）
挑戰完跳樓滑梯，我們急不及待換上泳衣，上甲板玩滑水梯！和悅號破天荒在船上築有23個泳池，當中包括2個大泳池同21個暖水按摩池，不過追求腎上腺素上升的記者，就鍾情於在甲板上的3條滑水梯和Flow Rider 衝浪機。必玩「Perfect Storm 」大喇叭，玩家從9米高處瀡入半透明密封管內， 再高速飛入喇叭， 離心力超強， 玩開X-game 的我都驚到叫破喉嚨。不過略嫌水流唔夠急，要我用人手推自己落個喇叭窿內囉！另一人氣玩水設施必屬人造滑浪Flow Rider，出海當日氣溫只得9度，但仍無減乘客對沖浪的熱情，結果記者足足排隊等足半個鐘先玩到。
可揀瞓身玩或者站立式衝浪，記者平衡感較差，只敢挑戰前者，攬著滑浪板從高處俯衝而下，想不到浪花比想像中大，水花不斷入眼，幸好型仔教練從旁指導，叫我用雙手臂壓實便可控制前後左右，超易上手！熟練後更可挑戰更高難度動作，如雙人拖手、跪在滑板上等。記者最終挑戰跪在滑板上轉圈失敗，一仆一碌被急浪沖走。
沖甩比堅尼 CYCLONE AND SUPERCELL
記者試玩2條全密封式雙管滑水梯，發現藍色滑梯較刺激，下墜時又快又急，差點沖甩比堅尼。
最梳乎！ JACUZZI
在船上行來行去腿都痠，識歎一定係學我飲住果汁，一邊歎暖水按摩池。船上21個暖水按摩池全部有蓋，落雨都不怕，而且晚上仍然開放。
超嘥力！FLOW RIDER！
Flow Rider超大浪，要用強勁臂彎先可壓板，小朋友未必夠力Handle。
唔夠水！PERFECT STORM
嗚呀！！！每個透明彎都有令人有瀡出海的幻覺。
位於15樓的Perfect Storm 都幾驚嚇，在滑梯急墜時會望到7樓中央庭園在屁股下。
急轉2個圈後便會被沖入直徑8米的大喇叭。可惜水流太弱，玩家慘被卡在喇叭裡。
DAY1 8pm 星空下 嘗分子料理
玩水後已經是晚上8點，歐洲的太陽仍未捨得下山，但我肚子已發出咕咕聲的警號，提我開餐啦！雖然郵輪上一日3餐全包是常識，但記者試過免費的主餐廳，竟然有伏味甚濃的黑椒汁豬腩頹飯，我寧願畀多少少食豪啲。在眾多收費餐廳之中，12樓的Wonderland 就最抵畀，啱晒我畀錢食環境的港女，2層高落地玻璃可俯瞰中央庭園，入黑後天花還會亮起漫天星星，浪漫氛圍下，我差點以為對面的攝影師是靚仔Jack。
Wonderland 的菜式大玩分子料理，賣相自然估你唔到，我點了Buffalo Chicken Egg，但咬下去時竟然是辣醬Blue Cheese！ 6道菜的SetDinner 驚喜連連，每人收費US$40/HK$312，抵試！不過最surprise，是餐廳的點餐方法，侍應竟向我遞上一張白畫紙和畫筆，示意我用畫筆沾水畫畫！想不到在白紙上畫了兩筆後，菜單慢慢滲出來，超神奇
主菜Baby Vegetables in the Garden
烤小蘿蔔、番茄仔和蘑菇擺設得如小盆栽，賣相夠呃Like。試食一啖泥土，原來是充滿牛油香的麵包糠，超鬆脆，蔬菜亦鮮甜爽口，只是份量較少，不飽肚。
前菜Buffalo Chicken Egg
會冒煙的煙燻蛋，真身其實是藍芝士，入口奶味濃烈，上面灑有黑松露，建議配白酒同吃。
餐牌沾水後才現真身，如睇魔術，十分神奇。
餐廳只提供午餐及晚餐2個時段，由於餐廳之前在海洋量子號登場時經常Full Booking，建議早一天預訂。
其他飲食推介
船上共有20個開餐選擇，7日船程完全不怕重複，當中7間為免費，如食歐陸菜的主餐廳、自助餐的Windjammer、Johnny Rocket 美式快餐，多屬煎炸食物，記者推介以下幾間付費好選擇：
Jamie’s Itallian（6/F ）
Jamie第4次落戶皇家加勒比，餐牌雖然跟陸地上的分店幾乎一樣，但勝在質素有保證。餐廳會於郵輪泊岸時補給食材，而意粉更是每日新鮮製造。加上5道菜的晚餐只是US$25/
HK$195，平到笑！
必食的招牌菜，Salami香腸和火腿柔嫩，配上醃製辣椒和Mozzarella更開胃。
Izumi（4/F）
船上唯一日本居酒屋，提供鐵板燒菜式、壽司和刺身。餐廳收費逐碟計，一碟2件的三文魚壽司為US$6/HK$47，價錢偏貴，但勝在厚切鮮甜。餐廳超細，只得12個座位，記
得Book枱食飯。
炸紫菜內包著松葉蟹肉、鰻魚、青瓜和牛油果，加入由香檳和辣椒混成的秘製醬汁，超開胃。
Solarium Bistro（15/F）
餐廳主打地中海菜式，海鮮處理最出色，必食烤大蝦、Mahi-Mahi魚、忌廉青口等，十分新鮮。午餐免收費，晚餐需另加US$20/HK$156，物超所值。
DAY1 10pm 百老匯歌舞 搬上船
出名晚晚都要排滿Schedule 的香港人，食飽飽之後最佳節目當然是睇Show！入夜後和悅號化身成移動歌劇院，2套百老匯式大型歌劇《Grease 》和《Columbus, The Musical! 》、冰上騷、水上馬戲及多套Dreamworks 電影免費任睇，全部唔使排隊、唔使撲飛，當中《Grease 》更是首次搬上船，而平時是開放給乘客玩溜冰的Studio B 溜冰場，晚上即變成溜冰舞者一步一驚心的表現場地，質素絕對拍得上街Show。
《Grease》
激似《High School Musical 》，講述一對後生仔女玩地下情的校園故事。只見每位靚仔靚女演員演技入肉，唱Live如同播CD，加上吊威吔、激光出齊， 劇情緊湊超好睇。一日2
場，分為8半及10半，必睇！
《1887》
講述情侶在巴黎鐵塔下穿插時空，遇上不同精靈與壞人的故事，多位溜冰舞者不時上演高難度動作，如男方一邊溜冰，一邊拋起女主角於高空轉圈後再把手同遊。留意每日只得9點1場，Mark實時間啦！
《馬達加斯加》和《功夫熊貓》一眾角色經常在6樓皇家大道出沒。
DAY1 12mn 注意！派對動物出沒
以為完Show 就返房？錯啦！因為船P 宜家先開始！位於5樓的皇家大道，早上是名店、酒吧和餐廳林立的購物長廊，但每逢晚上，大道便搖身一變，燈光Dim 暗，擠滿低胸窄身短裙的性感女士及脫下領帶的西裝友，手拿紅酒，隨Live Band 震入心扉的音樂大跳辣身舞。記者不擅跳舞，但都被場內熾熱的氣氛融化，被幾個Gentleman 邀請一齊跟拍子扭動身體，叫囂一番。
不愛夜蒲，只想靜靜地飲酒傾心事，就要到Bionic Bar，等機械手臂Bartender 為你調一杯Sex on the Beach。上一代在海洋量子號面世時已相當矚目，客人從平板電腦的Drink List 落單後，機械手臂會自動從天花的酒瓶取酒調配，全自動化，保證無人硬要搭訕，但動作就慢吞吞，被客人投訴多次。今次升級版機械手臂，明顯比以前加快手腳，從落單到送上枱，8分鐘已在眼前，飲都飲得暢快。
早上的皇家大道是食飯和Shopping集中地，與晚上的氛圍超大對比。
Rising Tide Bar
Rising Tide Bar每15分鐘便會由5樓的皇家大道升至6樓的室外中央庭園，感覺好似轉咗場。
Bionic Bar
Bionic Bar 由2位駐場的機械手臂來做調酒師，乘客只需按下飲品，他們便會自動製作100款不同口味雞尾酒，記得一試，每杯US$8/HK$62起。
在iPad輸入房號後可選飲品，同時亦可選擇酒精濃度及冰量。
收Order後，機械手臂會從天花取酒調配。
酒吧旁的大屏幕會顯示輪候時間和完成Order的房號。
機械手臂搖勻後會倒在膠杯內，並用輸送帶送到酒吧枱前。
飲到斷片唔識返房？
船上走廊位放有多部觸控式電子屏幕，只要輸入房號便會顯示返房路線，貓咗都識返房！
DAY2 10am 無敵大海景 免費早餐任叫唔嬲
放假當然要瞓到自然醒， 但無奈肚子不爭氣，餓醒咗！即刻打個電話，叫個唔使露面都歎到的免費Room Service 早餐，先慢慢化妝。當我眼線都未畫完，早餐已瞬間在眼前！最難得是，這個貼心服務適用於船上19種客房，連最平的內艙房都有，不過對自己好啲，當然要學記者住海景露台房，174呎放有梳化及Queen Size 大床，夠位打開2個大喼後仍可自由出入。睡床2人孖鋪，亦有空位轉動， 不怕驚動另一半， 只是略嫌床單質地粗糙。加上向海露台，放有2張沙灘椅和茶几，最適合躺在椅上慵懶歎早餐，送自己一個Good Morning。
Room Service食物質素不錯，送到上房的Egg Benedict，蛋是流心，鬆餅上夾著鮮甜菠菜，食一份就飽。
好開心，上船終於達成我要有得揀的心願，有30多個電視台睇，仲畀我睇到落畫無耐的《星球大戰7 》，超Update。
洗手間狹小， 馬桶旁便是直立式浴室，但比不少舊郵輪用的浴簾衛生好多。
Details Check！
1.Wifi
✓:超暢順，YouTube睇片無窒機。
✘:收費項目，每日US$9.99/HK$78，較貴。
2.插頭
✓:勁多插頭位，連USB叉電都有。
✘:需自備轉插器，郵輪上不設租借
3.服務
✓:按電話屏幕便可呼叫客房服務，如餐飲。
✘:沒有拖鞋、沖涼用品提供。
DAY2 1pm 流動藝術展場
只要細心留意，不難發現郵輪四周放滿藝術品。船上一共收集了世界各地3,000件藝術品，當中最出名的有位於皇家大道上名為Head 的鋼片人頭，是捷克雕塑家David Cerny 用5噸鋼片組合而成。人頭分為30多層，每層都會向左右不同方向自轉360度， 當中每5分鐘便會拼合成人頭1秒，大家記得要捕實！
DAY2 3pm 走出太空密室
和悅號今次破天荒將密室逃脫帶出海！踏入密室一刻，職員已瘋狂向我洗腦，話我入咗太空船駕駛室！突然「呯」一聲，繼而超入戲話我正飛往太空了。想重返地球？就要在限時60分鐘內， 完成10個任務！記者試玩第一關， 要找出6個神秘代號， 已經花了10分鐘，超難，不過勝在場內布景和音效都十分逼真，值得同Friends 一齊挑戰。
DAY2 4pm 藍天下睇「水舞間」
船尾的戶外表演場地Aqua Theatre，每日都會上演輕量版「水舞間」，多位舞者會在高台表演花式跳水之餘，又會演出韻律泳，期間不時水花四濺，前排觀眾慘被濕身。晚上，劇院變身成露天戲院，於星空下一邊吹海風，一邊睇電影，超好Feel。不過記者最期待是，英超期間場內會即時轉播足球賽事，千人同場睇波應該會超好氣氛。
DAY2 5pm 腳踏實地 落Port玩
經過2日1夜的航程，海洋和悅號已由母港西班牙巴塞隆拿，駛到帕爾馬，記者已經準備好隨時落Port 玩啦！未來數月郵輪將提供3至13日不同航程，當中7日航線最受歡迎，部
分一出爐已極速Full Booking。記者精選以下抵玩航線，讓你即刻上船，過個刺激夏天。
$7,209起 8日7夜西地中海之旅
行程：西班牙巴塞隆拿 → 帕爾馬 →法國普羅旺斯 → 意大利佛羅倫斯/比薩 →羅馬 → 那不勒斯 → 海上航行 → 巴塞隆拿
出發日期：6月26日、7月3、10、17、31日
住宿：7晚海洋和悅號內艙房
膳食：全包
雜費：$1,378（港口費、稅、小費）
升級：入住高級海景陽台房$10,492起
查詢：皇家加勒比國際郵輪 3189 3200
