$1,344澳門St. Regis 住豪啲配超貼心管家 |澳門|

Jan 13 2016

等到頸長的澳門6星級St. Regis卒之在上周開幕，記者立即入住報告返！酒店位於氹仔，主打570呎豪華靚房，開幕優惠做緊$2,688住雙人房一晚，即每人$1,344，屬於豪住！對比同區的高檔酒店如Ritz Carlton和Conrad，價格同是約每位一千中左右，則尚算合理。而St. Regis賣點是有專業管家為住客沖咖啡、安排行程甚至執行李，明顯target有米豪客，難怪現場所見十之有九亦是內地人！如果同父母去玩想住豪啲，開業優惠價住St. Regis都試得過，會送$600消費劵可歎半價SPA，有咩需要都有管家做埋跑腿，唔駛額外畀車馬費，家庭客無晒尿片都有人幫手買嘛！

酒店在哪兒

St. Regis距離氹仔碼頭10分鐘車程，專車只駛至假日酒店的接駁巴士，落車要行5分鐘才到。附近餐廳不多，想食地道嘢或買手信就要到20分鐘步程的官也街。

記者入住的3012號房面向金沙大道，入夜後附近酒店五光十色，坐在窗台上睇景甚有feel。

基本客房面積達570呎，空間充足，而且張king size床超大超舒服，打橫瞓都得！

藍芽Air Play 房內有靚聲藍芽音響，用電話接駁即可聽歌。 — 藍芽Air Play
房內有靚聲藍芽音響，用電話接駁即可聽歌。

Mini Bar收費裝彈弓！ Mini bar款式多，但要留意佢自動按被拿走的飲品重量收費，就算無飲過放返入去都照樣收錢，所以唔好手多多拎支茅台出來影相啊！ — Mini Bar收費裝彈弓！
Mini bar款式多，但要留意佢自動按被拿走的飲品重量收費，就算無飲過放返入去都照樣收錢，所以唔好手多多拎支茅台出來影相啊！

沐浴露勁正！法國品牌Laboratoire Remède，氣味清香仲有磨砂，沖完好舒爽。

測試管家貼心度：PASS啦！

St. Regis聲稱有專業管家隨傳隨到，記者試過要杯Expresso，15分鐘送到，但就畀錯咗Cappuccino。原來因為一個管家要管4層樓，咖啡只好由助理代勞。但5分鐘後即換返杯啱的，算你啦！朝早再試多次話要Latte，今次管家Jason親自送來，又沖得幾好飲！

台灣住客林先生一家我們和小朋友來，常要管家幫忙，但他們永無托手踭！我有朋友胃痛，管家即刻叫醫生來看他，更幫佢執埋行李，好好服務！ — 台灣住客林先生一家
我們和小朋友來，常要管家幫忙，但他們永無托手踭！我有朋友胃痛，管家即刻叫醫生來看他，更幫佢執埋行李，好好服務！

試住記者Elaine 整體住後感

房間舒適有氣派，張床超大好好瞓，管家態度親切，叫佢做咩都永無say no，就好似多咗個臨時工人咁！基本的USB插頭叉電、免費WIFI都有。但啲燈掣太新好「實淨」，要出盡力先撳到落去，日子耐咗應該會好啲！
$2,688 澳門St.Regis開幕優惠
包括： 1晚雙人房、早餐兩份、$600酒店消費券（可做spa）、迎賓飲品兩杯
日期：即日至2016年3月31日
備註：房間可容納2人，設1張特大king bed，亦可加$200改住兩張queen bed房，船票須自理
預訂方法： www.stregis.com/macao

高質早餐食到飽

St. Regis的開幕優惠包雙人早餐，可算是高質半自助餐，前菜可切少少風乾火腿配麵包，再夾舊三文魚刺身，加多件慢煮五花肉、黑松露蝦餃，更供應10多款邪惡蛋糕，包括甜到漏腰果批和雜莓鬆餅，十足甜品放題！而免費order特色蛋料理一點也不馬虎，煎炒煮焗任你揀，賣相超靚仔，保證相機都餵飽埋！早餐食豐富啲當brunch，都唔算好過分啫！早餐每位原價$248，開幕優惠包埋確實抵讚！

蛋料理有6款可選，這款是egg benedict配薯餅，即叫即做，水甜品款式超多，而且全部細細件，可一次過試晒所有口味！汪汪蛋黃一叉即流出，配合鬆脆香口薯餅，味道一流！

早餐時段餐廳人流不算多，一坐低即有侍應問你要邊款蛋料理，可落完order去自助餐枱揀食物。

The Manor @ St. Regis
早餐價格：每位$248
供應時間：6:30am-10:30am
營業時間：6:30am-11pm；午餐及晚餐供應西式料理及甜品
備註：餐廳分為5個區域，設私人用餐區，可容納12人，有需要可預先訂座
延伸閱讀：
潮流興攔腰斬新濠影滙奇幻之旅【澳門】
【掃街王】狂食海鮮+甜品！澳門10大暴食行程