過年上機無啖好食？記者醒你食「飛機餐」貼士

Jan 19 2017

做旅遊記者可以周遊列國，表面風光，其實暗裡一殼眼淚。特別在大時大節出trip，一支公上飛機，仲要得無咩選擇的飛機餐，「雞肉飯定牛肉麵？」我好難揀囉！一諗到新正頭飛長途，望住兜黯然銷魂飯，特別掛住阿媽整的年糕。唔想咁慘慘豬，其實部分航空公司在節慶日子都提供應節食品，隨時有意外驚喜，邊個話飛機餐一定係劣食！

文：yuki@港女講旅行

Q1 | 大時大節坐飛機，有冇應節食品？

大部分航空公司的飛機餐都會因應季節更換，有幾何咁神心為新正頭幾日，專誠換個餐單啊？唯獨長榮就好有心思，近年都推出應節餐，大除夕就提供「一品佛跳牆」，飛機餐都有龍蝦、元貝食，超有意頭。香港的港龍都唔輸蝕，最近推出冬季餐單，雖然並非新年限定，但在高空三萬呎都有得食煲仔菜，新正頭仲提供年糕、蘿蔔糕，咁貼地、咁有中國味，一樣收貨！不過呢，以上都是商務、頭等先有的福利，我呢啲坐經濟嘅，諗吓好啦！

Q2 | 無應節餐，有冇小食、小禮物？

坐經濟位的，偶爾都會收到貼心的小禮物。港龍、中國東方航空試過中秋送月餅，港航亦都試過在聖誕派朱古力。至於新正頭幾日，記者去年坐港航，就有包笑口棗送，收到都幾窩心。今年他們就轉送「角仔」，一樣好有過節氣氛。相反港龍往年都有包笑口棗應下節，但聽空姐朋友話今年cut budget，連笑口棗都無埋。

Q3 | 唔食AB餐！仲有冇其他選擇？

大部分航空公司都提供特別餐，在網上Check-in的時候，早一日預約埋就得！好似國泰就有超過廿個菜式，記者坐早機多數會安排水果餐；想食清淡的，仲有素食、低鹽菜式，可以不時轉轉口味。如果坐商務、頭等選擇仲多，冬天坐港龍連煲仔飯都有得食！撞正生日、蜜月的特別日子，某些航空公司好似國泰、港航、大韓等等甚至可以準備埋蛋糕（不過要加錢！）所以，邊個話飛機餐無嘢好揀！