搵贊助？ 問過旅遊記者未？＠杜遊珍

世上沒有免費午餐，只有未搵嗰幾餐，珍珍我縱橫省港澳多年，見過不少喜歡找著數的客，不過都唔及我的旅遊記者朋友咁把炮，閒閒地每個月找人贊助一萬幾千，環遊世界都唔使一個仙。做報紙的記者Ａ話：「只要唔使錢，公司理得你去廈門定英國，咁死人都要搵啦。」每次出Trip，先要搵機票、酒店，以機票最難搵，雜誌記者Ａ一次要搵三張，畀埋攝影師和Model，撞正係長途，更加難過登天，「魚翅航空最H 口H 面，『你去做故仔關我哋咩事？』都講得出，我即刻想答，咁下次你喺地面食飛機餐唔好預我。」另外，法蘭西等歐洲航空亦唧不出一滴血來，中東航空就最疏爽，但記者Ａ就試過搵到中東機，但要在廣州飛歐洲，計埋自己哽的燃稅和包車上廣州的錢和時間，根本得不償失！