飛機嘔吐要知碇 密室臭臭人人驚@杜遊珍
廣告
阿珍年中帶唔少團，大人細路都有機會頭暈身㷫，年中都見過唔少，但嘔到一地都係的Case 屎最惡搞，皆因臭味和嘔吐物會陪足你成程機．．．．．．
出名佛口蛇心的空姐S 就叫我提下團友，機上嘔吐要留意幾點：「首先，向下嘔，唔好向前，亦都唔好向上，唔係前面幾排會賴晒嘢。」乜啲人唔識用嘔吐袋㗎咩？「你都咪講笑，好多人會衝來Gallery 問我囉袋，個口仲要好似就嚟火山爆發咁！好心就快啲去厠所啦，唔好嘔落洗手盆，係馬桶先沖得走㗎！」
她肉緊地再三叮囑，如果真係突然爆嘔，請用雙手遮住口來嘔，雙手你洗到，但嘔到人成身都係點沖涼？「 我都知要嘔真係好難控制，但為他人著想，已經有啲想嘔就請準備好點樣做啦！」阿珍就諗起年前睇Mr Bean 坐飛機，話說坐隔籬的細路嘔落袋內，佢唔知仲攞嚟玩吹袋袋，一手「噗」爆，真係隔住個Mon 都聞到浸味。
