那有一天 我們會出谷唱歌＠杜遊珍
廣告
阿珍上星期收到魚翅航空的茶敍英雄帖，邀請大家見識一位多材多藝的空姐，據講佢唱歌有如出谷黃鶯，更曾是公司女子足球隊成員，阿珍當然唔會放過入魚翅城的機會，聽下歌，踢下波，因為阿珍以為呢個世上，唱得又踢得，只有一位容艾辛，誰知有空姐會一路叮飯，一路唱歌兼踢波，唔知佢會唔會踢個餐去機尾，等阿珍一定食到雞飯呢？
講開唱歌，以前帶大陸團，領隊行家都唱得兩嘴，通常會在所謂「未咪」的時候，即係由最後一個景點到機場、最長時間在車上時，唱下歡樂今宵式的散水歌，當年還會派歌集，等啲團友睇住字幕唱K，肥媽的友誼萬歲、明天會更好，收聽率最高，泰國領隊就最愛國，一定唱國歌，雖然一粒字都聽唔明，但團友大多會畀面附和拍下手，氣氛都幾好㗎！
話時話，原來葉麗儀、張學友等歌星都係前魚翅員工，幾時搞返個校友名曲夜加燭光飛機餐先。
