航班超賣 苦主個案分享 | 地勤：復活節最高危 自保上機記得早check-in
文： B.WAN
什麼是 航班超賣 （Overbooking）？
簡單來講就是航空公司賣出超過航機座位數目的機票，假設全機有100個位，只要航空公司接受101個訂位都已經叫超賣，但超賣並不代表全部確定訂位，有可能是訂位後未付款的。至於點解會超賣？好簡單，一定就是同成本有關，根據業內人士話：「就算要賠償給客人，點都好過浪費1個機位，航空公司會因應每個航班之前的紀錄來評估可以超賣多少個位。」
超賣苦主個案分享：
【案例1】兩人同一Booking 都要被夾硬拆散
苦主L原定同朋友搭乘西南航空由芝加哥直飛去拉斯維加斯，在機場自助check-in時，同行友人成功取得登機證，輪到苦主L之際，卻因為機位已滿所以冇！證！出！
雖然空姐以US$300 coupon利誘自願者讓位，可惜到最後一刻都冇人落疊，苦主L同朋友惟有選擇航空公司另一方案，改坐中途要在西雅圖呆等6小時的轉機航班。不過該航班當時正在登機中，苦主L要秒速跑到遠在另一走道的閘口，當事人憶述：「嗰刻因為幾乎休克要踎喺度，機師見狀問 『Are you OK?』我咪答『No!』囉，點知原來美國的航空條例規定乘客身體有異樣就不能起飛，全機人要等我回氣兼回魂，擾擾攘攘下，最後都連累航班延誤了15分鐘，勁尷尬！」
【案例2】出埋登機證 都一樣冇得飛
話時話，買咗飛冇得飛都未必一定是超賣！話說苦主W某年聖誕由美國麥迪遜機場搭乘聯合航空返香港，（Well，咁啱又係聯合航空囉！）在閘口準備登機之際被通知冇得飛，理由是因為聖誕節大家瘋狂購物，導致行李太重，要減少載客人數來填補！苦主W控訴：「排在前頭2、30人登機後，空姐開始截人龍，之後重新計算可以載幾多人後，先至再讓乘客上機。」冇得飛的苦主W最後在航空公司安排下，在方圓廿里乜都冇的酒店內，1個人度過了難忘的聖誕節！
地勤提醒：越早Check-in 越少機會冇得走
萬一發生超賣，航空公司就需要有客人讓位，地勤人員V話冇一定準則。「當地勤人員被告知航班好大機會超賣，正常情況會逐一向客人查問，當然首選是經濟艙客，萬一冇人舉手，最遲check-in的人就會成為犧牲者，如果可以，最好早點去check-in，特別是復活節得短短幾日，大家都堆在同一時間飛，反而暑假可以攤長來出發，相對情況冇咁嚴重。」對於不幸被選中的人，地勤人員V直言愛莫能助，客人拍枱大罵甚至激動到喊都只能好言安撫。「強國客人反應特別大，有同事甚至在閘口被客打，所以聯合航空事件唔會在香港發生囉！」
賠錢金額一定好so？
始終乘客都是無辜的，航空公司會向「超賣」受影響的客人作出補償，至於賠償金額就要視乎各間公司的做法，有的會以兩班航機相距的鐘數計算，若延誤時間少於2小時，就1蚊都冇得賠，但如果被安排隔1日上機，航空公司便會安排酒店住宿。亦有地勤表示，有時航空公司對自願舉手讓座的客人出手更闊綽，例如免費升級、使用lounge服務甚至提供零用錢，朋友K就試過暑假由香港飛往北海道時，因為貪圖免費upgrade、2千蚊賠償金及來回機場的士費，選擇遲1日出發！旅遊記者B在美國奧蘭多機場等待轉機時，更見識過猶如高價拍賣的場面。「空姐在登機閘口開咪話讓座者可獲US$300，見冇人有反應，之後再將金額逐百美金咁加上去，要不是有訪問在身，我都想舉手呀！」
參加旅行團 團飛都唔一定飛到！
江湖傳聞有長者或小朋友同行，以及參加旅行團都不會被航空公司選中，地勤人員V話其實如果散客冇人肯，航空公司必要時都會嘗試向旅行團團友埋手。目擊者A剛於新年同家人跟團到伊朗旅行，回程在多哈機場等轉機返港時，就見到隔籬另1個香港團的領隊同團友密斟，八卦打聽下，原來該航班超賣需要徵召4位志願者，願意多留1晚就可獲酒店住宿及大約US$160零用作賠償。
