行內人揭密 搭飛機 Upgrade 之秘技＠杜遊珍

飛得多升得多

首先要了解何以會Upgrade呢？原來航空公司經常有超賣的情況，如經濟艙超賣10個位，就要將客人安排到商務艙，甚至是頭等了。那10個位的升級大權基本上就掌握在地勤手上，出名嘴賤的地勤E說：「成日有人喺Counter向我賣口乖，諗住我會Upgrade佢哋，Are you kidding me? 佢連我哋會員都唔係，後面有幾個鑽石同金卡會員，排隊都未到你啦！」阿E話搭得愈多，升級的機會就愈大，會員在生日月、入會周年月等都有此甜頭。地勤亦會揀啲著得光鮮嘅客，好似有啲中東航空公司就專揀著住傳統酋長衫的客來Upgrade，而阿E就堅持佢淨係揀靚仔。

商務艙講彩數

唔係飛行常客的朋友只好長嘆三聲，空姐G話其實唔使愁，因為只要夠運都可以免費坐商務艙，佢就見證過起飛前半小時Check in的客，狼狽上機，反而獲得優待升等；亦試過兩個客上了飛機才發現二人的登機證一模一樣，但位就得一個，結果女士因男士禮讓，而獲得升等。

嗱渣招咪亂學

空姐G亦見證過兩個騎呢Case，有次在澳洲轉內陸機返香港，個客在機場時已聲稱頭暈身㷫，請地勤幫佢安排可以平趟的位，即係商務位啦，在機上，各人亦對佢照顧有加，直到在澳洲過境，當地檢測嚴密，不容病人登機，當局要求客人到醫生處檢查，佢死都唔肯，最後自爆只係扮病搏Upgrade。

可惜海關唔理，堅持要檢查，最後佢要走機兼喺澳洲滯留一天……又有一次，飛倫敦時有經濟艙的客人電視屏幕壞了，他發晒爛渣，不停用湖南口音大鬧，就算畀Voucher都唔肯算數，原來扭計想Upgrade，可惜當日全機滿座，結果佢寫咗三頁紙的投訴信，並獲得一盒朱古力的賠償。空姐G話呢啲客叫做假客，佢哋有晒Record，呢世都唔會Upgrade，所以勸大家唔好博！