英國雨靴 + G-Shock 好抵買! 台北日系Outlet 7大必掃

記者又點會甘於只換新衫，置裝梗要由頭到腳先夠徹底！甫入門口已經大排長龍的Hunter 是全亞洲首間 Outlet ，平時閒閒地過千，依家淨色長靴六百蚊倒有一對，邊度搵！平買G-Shock 手錶、連掃3間運動店和20分鐘速配眼鏡，真係唔可以睇小女人嘅購買力……

01 平買襟興 G-Shock

G-Shock@ 地下南口
G-Shock 一向都是香港人愛戴的運動型手錶，正價近千元港幣，Outlet 一律7折， 買得過！大錶面感覺粗獷，Baby G 的細錶面則較適合女生纖幼手腕，不妨各買一隻組成情侶錶！ 標準跳字和少見的行針款兩者皆備，梗有一款合眼緣！

02 搶眼多色英國雨靴

Hunter@ 地下南口
一直想買對雨靴有備無患，但這英國經典品牌每次減價都賣淨沉實色， 今次在Outlet 竟然大把顏色任揀， 啞面、光面俱備，鮮橙、薄荷綠等春季大熱都有齊，繽紛色彩令人不禁期待雨天的來臨！不過短靴就相對無咁多色，驚喜的是有涼鞋和男裝Loafer 款！

03 淑女皮袋 齊款任試

Kate Spade@ 地下西口
三井Outlet 的戶外區主要賣定位較高的歐美品牌，如Anna Sui、Tommy Hilfiger 等，萬中挑一睇上Kate Spade 的皮包，唔少香港女仔都有用開其長銀包， 壓皮挺身又不易刮花。雖然7折的Outlet 價不及美國代購抵，但減價款式出乎意料地大晒冷，唔似得網購斷色斷貨，即時試上膊仲睇到效果！

04 廿分鐘 配手作眼鏡

Owndays@ 地下北口
今時今日眼鏡的功能已經由矯視變為襯衫，尤其是日本手作眼鏡的細膩手工和多變框架，無論有無近視都爭住買！來自日本的連鎖眼鏡店Owndays 出名廉宜又快手，價格500蚊起跳，配埋度數都只需20分鐘，代理品牌千一作和JunhashimotoEyewear 等都是由日本眼鏡職人親手製作，試落副副都愛不釋手！

05 運動潮飾 尋到寶

運動舖@1樓
運動大牌的定價向來鐵價不二，三井Outlet 便齊集Nike、Adidas 和NewBalance，風褸、背心羽絨、緊身褲等全副武裝大可一站式入手，實地目測款式算新，仔細搵竟然發現熱搶針織Flyknit 波鞋、NB 粉色系996，要買趁手！

06 長期開倉 繼續托煲

Le Creuset@ 地下北口
少婦必敗Le Creuset 無疑是Outlet 另一焦點，店面闊落，顏色選擇豐富，款式尚算齊全，大路琺瑯煲和平底煎鍋等折後價錢等同香港開倉價，勝在唔使搶經已買到，以後掃平煲又多個著落！店長特別推介薰衣草、亮藍和亮粉三隻熱賣色，光身瓦面確實吸引，唔少得花花和心形圖案，正中港女下懷！但粉色系列就只有瓷器廚具無煲款，不妨退而求其次考慮其他色！

07 緊貼日潮日雜小物

Plaza Tokyo@ 地下西口
日本的卡通精品迷倒一眾少女，可惜香港永遠得個「恨」字，直至見到Outlet 裡面的日本潮流選物店Plaza Tokyo，我就知機會嚟啦！毛公仔、妝物以至零食應有盡有，Little Twin Stars 碎粉、Inside Out 出奇蛋、Olaf 玩偶通通超「打耳」，而且平過日本代購，血拼得過！

林口三井Outlet
地址：新北市林口區文化三路一段356號（顯示地圖）
電話：+886-（0）2-2606-8666
營業時間： 星期一至四及星期日11am-9:30pm、星期五至六 11am-10pm
網址：www.mop.com.tw/linkou

如何前往
從台北車站出發，平日每20分鐘就有一班免費接駁巴來往Outlet東口，假日則加密至10分鐘一班，車程35分鐘。來往桃園機場的接駁每2小時才有一班，因此建議乘搭的士，約23分鐘即達。
退稅教學
林口三井Outlet有退稅服務，只要在全商場累積購物滿NT3,000/HK$720即可退回4.7%稅，記住攜同入台證與收據到服務台填表，職員蓋印後出境時搵機場退稅櫃位出示表格，即刻拎得返現金！注意，機場不能直接退的！

儲物Check
若果決定拉住喼直出機場，B1層有行李Size的大儲物櫃，租用每3小時收費NT50/HK$12。
延伸閱讀：
花會無期 台灣黃花陣不復見?!?!
8秒到地! 台南5層滑梯新寵