年初蒲台北 必睇6個人氣動漫展！
重口味虛擬獵殺! （即日至 29/2）
60米高巨人跟足原著製作，舊年去完日本巡遊再進擊台北，憑嘔心鼻毛紅遍兩地，連電影版主角三浦春馬都專程到開幕禮撐場。睇完巨人未夠喉，可玩埋360° 立體劇場「哮」，戴上頭戴式熒幕進入虛擬動畫中，實地參與獵殺巨人攻防戰！
進擊之巨人展
•地點：松山文創園區1號倉庫
•時間：10am – 6pm
•交通：乘捷運於國父紀念館站下車
集齊食玩買!－即日至 6/3
早前《新假期》曾派員直擊蛋黃哥展，發現超多打卡位，包括黃金蛋黃大帝、蛋黃夜市和細路至愛小滑梯，仲捕獲到蛋黃哥在展區內無牌行醫！影完一輪肚餓，可到小食檔買雞蛋糕食，將蛋黃哥生吞活剝！臨走記得買蛋黃酥做手信呀！
蛋黃哥懶得展
•地點：國立台灣科學教育館
•時間：9am-5pm
•交通：乘捷運於士林站下車
食腦解謎王!－即日至 13/3
柯南展最特別係有個「解謎區」，入場後會收到一本偵探手冊，要你拆解兇殺懸案，成功破案才准進入手稿區睇柯南原稿。謎題由經營密室逃脫的「笨蛋工作室」設計，聽聞難度頗高，最少花1小時才可解開。真相只有一個，自認聰明的你快去挑戰！
名偵探柯南20周年展
•地點：華山1914文創園區東二館
•時間：10am-6pm
•交通：乘捷運於忠孝新生站下車
繼續閱讀：唔好錯過鬆弛熊、海賊王同冰雪奇緣展！
熊粉必去!－即日至 20/3
唔講唔知，原來鬆弛熊出過72個主題造型，今次展出其中19個，多數係鬆弛熊狂食甜品如pancake和朱古力，令(港)女粉絲們好想食埋一份。場內還有一 本鬆弛熊電子書，用手掃熒幕即可睇晒熊熊繪本，又幾高科技！
拉拉熊甜蜜時光展
•地點：松山文創園區5號倉庫
•時間：10am-6pm
•交通：乘捷運於國父紀念館站下車
千陽號起航!－即日至 29/3
海賊王15歲生日啦！今次周年展有4 個展區，全是影相打卡位，必影位包括巨型千陽號、1比1海賊團模型和「新世界」冒險場景！好興奮？證明你係超級海賊粉絲，咁記得玩埋問答遊戲喇！不過據講答中無獎。
-8°C 激凍體驗!－即日至 10/4
風靡萬千細路的Frozen仍未有續集，想止癮可先到中正紀念堂睇展覽！展區設計抄足冰雪王國，設有零下8°C 低溫區，去到可玩巨型冰滑梯兼堆雪人！聽聞冰區真心凍，去玩記得著多件衫！
追加！玩到高雄！
行完台北，南下高雄仲有小丸子同海綿寶寶等緊你！兩個展覽都在駁二藝術特區舉辦，小丸子25周年展曾於去年暑假在台北舉辦，第二站移師高雄，上次無睇就記得去喇！隔壁還有海綿寶寶展覽，展區設計抄足動畫場景，在水底世界中可搵到海綿寶寶、章魚哥和蟹老闆等8位主角，一家大細必去！
櫻桃小丸子學園祭: 25周年特展－即日至 5/4
海綿寶寶: 暢遊比奇堡特展－即日至 27/3
