$6.5清蒸沙蟹! 高雄新夜市掃街搵食報告|台灣|
台灣本土Best 4不能錯過！
建工夜市與捷運站相距甚遠，於後驛站再轉巴士才到，雖然不算就腳，但附近就有8間大專及高中院校，後生仔女甚多，勝在無大媽同我迫。每日下午4時後，夜市檔主都會陸續開檔，而晚上7時，更是夜市人潮的高峰期，差不多每檔都有幾層食客圍堵！作為精明吃貨的我，深知胃的Quota 同時間有限，與期盲目排隊逐檔試，倒不如潮跟本地人推介，食勻夜市最地道Best 4啦！
1 日賣7千粒 QQ地瓜球
真好佳日賣7,000粒地瓜球，粒粒金黃鬆脆，內層的地瓜肉混合糯米粉後，口感煙韌，味道香甜，記者一食上癮！攤檔老闆表示地瓜球全部即炸即賣，連炸油都絕不隔夜，難怪炸油金黃清澈。記者出巡當日，真好佳亦是全場最好生意一間，人龍從未減退過，超誇張！
Katherine & Friends：「我們從台北特意過來，排隊30分鐘後，成功買了20包，打算連夜帶回家做手信。這店炸的地瓜球好QQ，加上不油膩，下次會再買。」
2澎湖沙蟹 搶鮮直送
甚少在台灣夜市中，看到有清蒸螃蟹的店，超驚喜！沙蟹來自外島澎湖，體積較小，但勝在肉質緊致，甜度比花蟹更高，而且價錢便宜，NT100/HK$26 已有4隻。
3 大過塊面 鮮炸魷魚
雖然攤檔招牌寫著「沖繩大魷魚」，但其實魷魚全來自高雄港！店員解釋用上沖繩作掛名，只因沿用了當地炸物的方法，先把魷魚用大火炭燒至乾身後，才把原隻魷魚蘸粉漿，能鎖起魷魚汁！大家點餐時，還可選椒鹽或海苔味的調味粉呢！魷魚超大，2人分享最好。
店員Candy：「吃前不妨沾一下我們自家製的蜜糖芥末醬或忌廉醬，好好味㗎！」
4 相機食先 Cute爆龜仙人
龜仙人的真身是雞蛋糕，原本是老闆陳太弄給女兒3點3的甜點，因女兒和她的同學都很喜歡，在家長的鼓勵下首次在夜市擺檔，分別有士多啤梨、綠茶朱古力和奶黃3種口味。
掃街必備 珍珠奶茶
夜市內有數間飲料店，唯獨样樺紅茶有美容奶茶，以六分紅茶、一分普洱、三分鮮奶的配方，混出有咖啡香的珍珠奶茶，當中鮮奶更用上高大牧場的牛奶，口感順滑！
幾廿蚊 食盡過江龍小吃
要在夜市突圍而出並不容易，除了平、靚、正外，引入新奇有趣小食同樣可抓住食客眼球！在建工夜市，竟讓我這個庶民，拎住幾個銅錢，就可食勻異國美食，當中最驚喜就有匈牙利煙囪卷、德國豬手等特色美食！
匈牙利拜師 即製煙囪卷
如果要數記者NO.1 私心推介，必屬「巧朵滋（Kurtos）」的煙囪卷！記者閒逛夜市時，早在街尾聞到街頭的煙囪卷麵包香。原來這種Kurtos 是東歐街頭常見甜點，台灣甚少見到，而3名老闆更遠赴匈牙利，拿著兩盒鳳梨酥向當地店家拜師學藝，NT50/HK$12一個，絕對值得留肚一試！
「匈牙利的Kurtos 較長，皮薄，類似蛋餅皮；捷克的較短，但皮厚，似麵包。」老闆王先生選了後者，先在台中逢甲夜市試水溫，大收旺場後再來高雄開分店，現場所見每個煙囪卷均新鮮出爐，更有6款口味選擇，有鹹有甜，記者最愛原味焦糖，內搽朱古力，香甜鬆化，食完到我想引入香港！
點餐方法：
Step1：先選外皮，設有焦糖、洋葱、Oreo、紫菜、杏仁和肉桂選擇。
Step2： 再選內餡， 有朱古力、綠茶、蛋黃、莓蒜香或芝士等選擇，總有一款你喜歡。
製作過程
高溫炭燒 德國豬腳
夜市開幕時已備受矚目的雷門德國豬腳，一客只賣NT100/HK$24，超抵！雖然價錢平，但老闆製作豬腳過程亦十分嚴謹，於豬後腿中加入花椒、肉桂及胡椒粒等香料燉熟，再放進烤箱烤，以高溫炭迫出油脂，老闆話豬皮出現「恰恰」（即台語微焦的意思）就食得！剛烤好的豬腳呈粉嫩的紅色，記者咬一口，肉汁溢出，脆皮配上蜂蜜芥末更惹味，惟比較多筋，未能啖啖肉。
日本人駐場 人龍章魚燒
大排長龍兼等足半小時的，原來是日本師傅開的章魚燒。師傅來台只有3年，他說在高雄文衡路亦有開日式料理店，每日兩邊走，夜市只賣店中最暢銷的章魚燒和用北海道產男爵薯仔炸成的可樂餅。記者試吃章魚燒，丸子內有紅薑絲、葱花、大大粒八爪魚，炸皮偏軟身，同台灣食開的脆卜卜不同，淋上燒汁後口感豐富！
小食最強 百貨嘥氣
建工夜市面積不算大，約3個足球場的面積，分為美食、百貨和遊戲三大部分，一共500多檔，當中美食佔一半，集中在外圍的建工路。百貨位於中央位置，賣日用品和便服為多，款式似淘寶貨，沒時間可省掉。遊戲區近華德街，單一條巷，預行一夜都夠數。
山寨憤怒鳥 要贏唔難
建工夜市除了是搵食地，還是男朋友趁機大顯身手贏公仔的好場地！場內有數十檔攤位遊戲和一整條巷的夾公仔機，記者向來對夾公仔一竅不通，決定強攻攤位遊戲，竟有超多意外收穫，必玩山寨版Angry Bird，只需在木丫上的彈弓發射出憤怒鳥並擊落6個目標即可。差少少贏大獎？可補錢續玩遊戲，繼續累積分數，所以贏獎有恆心就得。記者目測獎品質素一般般，只得比卡超、Angrybird、奸夫攬枕等，不過勝在好玩過癮又易拎獎，你睇個個女朋友都左擁右抱一堆公仔就知啦！
建工夜市
地址：高雄市三民區建工路501號 （顯示地圖）
營業時間：星期一至日4pm-12mn（星期二和四休息）
交通： 乘捷運至後驛站，轉搭乘巴士30號至大順路口下車，再步行1分鐘即達。
延伸閱讀：
台中必食招財貓冰! 文青推介4大懷舊餐廳 |台灣|
西門町掃韓裝! 台灣首個韓系商場 |台北|
有到日本旅遊前要了解的實用資料嗎？
日本是香港人最愛的兩大旅遊地點，去旅行前必看5大旅遊保險保障新冠肺炎的比較，另外為你推介日本10大好用電話卡，亦可參考日本8大Wifi蛋推介。當然亦要事先了解日本地區天氣、電壓、電源插頭、入境簽證要求及大使館電話。
