Slide The City啟德跣一鑊玩家3大要點你要知！

Jun 3 2015

全港首次Slide The City，大家期待已久想知喺邊度有得瀡！今日6月3號公佈，香港首次舉行取道啟德碼頭，購票詳情亦已公佈。早前已登記的人士，經抽籤會得到早鳥門票預售名額，中籤者於6月初收到電郵通知（連預售都要抽籤睇彩數-_-）

要點一：票價

8-17/6早鳥價－無限瀡$420、瀡一次$120、瀡三次$280
22/6後正價－無限瀡$480、瀡一次$150、瀡三次$320

早鳥價與正價相差$60，所以編輯部相信6月8日早上購票的網上系統應該會出現塞車情況，大家最好準備多幾部電腦搶票。至於買一次瀡、三次瀡還是無限瀡呢？就要看你的爛玩程度，純粹過癮的相信一次便夠，至於「三次瀡」應該是最快搶晒的票價，因為一次又唔夠喉，無限瀡又應該玩唔得好多次，點解？以外國舉辦的經驗為例，瀡之前一般都要排隊一至數小時不等，假設你瀡三次，實際花上的時間估計要5小時；至於無限瀡（日間無限瀡：10am-6pm、晚間無限瀡：5pm-10pm）最多只得8小時，即是三次瀡及無限瀡相差可能只是一至兩次，再者如果日間瀡，在烈日當空下又會削弱大家排隊的戰意，所以究竟買哪一個最抵？真的視乎大家體質而定。

8月下旬的正式版會有千呎長命斜，每日2萬加侖水由頭跣到尾。見票價包括口腔保護器，可見有一定危險性，故8歲、1.16m以下小童恕不招待。