Secret Garden 減壓良方！8大洗版治癒填色冊+網頁Apps
填色冊風頭躉 《 Secret Garden 》
英國女插畫家Johanna Basford嘅《 Secret Garden 》，2013年喺倫敦出版，以花園為主題，所以有一大堆密密麻麻、得線條無顏色嘅花海、樹木同蝴蝶等。由於構圖優美，簡單填色唔出界都已經好有效果，普通人輕輕鬆鬆填都得，所以大受歡迎，Amazon網路書店居於暢銷榜榜首，香港書店同網站亦都曾經賣斷市，其實…要搶呢本填色冊都好大壓力囉！
銷售點：三聯書店
俾《Secret Garden》挑起咗你嘅填色癮？並且不能自拔？我哋依家就介紹8種 填色 方法俾大家！當中有要使錢嘅，亦都有免費嘅，豐儉由人，無論富或貧，都一樣可以玩填色！
1. 打開時間魔法之門 《時間的旅程》
呢本填色故事書係由韓國插畫師宋知惠執筆，係講一個少女因為一座古董鐘而進入咗錯置嘅時空，步上咗時間的旅程…嘩！個故仔真係充滿少女風！書入面有好多歐陸式建築物同風景，好有異國風情，啱晒一班大浪漫主義嘅妹豬。
銷售點：商務印書館
2. 一面油一面流口水 《美味時光》
如果油花花草草油到厭，唔緊要！其實市面上有仲有填色冊係用食有關！呢本《美味時光》聲稱係第一本以美食為主題嘅舒壓著色書，作者係韓國嘅紅鯨魚，書入面又漢堡又蛋糕又曲奇餅、我哋建議大家千祈唔好夜麻麻嘅時候油，因為…餓到要食宵夜就唔係咁好啦！
銷售點：商務印書館
3. 油完仲可以摺埋 《畫張色紙送給他》
呢本《畫張色紙送給他》係一本填色冊 + 填色紙，每張紙嘅底面有一樣嘅圖案，但就一面有顏色，一面無填色，勤力嘅，可以當係一本填色冊咁油晒佢，懶起上嚟，又可以撕一張出嚟摺下紙鶴、紙船，實行一次過滿足兩個願望！
銷售點：誠品書店
如果唔想買填色冊，亦都可以上網download 填色紙，一樣可以油得開心！以下就介紹可以免費下載填色紙嘅網站，click個print制，等陣油又到立刻油都得，得咗！
4. 俾啲顏色阿愁睇 《玩轉腦朋友》 填色紙
呢期Pixar嘅5個腦朋友紅爆，阿愁更憑住日日苦瓜乾咁嘅樣跑出，咁hit！一定要俾啲顏色佢睇！呢個網就可以download到幾位腦朋友嘅填色紙，但暫時未有五個腦朋友嘅大合照就愁咗啲囉。
下載連結：http://movies.disney.co.uk/inside-out/activities
5. 迪士尼朋友任你油
雖然Disney Junior係走細路哥路線，但係呢個Print and Colour嘅部分都見到好多童年熟悉嘅朋友！包括Mickey & Minnie、Winnie the Pooh、Toy Story巴斯同胡迪，童心未泯嘅朋友可以print嚟玩下。
下載連結：http://www.disney.co.uk/disney-junior/content/print-and-colour.jsp
如果閣下唔想買書、亦都唔想print 填色紙，都可以試下以下介紹嘅免費填色 Apps，搭緊車、食緊飯、甚至開緊會(首先，你要有一個明白事理嘅老細)都可以玩，邪惡到爆。
6. 任油多款大熱圖案 Colorfy
Colorfy圖案種類選擇多，有花卉、動物、名畫、曼陀羅等多種選擇，上色方法好簡單，一點選空白位就會自動填滿，不過顏色就只有27種基本色彩，想要多幾種色就要買啦。
7. 170色任用 ColorMe
如果鍾意Colourful啲，亦可以揀ColourMe，同樣都係有花卉、動物、等大路款式，都係一點就填滿，有成170種色揀，可以慢慢諗點襯色。
8. 大師級數字油畫 Querkles
Querkles 嘅概念有啲似數字油畫，只要跟住數目字上色就可以畫到大師級名畫同經典名人，但免費試用作品只有一張瑪麗蓮夢露頭像，顏色可以自選，不過上色就係一下一下上，唔係一點就填滿，易填出界，要相當有耐性，暫時只得iOS有。
下載連結：iOS
延伸閱讀
《 四個小生去旅行》第一集 5大之最
5大零失敗月餅班 潮語紫薯無得輸！
新假期周刊 電子書：
ios：https://itunes.apple.com/hk/app/xin-jia-qi-zhou-kan/id722179449?mt=8
Android：https://play.google.com/store/apps/details?id=com.weekendhk.newsstand2&hl=zh_HK
新假期食玩報料：[email protected]
歡迎Instagram / facebook 使用#weekendhk 報料，資料一經選中會為你公告天下！
