兩個人想要維持一段好嘅關係，真係唔容易 《 春嬌救志明 》@藍橘子

「春嬌個樣越來越唔青春又唔嬌，反而Fishman幾型棍……」
「我剩係覺得好感動。」
「結尾有啲夾硬，同上集一樣唱首歌就搞掂。反而我對屹屹剛個故事幾有興趣。」
「但最後春嬌打救咗張志明，好感動！」
「我剩係聽到打鳩佢……」

之後，女朋友搖一搖我手臂。

「不如呢，我哋以後鬧少啲交？」
「吓！我哋不嬲都好少鬧交喎。」
「其實有時我發脾氣，發到連自己都覺得自己好煩……」

我當下心諗，咁你又發？

有時我覺得女朋友有人格分裂，發脾氣時1個性格，發完脾氣之後，佢又會同我say sorry……話頭先一時火起，冇心發我脾氣。

「點解你會無啦啦咁講？關套戲咩事？放心啦～我平時放狗，樓下得班阿嬸跑步……」

女朋友話，成套戲最有共鳴嘅1句，就係：「兩個人想要維持一段好嘅關係，真係唔容易。」

志明話，唔想因為做少咗某啲嘢，或做多咗某啲嘢而令大家唔開心。其實要維繫關係，話難唔難，但雙方都需要行多一步。

春嬌多疑，一方面質疑志明唔認真對待呢段關係。但同時，又質疑自己係咪真係愛志明。所以佢喺屋企嘗試自殺，佢想腦海裏面諗嗰個，係張志明。

女人鍾意質疑，因為佢驚失去身邊嘅張志明。
可能你會覺得春嬌好麻煩，甚至有好多人都試過因為呢個原因而分手。

不過，你錯過咗一班車，可以等下一班。
香煙加價可以索性戒煙。
買咗無謂嘢，就夾硬將佢變成指公環。
但若果你唔肯為呢段關係做多一步，你錯過咗，好可能就係一世。

講番成套戲，起初好驚又係互相出軌原諒再出軌，幸好最後都係講番春嬌同志明兩個人嘅關係。如果計番真實時間，春嬌同志明都一齊咗8年……

原來一段關係，即使一齊時間耐咗，即使好了解對方，都唔會變得簡單。