回顧《阿笨與阿占》10條搞笑溫馨片段
廣告
一講起《阿笨與阿占》，基本上身邊所有人都知道佢哋係邊個。阿笨同阿占帶俾我哋好多歡樂，每次提起都會諗返起佢哋喺節目裏面搞笑嘅片段。早前有消息話阿笨生咗個囡嘅時候，就有好多人問起阿占嘅近況，大家都仲係好關心阿笨同阿占。知道阿占喺8號離世之後，好多節目嘅fans都留言悼念又重溫當年片段，懷緬一番。以下，我哋為大家搵咗10條《阿笨與阿占》搞笑溫馨片段。
搞笑篇：
阿笨同阿占可以話係一對活寶，佢哋有時唔覺意做出嚟嘅動作真係又鬼馬又好笑。
1. Sit-up大鬥法
猩猩同人做sit-up都唔夠睇頭，節目比阿占做sit-up，加埋佢個表情，真係心情幾差都會即刻笑返～
2. 纜車忘我自娛（05：12－05：50）
你話人生有幾可會見到一隻猩猩喺纜車內跳來跳去，揈下揈下先，面對阿笨，阿占真係好淡定。
3. 阿笨化身攝影師（03：33）
唔睇唔知，原來阿笨影相都幾叻。um…除咗有時影到阿占得返一半入鏡之外～
4. 扮貞子
阿笨太搞笑啦，雖然好聰明，扮得幾似樣，但最後一刻佢自己揭開咗個假髮！
5. 阿笨與阿占…的5隻狗bb
巧打耳～好巧打耳啊！阿占啲bb好可愛啊！負責照顧佢哋嘅阿笨都抵擋唔住啦～
溫馨篇
阿笨同阿占呢對活寶除咗搞笑之外，仲成日喺節目當中流露真感情，真溫馨，有一集講阿笨送搬屋走嘅婆婆真係會睇到眼濕濕～
1. 送走一直好照顧阿笨嘅婆婆
阿笨為咗整禮物比婆婆，遲咗去搵婆婆，見到佢追車嗰吓真係心酸。好彩婆婆開返車搵佢，佢同婆婆相擁嗰吓太溫馨太感動啦～
2. 勇敢的阿占（05：21－8：41）
兄弟情真係會一日比一日深，當阿笨幫阿占打完水，見到條蛇不知所措嘅時候，阿占衝出來勇叼條蛇走！好man啊！阿笨仲鍚咗阿占一啖！
3. 幫爺爺送便當（13：03－14：36）
第1集第1個任務就係送便當俾爺爺，當阿笨扑去同爺爺相擁嘅時候，溫馨感爆燈！
4. 分享是美德（02：50－6：02）
好乖啊～阿笨千辛萬苦終於都開到嘅波子汽水，因為阿占想飲就立刻同佢分享，果然係好兄弟！
5. 與宮澤先生深情擁抱（08：37－10：01）
每次見到阿笨阿占返到屋企同宮澤先生深情擁抱嗰時，嗰種溫馨感真係難以言語啊～
