亞視真的byebye了!! 難忘ATV的9件大事
威水史
1. 超級經典！我和殭屍有個約會
原諒我當天不懂得珍惜只知任性♫ ♪ ♬ 一聽到呢首歌，就知夠鐘播我和殭屍有個約會喇！筆者到今時今日都仲記得點唱呀，有冇人都同我一樣呀？呢套劇唔單止係亞視劇集中頂級作品之一，可以續集完再續集，來到2016年有消息指，外國的Fox Asia有意開拍《我和殭屍有個約會》外國版本，真係亞視嘅威水史，可惜亞視喺呢一日來臨前捱唔住，要同香港人講Bye Bye。
雖然套劇大受好評，不過都有被批評地方，好似呢輯大結局，況天佑嘅變身就被指抄《幽遊白書》中浦飯幽助嘅造型。
2. 超越大台收視！百萬富翁
100萬嘅問題、打電話問朋友、最後答案，呢d經典台詞到而家都仲會成日講，當年收視仲威脅到無綫，令佢哋都即刻推出一筆out消嚟抗衡亞視，所以百萬富翁絕對係亞視嘅一大經典！
3. 突破保守電視尺度 － 活色生香
80年代亞視不時推出清談節目，當中活色生香以男性興趣為節目主題，內容包括消遣地方（酒吧、夜總會）、汽車、風水、攝影、女性及性知識等。最前衛之處在於當時社會相對地較為保守，竟然有一個電視節目大膽地公開談論呢個題材，牽起社會熱話。
4. 巨星坐鎮，無所不談－今夜不設房
當 年已經是出位才子的黃霑、倪匡、蔡瀾，由佢哋主持嘅節目已經好爆，不時談及個人感情生活…甚至性生活，更爆嘅係節目每集都會邀請嘉賓一齊傾，當中不乏是巨星級藝人，例如周潤發、張國榮、成龍、劉嘉玲等，連巨星都一樣夠膽傾呢D題材，點會唔震撼10億人！（當時人口應該係咁上下掛…）
爆瘀史
4. 誤報前國家主席江澤民病逝
2011年亞視於6點半新聞中，率先報導前國家主席江澤民嘅死訊，並準備推出相關的特備節目以示哀悼。不過，當時其他媒體均未得到確定的消息，後來新華社發出澄清報導，指江澤民並未離世。兩個月後，當時任職亞視新聞部高級副總裁的梁家榮請辭。
5. 台慶logo似死字
呢個本來係賀台慶嘅logo被網民取笑設計似死字，寓意亞視會喺56周年執笠，不過都已經係2013年嘅事，都叫做挨多咗幾年。不過話時話，呢個圖睇睇下，56的右邊個忽都似有9字，56周年無Bye Bye都出唔到59年吖。
6. 被逼Happy Birthday to ME~~~
2004年中AC米蘭球隊訪港，順道出席亞視台慶節目，當中同日生日的球員岩布仙尼被主持朱慧珊要求一齊唱生日歌，壽星仔岩布仙尼唯有面朦朦咁唱~~~Happy Birthday to me! 壽星仔要唱俾自己聽，真尷尬！
事件令早前舉行勁曲金曲頒獎禮嘅100毛，都借事件講下笑。
7. 台慶壽桃送俾台下的空櫈
話說早幾年亞視喺北京舉行台慶晚會，全場超過三小時。由於節目較為冗長，去到後期現場觀眾都走得七七八八，就在此刻，經典位嚟喇！完場前嘅祝酒及拋壽桃環節，鏡頭拍到台上藝員不斷將壽桃拋到台下嘅空櫈，雖然台下無人接，但藝員依然交足戲拋得異常高興，專業！
＊由於上面片段長達3小時，想睇壽桃一環，請自行挑到片段最後兩分鐘
經典歷史
8. 不設年齡上限的亞姐選美
過往的選美活動都有年齡限制，不能太細亦不能太老。不過喺1995年，亞視再一次突破界限，推出無年齡上限嘅亞姐競選，除咗吸引當時年齡不足16歲嘅佳麗陶安仁，最爆的就係有全場年紀最大、報稱當時47歲嘅宮雪花參加，搶盡同期選美界嘅焦點。
9. 播極都未入肉嘅《羅茲威爾》解剖片段
同樣是1995年，繼無年齡上限亞姐之後，亞視緊接住買咗一段解剖外星人片段，並且安排喺黃金時段嘅《今日睇真D》內播出。當時消息一出，的確轟動全港。由於當年影音器材無現時咁方便先進，好多人真係一收工就飛車返屋企等睇特輯。當時亞視經過精密計劃之後，將短短幾分鐘嘅片段，分5日於節目內播出，並且製作好多附加嘅訪問。製作方法一時佳話，令觀眾驚嘆亞視高明嘅拖延戰術！
