Miffy登陸銅鑼灣! 8款得意精品+2大影相位逐個睇|銅鑼灣好去處|

Mar 23 2016

來自荷蘭的白色兔兔Miffy來到香港同大家見面！今次Miffy除了同屋企人過來香港同大家聚一聚，仲帶埋一班動物朋友仔一齊來過復活節。即刻同大家直擊Miffy登陸銅鑼灣實況，介紹返8款得意精品，再介紹埋同Miffy合照嘅2大影相位！

8款得意精品逐件睇！

今次Miffy來到香港會有pop-up store，入面會有可愛Miffy公仔、精品和小食。其中，入面有7款精品仲要係香港獨家發售，香港愛Miffy的朋友們可以趁機會集齊精品啦！另外，亦有得買來自世界各地的Miffy精品，我就鍾意Miffy一班動物朋友嘅公仔，你地又鍾意邊款呢？

小食類：

1. Miffy雪條！影相呃Like又好味！

Miffy雪條總共有4款口味，芝士蛋糕、草莓乳酪、楊枝甘露和雙重朱古力。記者試食了芝士蛋糕味，奶味夠濃，芝士味都幾香，重點係造型勁得意，可以同Miffy擺設影相呢！Miffy雪條即日新鮮製造，每日共限量發售100支，每次只限購買兩支㗎咋！

2. 人氣甜品店蝴蝶酥！食完仲有靚靚鐵罐留念

Miffy蝴蝶酥由本地甜品店小甜谷主理，每日新鮮出爐，入口都幾香脆，而且又有兩款靚靚Miffy鐵罐可以用來裝嘢，夠晒實用！

公仔類：

3. 笨笨的復活蛋造型Miffy！

Miffy復活蛋造型毛公仔，都有點重量，因為蛋殻部分入面裝左豆豆，唔係全隻都係綿花。見住佢呆呆的坐住隻黃色復活蛋，大朋友小朋友都想擁有佢啊！

4. 趣怪表情Miffy公仔球

Miffy迷你毛公仔套裝，一盒三款，每隻都有趣怪表情造型，得意又抵死！

文具類：

5. 帶住Miffy繪畫圍裙做個藝文青

Miffy繪畫圍裙有兩款顏色，藍色和橙色，鍾意畫畫的朋友，就可以帶住Miffy圍裙畫畫，不過，個人認為用作廚房圍裙烹調美食都不錯喔！

6. 用毛毛Miffy畫簿繪出藝術大作

就算唔用來畫畫，呢本Miffy毛茸茸筆記本都可以用來記下筆記，或者自己畫格仔做Schedule Book都幾好！而且，封面有層毛毛，摸上手都幾滑。唯一不好的是白色就有機會易變黑了。

家品類：

7. 露營都啱用！日系Miffy木製杯

Miffy木製杯，有兩款Miffy & Friends精緻木製杯，櫸木杯身刻上可愛的Miffy樣子，而且木製杯有日系簡約感覺，亦都幾輕身，用來喝茶也不錯的！3月24日開始接受預訂，4月1日起現貨發售。

同場加映：超得意Miffy動物朋友仔

Miffy的一班動物朋友，馬騮仔、大象、長頸鹿和烏龜真係好得意！買完又可以同埋大型擺設影相，正！

The Miffy Shop
地址：香港銅鑼灣軒尼詩道500號希慎廣場地面啓超道入口（顯示地圖）
營業時間：星期日至四：11:00-21:00；星期五、六及公眾假期前夕：11:00-22:00

難得Miffy由荷蘭來到香港與大家見面，當然要抱抱Miffy，影相影夠本！想尋找Miffy蹤影，主要可以去2個地方，分別有位於希慎廣場一樓中庭和利舞臺地面露天廣場。即刻介紹有邊啲特別影相位。

全港最齊Miffy & Friends擺設！利舞臺地面露天廣場

利舞臺地面有齊晒8位Miffy & Friends，包括Miffy、Poppy、Grunty、Boris、Barbara、Melanie、Dan及Snuffy，仲有大約4米高的Miffy與大象擺設，大象超可愛的！係全港最齊Miffy & Friends裝置，可以一次過認識埋Miffy的朋友仔啦！

Miffy & Friends
地址︰銅鑼灣波斯富街99號利舞臺地面露天廣場（顯示地圖）

3D投影藝術畫作！Miffy繪本屋

Miffy今次帶埋屋企人來港，有Father bunny、Mother bunny、Boris、Melanie及Snuffy，大家可以去抱抱Miffy家族啦！不過，呢度最特別係有個3D投影幕牆，大家可以係繪本封面和封底，幫Miffy整個新造型，就可以投影係The Miffy House幕牆，幾隻Miffy著住你為佢設計的造型走來走去，幾過癮！

The Miffy House 3D繪本屋詳情：
2016年3月24日至4月24日期間，顧客即日於Hysan Place、利舞臺、禮頓中心或希慎道壹號I.T HYSAN ONE憑電子貨幣消費滿港幣$50，即可進入「The Miffy House」(最多2人同行)及獲贈Miffy繪本封面乙份。每日數量有限，先到先得，換完即止。

The Miffy House
地址：香港銅鑼灣軒尼詩道500號希慎廣場一樓中庭（顯示地圖）
營業時間：星期一至日：12:00-22:00