情人節好去處 中環2.5萬朵浪漫花海
廣告
大家心目中嘅浪漫情人節係點架呢？有無諗過可以喺一片花海之中同男/女朋友過情人節？喺香港好似好難咁…但其實～唔難！因為前年製作東大門白玫瑰燈海嘅韓國團隊，決定搞全球巡迴展覽。今年2月14號，第一站將會飛到香港，舉辦玫瑰花海展覽「Light Rose Garden玫瑰燈海園-香港站」。仲計劃下點樣過情人節，就要記低呢個最佳「放閃」地方啦。
展覽將會喺情人節當日開始開放，每晚6時至11時玫瑰花就會亮燈。展期分為兩個階段，橫跨中式及西式情人節，首階段(2月14至16日)將會配上維港夜景，喺中西區海濱長廊擺放，第二階段(2月20至22日)就喺添馬公園展出，以中環高樓大廈的繁華景色作背景。花海「遷徙」期間(2月17至19日)會繼續局部開放，但大家要留意如果落雨，花海將會暫停亮燈。
今次展覽有別於東大門果一個 ～ 團隊多次來港視察中西區海濱長廊受及添馬公園，考慮地形環景先設計今次嘅花海。花海將會由約25,000朵LED白玫瑰組成，分別有70cm及80cm高，加上香港出名嘅夜景，大家一定影到張靚相！
除咗可以到中環親身欣賞花海，仲可以將「Light Rose」玫瑰感應燈帶番屋企。限量5000朵嘅玫瑰感應燈全人手嵌製，有blow-to-glow(吹氣發光)裝置，即係輕輕一吹朵玫瑰，就會慢慢著燈～有興趣嘅朋友就可以由今日開始上呢度預訂，每支$100，部分收益將撥捐香港公平貿易聯盟，支持公平貿易的公眾教育工作同時可以做善事～
不少名人都參與咗今次嘅展覽，仲拎住「Light Rose」影咗輯相，講自己嘅愛的故事！
