大學畢業賀禮要夠爆?! 送生菜花出位兼環保

你有無諗過送蔬菜花束呢?! 比起送鮮花有創意，又平過送公仔同氣球，可以一試！最近喺網上見到中大農業發展組推出預訂，同學可以訂購蔬菜花束，喺逸夫Photo Day當日送畀畢業生。Idea夠新，價錢又平，所以預訂十分之受歡迎，名額喺預購第一日已經滿曬。

經查詢後，中大農業發展組話逸夫預訂已經截咗單啦，暫時唔會提供加訂。但好消息係佢哋討論緊會唔會推出聯合Photo Day嘅訂購，咁大家就真係要密切留意一下佢哋個Page啦！

其實蔬菜花束所用嘅蔬菜亦豐儉由人，常用有西蘭花、椰菜花、紅蘿蔔及燈籠椒，已經夠Colorful，夠哂靚，價錢實惠，唔浪費，仲可以食番，一舉好多個得！大家仲記唔記得喺肥媽節目都有出現過蔬菜花呢？！呢一束就加咗白色士多啤梨，係貴價之選～～～

近幾年情人節，網上都時不時都會出現自家創作嘅蔬菜花束圖，有網民覺得騎呢，講笑話「女朋友收到會唔會即刻講分手」，但亦有好多人讚有創意，同時又環保，建議可以拎番屋企，用蔬菜煮餐燭光晚餐。

睇嚟動手Diy都係個唔錯嘅選擇，所以就搵咗一個外國教學畀大家參考下！
首先，準備好材料，再將所有材料分成小份，每一份都要細細粒。

第二，用鐵線串起材料。

第三，將一支支鐵線紮埋一齊，記住要有美感呀～

第四，將多餘鐵線同花莖切走。

最後，另外用鐵線將花束紮實，進行定型。

呢束花簡直係有新意，夠體面。一句講哂～其實只要有心思，送咩禮物又有咩所謂！
延伸閱讀：
台灣真人版小丸子! 汪東城做花輪?! 齊來預選香港真人版
里安納度都集佢郵! 精靈可愛9歲爆紅童星Jacob BB