解構韓國仁川機場過夜 13項設施全攻略！｜ 首爾凌晨機 窮遊指南
仁川機場過夜 安睡設施一覽！
大部分首爾往返香港的凌晨航班，都需要在機場逗留數小時才可以離開，有數個小時又想睡覺，唔熟悉仁川機場唔緊要，即刻記低以下瞓機場要點！
#01｜超人氣 SPA ON AIR
位於仁川機場B1層的SPA ON AIR今年3月完成裝修重開，依舊人氣爆燈。SPA ON AIR其實是汗蒸幕，有洗澡、休息的空間，夜晚入住每位₩20,000/約HK$140；怕身水身汗可以先在這邊沖個涼，亦有提供單人房，但要提早到達！如果撞正旺季，記者12點到已經冇位，所以想使用的遊客，就要提早到機場。
SPA ON AIR
地址：仁川機場大廳B1
#02｜最舒適 膠囊酒店
膠囊酒店「閣樓．休」剛於2017年1月開幕，提供4種房型（單人房、雙人房、含衛浴），需要使用的旅客要到網頁預約，避免沒有房間入住！過夜價格由₩56,000/約HK$392起，雖然價格不算便宜但可以唞足精神去玩！
閣樓．休
地址：仁川國際機場交通中心1樓
網址：www.walkerhill.com/darakhyu/hub/en/
#03｜窮遊極致 免費長櫈
一蚊都唔想畀，淨係想捱過幾個鐘出去玩，強烈建議慳家旅客可以瞓長凳；仁川機場不論出境還是入境層都有不少木製長凳，出境層更有部分鋪好軟墊（只有十餘張！），要瞓機場記緊要帶多件外套！長凳附近更有充電位置。
#04｜難搵但梳乎 按摩椅（限出境禁區旅客）
仁川機場有提供按摩椅，但全部都在禁區內！所以只有離境旅客才可以用得到這項設施，而且位置不容易找到！只有在閘口 43 和離境東西大堂有提供，而且只有極少按摩椅，要用的旅客可能需要提早 check-in 入禁區！
仁川機場過夜 凌晨機有涼沖好輕鬆！
凌晨機最怕就係無涼沖，第二日要臭住返香港或者臭住出去玩。但仁川機場的沖涼設施只有在禁區內，凌晨機的旅客就只能去 SPA ON AIR 沖涼。
#05｜免費洗澡設施（限出境禁區旅客）
只有禁區內有免費沖涼設施，而且時間是7am-10pm，凌晨機旅客就不能使用了。這項設施原為轉機旅客而準備，當然離境旅客也可以使用，位置在 Gate 20 及 Gate 40 附近，只要出示登機證即可！
仁川機場 其他便利設施！
仁川機場除了有不少方便凌晨機旅客的設施之外，還有不少供旅客使用的便利設施，雖然未必個個用得著，但勝在不少總有機會早到機場而用到！
#06｜免費上網 Cafe
突然間去到機場想用打印機又或者上網，可以使用到1/F的上網 Cafe；禁區內都有上網 Cafe，但營業時間由8am-10pm，並不是24小時！雖然可以用電腦免費上網，但用到打印機就要付費了。
#07｜免費穿梭車
穿梭車就只限由機鐵搭到入境層，一般人較少乘搭，但其實這項服務是免費的！如果提著太多行李又見到以下這輛車，可以坐到入境層！就唔使推住行李橫越兩個航廈。
#08｜$0！幫你包行李
打包行李是仁川機場的新服務，位於機鐵站內，機器用保鮮紙打包成件行李，以防在運送過程中弄濕行李；如果有非常多免稅品的旅客就不宜打包了，因為有機會需要拆開來讓海關人員檢查。
#09｜郵局、藥房通通都有
去到機場最怕無郵局寄最後的明信片，郵局營業時間是9am-4pm，想寄明信片就記緊要在市區買定郵票，可以寫好再去機場郵筒寄！在仁川機場作病都不怕沒藥房，連醫療室都有！如果想美甲、剪頭髮都可以在仁川機場做到。
#10｜磅定行李先上機
行李磅對一眾廉航旅客非常重要，皆因超重都會罰錢！仁川機場同樣有貼心服務，提供行李磅在不同的 Check-in 櫃枱附近，磅完超重再 pack 行李先 check-in，唔怕罰錢！
#11｜行李直送市區/機場
韓國觀光公社合作單位 Safex 提供首爾行李寄送及存放服務，行李寄送服務由₩7,000/HK$49起跳，由酒店送到機場則要₩14,000/HK$98。
飲食篇！仁川機場過夜 肚餓食咩好？
凌晨落機或上機前肚餓，究竟可以食咩？ 仁川機場個 Food Court並非 24 小時的，所以旅客搭凌晨機想醫肚，可以考慮最方便的便利店又或者快餐店！
#12｜即刻搵食！CU便利店
不論是出境層還是入境層都有CU便利店，全部都有飲品、零食售賣，入境旅客亦可以在便利店買到電話卡、T-money 等，凌晨機到達不妨預足時間買電話卡交通卡，離境旅客就在便利店作最後衝刺吧！
#13｜食韓版漢堡 Lotteria
日本韓國都有的快餐店 Lotteria，在機場竟然有2 間 24小時分店！分別在入境層1/F，出境層 3/F，禁區 Gate 119 及 Gate 10 附近，Lotteria 的漢堡包款式非常多，可以一戰！
交通篇！唔過夜，直出機場交通教學！
搭得凌晨機，又唔想喺機場等足一晚，都有交通工具往返市區！以下就有 3 大 凌晨仁川機場往返方法，大家以後就唔使在機場呆等，可以出去市區搵嘢玩啦！
機場凌晨交通#01｜的士
普通的士最多可坐4人，不過放埋行李，隨時逼到爆；如果行李太多，3人以上建議由酒店安排Jumbo Taxi（要預約），由明洞至機場約需1小時，車程較快。價錢約₩90,000/HK$623，人均約$156。
機場凌晨交通#02｜深宵機場巴士（往機場）
首爾站及江南高速巴士客運站開出的通宵巴士，現時班次已經比過往加密，但亦要密切留意時間表，錯過就有排等！車程約70分鐘，價錢最抵，一人只要₩9,000/HK$62。
| 首爾站出發（N6001） | 22:55｜23:45｜00:40｜01:35｜02:25｜03:20 |
| 江南高速巴士客運站（N6000） | 22:30｜23:20｜00:10｜01:10｜02:00｜02:50 |
深夜機場巴士（往市區）
機場巴士又怎會單向前往機場而無去市區？同樣有前往首爾站以及高速巴士客運站的深宵機場巴士，如果在首爾站附近下車可以選擇前往「汗蒸幕」度過一晚，或者直情預訂附近酒店！
| 前往首爾站（N6001） | 00:15｜01:05｜02:00｜02:55｜03:45｜04:40 |
| 前往江南高速巴士客運站（N6000） | 23:50｜00:40｜01:30｜02:30｜03:20｜04:10 |
機場凌晨交通#03｜預約包車
私人包車價錢較貴，比較適合一大班朋友預約。記者經 KKday 搜索，由 HK$431起，視乎人數及車型，最多可坐 7 人；記者亦建議透過駐韓港人Blogger Patc 遊走泡菜國 安排，價錢介乎於$648-$798，視乎人數，5/9/12人車都可以安排。
