廉航首爾航空 $200單程飛首爾｜記者實測 6大優點：靚時間、包行李、有飲品
文：Kassidy ｜圖：Fion
首爾航空突劈 $200單程飛首爾
記者於 首爾航空 臉書見到最近又做優惠，$200起就買到單程去，來回連稅只要$850起，出發日期由9月1日至9月20日，可以趁暑假後平飛首爾，非常抵玩，不過價錢未包寄艙行李，只包1件10KG手提行李。若想買埋行李，揀選優惠票價「Discount Fare」，平過另加行李，埋單大約$1,600就有交易，已包15kg寄艙行李。
首爾航空優劣位01｜凌晨機去 時間靚仔
首爾航空的航班時間非常靚仔，去程是凌晨機，朝早6點到埗，可以全日玩盡首爾；回程則是夜晚8點鐘，在機場食埋個晚飯先上機，返到香港11點鬆啲，攞埋行李唔使趕尾班車又唔使焗搭的士！
首爾航空時間表：
| 香港－仁川 | 00:50 – 05:30 |
| 仁川－香港 | 20:10 – 23:00 |
記者試搭的去程是首航第2日，唔算多客，同機見到有香港旅行團搭。回程相對較full，也見到有不少韓國大媽上機，接近滿座但尚算寧靜。來回兩程都會在飛到高空燈光會調暗，可以在飛機上瞓餐飽，唔會勁sell你買免稅品或食物，瞓醒一落機就去玩（FF，其實我去做嘢-_-）！
02｜機場加購行李抵啲
首爾航空的票價包1件15公斤寄艙行李，講真15kg一定唔夠，尤其是冬天！網頁上寫住如果要加買行李，一買就要買多件15公斤，每件₩60,000/HK$420，出發前仲以為一定要分開兩件寄，但實測發現係唔使嘅！
記者回程時行李約22kg，諗住去到機場追加行李，去到機場先發現，凡是行李在15-23公斤範圍以內，只要額外付₩40,000/HK$280就可以！想一件過拎返香港，直接在機場畀錢仲抵過上網加購。
03｜手提行李10公斤 行李架常滿
航班採用A321客機，3-3排陣，全部經濟艙位共34排，坐滿接近 200 名乘客！回程當日遇上旅行團，所以航班非常爆滿，而且手提行李限額有10kg咁多，所以飛機上的行李櫃超容易放滿，不想有一大箱放在腳底，請早早排隊上機吧。
04｜飛機娛樂系統 有等如冇
雖然首爾航空座位有個電視熒幕，但其實丁點娛樂節目都無（除非睇飛機路線、高度都係娛樂），作用只有播放起飛機前安全動畫，還有飛行途中的路線，如果不想被光線打擾，建議在看完安全動畫後關掉。但飛機備有 USB 叉電位，可以自備 iPad 上機睇。
05｜上落機有嘢飲 即點食物只有杯麵
起飛無耐空姐就會派飲品，雖然只有水和橙汁選擇，準備降落前亦會再派一輪水，廉航有嘢飲實在要讚！不過空姐遲遲唔收杯，成程機也要打開杯架放杯，Aisle seat乘客若要讓鄰居出入有點麻煩囉！飛行時肚餓，sorry，熱餐要早48小時上網落order，不然在飛機上即刻落單只有杯麵、零食選擇。
06｜仁川機場可自助登機
香港機場的Check-in櫃台設在T1 E櫃台，而仁川機場就位於 G-H 櫃台，有自助 Check-in 的機器，回程時航班非常多人乘搭，即使記者一早 Online Check-in 也排了約半小時才可以寄行李，所以回程時記得早最少兩個鐘到機場預辦登機手續。
總結：性價比高 $1,600樓下值得買
首爾航空有靚時間，而且座位夠厚實，可以舒服地在飛機上瞓餐飽，飛行途中會調暗燈光令乘客較易入睡。唯一不足的是行李只有15公斤，買多少少都超重（雖然手提行李有10公斤）！經常會周末來回首爾的旅人們非常適合，星期五放工晚飛，玩兩日返香港，星期一朝早返工。
