【USJ萬聖節2017】記者直擊！日本環球影城萬聖節8大Check Point
採訪：啦兒遊日記 攝影：Woody（原文刊登於942期《新假期》） 鳴謝：KKday
#01 Cosplay參與慶祝大巡遊
日間活動主要以「環球變裝慶典」的巡遊為主，大家更可以扮鬼扮馬，同可愛的卡通人物一齊巡遊，不少日本人都出盡力打扮一番！不過要留意，扮甚麼都好，千萬不可拿「武器」入場，例如槍、刀之類，真的跟玩具都不能！
#02 必掃超可愛Minions商品
上年幾乎一人揹住一個的Minions爆谷筒，今年換上得意南瓜帽造型，同樣人氣高企；仲 有大量戴住熊啤啤帽的Minions商品，無論卡片套、帽子抑或糖果筒都令人忍唔住大叫「卡娃伊」。在蝙蝠造型的Minions商品中，就以震動公仔最搶鏡，拉一拉Minions胸前的南瓜就會拍翼，看來Minions粉絲要大出血了！
同場加映！其他卡通人物精品
除了Minions，Hello Kitty、Snoopy和芝麻街亦推出了一系列萬聖節商品，例如 Hello Kitty的配色換成黑加桃紅，非常淘氣；要數變化最大的話一定是Snoopy和Woodstock，雖然惡形惡相，卻一點都不恐怖，反而多了一分可愛感覺，令人超想帶回家！
#03 超呃Like！ 得意造型食物
在樂園逗留一整日，當然也要吃東西醫肚，兼Post相呃Like！想要特別造型的話，肯定是娃鬼Hello Kitty和殭屍Minions饅頭，前者吃時有一種「咬破吉蒂貓」的邪惡快感。饅頭裡面是番茄咖喱餡，味道不錯，難怪很多人特意排隊購買。
另外，今年哈利波特魔法世界雖然沒有特別的萬聖節活動，但到「三根掃帚」餐廳就可以品嘗英國傳統風味美食Great Feast，包括特別版南瓜批、烤雞、肋排、原條粟米等，份量極大，強烈建議兩人分享，飲埋夏天才有的沙冰版奶油啤酒，好飽，但滿足！
#04 卡通人物開心派糖
每年深受小朋友喜愛的「HAPPY Trick or Treat」街頭活動，今年繼續有Hello Kitty和妹妹Hello Mimi坐鎮，仲有芝麻街的一眾好友載歌載舞，就連Minions亦加入了表演隊伍。小朋友只要同卡通人物一齊唱歌跳舞和玩遊戲，就可以拿到大量糖果。此外，拿著指定南瓜小手袋的小朋友，只要於早上10時到下午5時向工作人員講出暗號，又可以獲得糖果，隨時收糖收到手軟。
#05 野生捕獲壞蛋迷你兵
自從「迷你兵團樂園」開幕之後，Minions每日都會不定時現身，跟fans打招呼兼影相。除了穿上殭屍袍亮相的Kevin外，還有首次登場的紫色壞蛋Minions，引來全場哄動。Minions神出鬼沒，想野生捕獲他們的話，就要多點在小小兵樂園附近徘徊，或者在商店狂掃紀念品，邊買邊等！
#06 瘋狂尖叫7大鬼屋
一場來到，點可以唔入鬼屋體驗一下？今年日本環球影城萬聖節共有七間鬼屋，按照驚嚇程度限制不同年齡人士入場，當中更不乏大家耳熟能詳的經典恐怖片，例如《貞子3D 2》及《猛鬼街》等，還有最驚嚇、全程長達35分鐘的「Trauma 3~ 恐怖監禁實驗室」。
四級驚嚇！濕身玩全新「逃出死亡森林」
記者親身試玩了全新登場的「逃出死亡森林」，故事背景為恐怖的藥廠，參加者因受到感染，需要穿過戶外的叢林逃生並找出除菌室。途中除了會被喪屍追趕及包圍外，還有很多分岔路，據說選擇約有100個之多，隨時與友伴失散，可謂驚上加驚。最後驚魂未定還要輸入密碼，但當時已被嚇得三魂唔見七魄，結果輸入錯誤，任務失敗仲要濕身！相信晚上玩應該會超級恐怖。
五級驚嚇！新版「娃鬼回魂」
一直深受遊客歡迎的「娃鬼回魂」，今年以全新內容登場，並以陰森恐怖的醫院作為背景，由天花板吊下來的假屍體和血淋淋的斷肢等都令人膽顫心驚。有去年玩過的朋友表示今年的整體 氣氛更為緊湊，壓迫感超高。
十級驚嚇！樂園史上最長鬼屋「Trauma 3」
以瘋狂科學家的人體實驗室為舞台，玩家猶如置身沒有出口的空間，看到超越常理的人體試驗，被嚇之餘還要被鎖。不過提提大家，由於這項設施需要解謎以找出逃生出口，但只提供日 文說明，因此不懂日文的話可能會感到非常疑惑。
#07 隨時隨地出現街頭喪屍
日間的活動適合一家大細，但當時鐘踏正6時，萬聖節恐怖之夜便正式開始！一眾街頭喪屍紛紛現身，樂園變成鬼怪橫行的靈異世界。今年街頭喪屍的種類是史上最多，共有20種，除了四出嚇人之外，還會跟「捉鬼刑警」對峙，場面逼真，又會突然大跳喪屍舞，甚至邀請全場跟 著一起跳，氣氛勁High！
唔畀喪屍嚇過唔安樂的話，可以購買「喪屍的誘餌」頸鏈，當喪屍看到發光的骷髏頭便會加 緊發動襲擊，絕對適合想盡情尖叫的朋友。
#08 自己攞嚟驚！ 雨中特別版喪屍
今年的喪屍種類較以往多，例如有安東尼小丑、臉上插著可怕蠍子的喪屍食人蟲及拿著電鋸的殺人狂等，全部都血流披面兼甩皮甩骨，一不留神真的會被他們「嚇到個心都離一離」。順帶一提，雖然落雨的話日間部分節目有機會取消，但雨天限定出沒的海盜喪屍將會「從海底升上來」，個個都凶神惡煞，記得要把握機會尋找他們，主動被鬼嚇！
最後提提大家要認住喪屍區的標記，因為進入後喪屍就會隨時出現，假如帶著小朋友又擔心他們受驚的話， 可以預先確認安全路線（只得一條）及安全區域（共兩個），以免到時手忙腳亂！
「 環球驚喜萬聖節2017 」
日期：即日至2017年11月5日
網站：www.usj.co.jp/hk/halloween2017
日本環球影城一日票：bit.ly/2hkt7Nf
日本環球影城Halloween快速通關券：bit.ly/2w7LBqj
KKday website：bit.ly/2xRzqT2
延伸閱讀：【 大阪溫泉 】每人唔使$1,000！5間抵住溫泉旅館推介
