日本網民票選! 3款必買最受歡迎零食
廣告
日本網站Mognavi根據網民評分，統計出三款最受當地人歡迎零食。榜首當然係「大師」，就係Häagen-Dazs麻糬系列雪糕；第二名係Chiroruchoko朱古力；第三名係芝士撻迷至愛嘅PABLO，凍食焦糖芝士布丁。三款零食都可謂平民小吃，唔需要攀山涉水，只要喺日本便利店或超市都搵到。
冠軍！Häagen-Dazs麻糬系列雪糕
呢個系列「華もち」雪糕有2種味道，包括黑糖蜜黃豆同甜醬油核桃。特別之處係雪糕混入麻糬，黏度相對較強，口感非常煙韌有嚼勁。只要去Lawson、7-11、Family Mart都有佢哋嘅蹤影，不過好大機會黑糖味就好快賣晒，如果只想食黑糖味，可能就要行多幾間先搵到。冇計啦，寶物沉歸底。
亞軍！Chiroruchoko朱古力
Chiroruchoko即係「チロルチョコ」公司，望一望個公司logo會覺得好熟口面，因為香港都有賣佢嘅朱古力，仲＄30有找。不過就冇得獎嗰款，但係食落都好有驚喜。事關香港發售嘅雜錦味有款以麻糬作餡料，口感非常有層次，即使純朱古力款都唔膩口，以呢個價錢算值得啦！如果已經等唔切去日本買嘅朋友，或者可以去優品360、樓上、759阿信屋碰下運氣。
季軍！Pablo焦糖芝士布丁
Pablo係元祖級芝士撻，只要係芝士控都會識佢，好味度受到日本人公認，喺大阪心齋橋簡直排晒長龍！不過今次得獎零食唔係熱辣辣嘅芝士撻，反而係凍食焦糖芝士布丁。雖然唔係新鮮出爐，但仍然有香濃芝士味，而且加埋焦糖醬同餅乾碎，咬落有口感之餘，三種食物加埋非常有層次！鍾意焦糖布丁嘅朋友一定會覺得好驚喜。
除咗最受歡迎零食，亦有細分為頭3位最受歡迎糖果、凍食食品、便利店食品。所有得獎食品都可以喺日本便利店搵到，真係方便快捷！最緊要唔駛排長龍等幾個鐘。
最受歡迎糖果
第一名．Chiroruchoko朱古力
第二名．森永半熟朱古力
第三名．日清堅果味餅乾
最受歡迎凍食食品
第一名．Häagen-Dazs麻糬系列雪糕
第二名．Pablo焦糖芝士布丁
第三名．井村屋cream cheese雪條
最受歡迎便利店食品
第一名．Ministop栗子味雪糕
第二名．7-11慕斯蛋糕
第三名．OK便利店芝士撻
