敢試嗎? 日本新出「朱古力撈麵」|掃食JP便利店|＠五月玲子。日本工作假期
廣告
日本一到情人節就會推出大量同情人節&朱古力有關的產品，真係咩都可以出一餐，結果當然就係出咗堆騎呢野食，真係日日試食都試唔哂。呢款係明星食品推出的朱古力撈麵「一平ちゃん夜店の焼そば」，其實係1月18日已經推出咗，用左2個星期心情準備都未準備好，係編輯大人一推之下就去咗做勇者了……（笑）
明星食品話呢款朱古力撈麵係為咗情人節而推出嘅特別版本，個包裝又心心圖案（係側邊）又紅色絲帶，真係好似一份要送俾人嘅情人節禮物咁。
個包裝背面有個「一言Message」俾你揀，真係扮足情人節（日本情人節女仔要送朱古力俾男仔），由於我係「毒」自一人食，我唯有揀「自分用です」（自己食自己）。
打開包裝見到內容包括：一餅麵，一包醬汁（咖啡拿鐵味＋喼汁＋朱古力）、一包朱古力醬，以及一包粉（肉桂粉＋朱古力碎）。
好似普通煮麵先加熱水
再倒熱水出來，呢個時候心情好緊張，因為就快做勇者啦！
首先我落左包醬汁，同埋肉桂粉＋朱古力碎，有一陣香氣撲味，但我講唔出係咩香味，因為太多野混埋咗，分唔到 …
首先將以上2樣野同d麵撈埋哂
再加朱古力醬，既然係情人節版本，我畫咗個心心俾自己…（好毒呀）
最後將所有野再撈埋哂一齊！！！
試食報告：食落味道係又甜又鹹又酸（？）其實撈均之後已經無咩朱古力味，反而係個喼汁味＋肉桂好出，同平時係店食嘅撈麵好唔同，如果朱古力醬再多返少少去平衡下可能會好味（或可能會仲奇怪）。我食哂成盒，但就不會想再買多盒來食，覺得食一盒已經夠啦（笑）如果情人節要送朱古力相關野俾人，買呢個嘅話應該會俾人鬧到飛起（笑）
