【大阪手信熱點】難波+道頓堀｜必買20大人氣手信：食倒太郎、固力果人新品
Text：Cynthia｜Photo：Fion、相關機構
【手信熱點1】食倒太郎專門店いちびり庵
穿着紅、白、藍三色小丑衫的「食倒太郎」是大阪道頓堀的代表人物，只要搵到佢，旁邊就是「いちびり庵」，裡面很多手信都是「食倒太郎」的包裝食物；另外還有丸子三兄弟、超樂謙等搞笑角色坐鎮，單憑包裝就已經忍唔到手。
いちびり庵
地址：大阪市中央區道頓堀1-7-21中座くいだおれビル1階
營業時間：10am-11pm（星期一至六）、10am-10:30pm（星期日）
交通：地下鐵難波站，步行約5分鐘
網址：www.ichibirian.jp
必買01.食倒太郎布甸
三角形鐵罐內的食倒太郎入面有3份布甸套裝，每份都有一頂太郎小帽、一個布甸、一包焦糖醬，以及一包焦糖碎，倒在一起就可以食到超好味的焦糖布甸！
必買02.食倒太郎朱古力
另一個太郎鐵罐的零食，就係太郎朱古力，裡面數量非常多，每個包裝上都印了太郎的造型，但面層的糖衣略嫌太厚，食落味道麻麻，但看在包裝可愛的份上，還是可以買來收藏！
必買03. 多種食法！布甸餅乾
超樂謙布甸餅乾包裝非常用心，鐵罐內是精美的紙盒，裡面有3包餅乾、布甸、提子醬及紙匙羹，可以直接食布甸，亦可以塗在餅乾上食。
必買04. 超樂謙薯條
除了薯條三兄弟外，超樂謙也推出了炸薯條，強調採用的是國產芋，用料更有保證，可以唔使次次都買薯條三兄弟咁悶啦！
必買05. 渡邊直美怪樣餅乾
講到日本的搞笑藝人，大概無人會唔識渡邊直美！盒內一共有6塊餅乾，每一塊獨立包裝袋上都有渡邊直美不同的趣怪表情，fans食完一定會唔捨得丟棄！
必買06. 丸子三兄弟蝦餅
大阪是章魚燒的天堂，章魚丸口味的產品也非常多，丸子三兄弟盒內是4種口味的迷你蝦餅，醬油、柚子味等食落好惹味，絕對是食完一塊又一塊！
必買07. 布甸味Kitkat
Kitkat 不時都會推出新口味，今次就有布甸新款，食落奶味唔算太重，有點偏甜，勝在日本獨有，加上一盒有超多件，可以放在公司請同事食。
必買08. 包裝唯美 金平糖
日本的傳統手信金平糖，睇落就似細細粒的星星，雖然主要成分只係普通的砂糖，但賣相好可愛！罐身更加係好有收藏價錢，送畀女性朋友，一定會好受歡迎。
【手信熱點2】固力果人坐鎮 Little Osaka
Little Osaka 是另外一間必去的手信店，鎮店之寶是鼎鼎大名的固力果人，裡面的產品自然也是以他為主題。另外還有大量超巨型的Pocky，隨便一支就可以塞飽你！
Little Osaka
地址：大阪市中央區道頓堀1-7-21 中座くいだおれビル１階 リトルオオサカ道頓堀店内
營業時間：10am-10pm
交通：地下鐵難波站，步行約5分鐘
網址：www.ezaki-glico.net/glicoya/shop10.html
必買09. 固力果人棒棒糖
固力果人棒棒糖一set有5個，包裝紙上印了像真度頗高的樣，不過拆開之後，只可以隱約見到立體的五官，設計好搞笑！
必買10. 固力果人朱古力
除了棒棒糖外，固力果人朱古力同樣好有收藏價值，罐身印了他由1922年至1992年的造型變化，入面有齊黑、白兩款朱古力，食完都要收埋個罐。
必買11. 章魚燒味薯片
道頓堀的手信專門店不時會推出新口味的零食，且大部分都只能在當地買到。以品客薯片為例，就有關西限定的章魚燒口味，食落非常惹味，好快就可以K.O.一盒。
必買12. 香蕉味Minion 糖
卡通人物包裝的手信永遠都係最受歡迎，Minion糖果有3款不同造型的包裝，一打開即聞到非常濃烈的香蕉味，平時喜歡食香蕉的話一定會非常喜歡！
必買13. 章魚丸巨型百力滋
Little Osaka最多的除了固力果人，其次就是巨型百力滋了，勁大盒的百力滋每條都係獨立包裝，長過手臂，每次食一條就夠，除了有抹茶、醬油巨型版外，點會少得大阪名物章魚燒！派手信返公司，一人一條都好夠！
必買14. 富士山士多啤梨芝士糕Kitkat
士多啤梨芝士蛋糕口味，包裝是富士山的設計，Kitkat食落有淡淡的士多啤梨香氣，相對來說有點偏甜，不妨送畀「螞蟻人」朋友。
必買15. 貓咪掛杯餅乾
日本出得多杯緣子，貓咪餅乾都設計成可以掛在杯邊的，雖然並不實用，不過送畀貓奴朋友，收到一定會好開心。
必買16. 必食Pablo 布甸
每次去大阪，都會去Pablo買個芝士撻食，而推出的布甸更是手信的最佳選擇。
【手信熱點3】固力果人難波站分店 ぐりこ‧や
除了道頓堀外，難波站內也有固力果人的專門店「ぐりこ‧や 」（Glico‧ya），同樣專售固力果土產，有不少更是只有這間分店才可以買到的限定零食、精品，固力果迷絕對不可以錯過！
ぐりこ‧や
地址：大阪市中央區難波1-9-7 大阪市營地下鐵御堂筋線地下１階コンコース
營業時間：10am-10pm
交通：地下鐵難波站，步行約5分鐘
網址：www.glico.com/jp/enjoy/shop/glicoya/
必買17. 巨型版蝦條
在大阪，章魚燒味的零食無處不在，自然也少不了蝦條！大大盒內一共有8小袋，食落夠惹味又唔會過鹹，小包裝要畀朋友都無難度。
必買18. 濃郁朱古力醬
除了食物之外，日本的朱古力醬質素都很不錯，夠濃可以用來搽麵包、餅乾，有了固力果人的加持，自然更加是非買不可！
必買19. 粒粒焦糖杏仁
在焦糖內加入了粒粒杏仁，食落甜膩之中帶有咬口，比單食糖果更易上癮。
必買20.復刻版百力滋
復刻版的百力滋，上面印了經典的小女孩造型，在其他地方都好難搵到，想買記得去啦！
