臨飛唔見護照過期BNO救一命！

Jan 20 2016

特區護照愈來愈方便，不過曾經擁有BNO的香港人，在特別緊急時仍能大派用場！記者試過遺失護照，但因為急忙出差但特區護照沒有快證，即日申請臨時BNO隔日上得機，就已深明事頭婆係幾咁偉大！同大部份香港人一樣，記者從97回歸手持的BNO過期開始就改領特區護照，反正免簽國家大同小異，後者大嗱嗱平成$785，慳家的我梗係揀特區！當日臨上機先遺失護照，急到我飛奔完入境處再到金鐘的英國領事館，最後發現，原來BNO可用2小時就補領到一次性Emergency Passport，索價$1,170，係貴，但真係救到命！（注意：* 以下介紹的方法，BNO 過期10年者不會獲簽快証，因為電腦無Record）

撰文：Nicole

特快處理比拼！（注意：* 以下比拼，BNO 過期10年者不會獲簽快証，因為電腦無Record）

特快處理比拼！

1.效率高下立見

記者遺失的是特區護照，於是晨早8點撲去入境處，趕在9時開門前排隊拎籌辦理證件。由於入境處不設特快窗口處理此類案件，一切都循正常程序，苦等兩個鐘才輪到我交表，並乘勢跟職員表明有急事需見主任。費盡唇舌求情，換來主任皇恩浩蕩批准3個工作天後取新護照，計埋頭尾足足等成5日！相反英國領事館係如入無人之境（因平時續領BNO只需郵寄資料），審批程序快到2個鐘有得攞，仲誇張過借貸廣告，趕飛機嘅心情你懂的！

護照 BNO 救命 06 — 在網上求其搜尋「唔見護照，特急求救」等字眼，都輕易搵到巴絲打大讚BNO靠得住！

2. 黑面過腦細 VS 親切嘅服務態度

入境處主任每日應對太多求情案件，所以即使面對死人塌樓都一視同仁。事發當日小記聽到前面個苦主朋友病重，主任依然鐵面無私地回答：「證明呢？」面對住呢種機械式操作嘅人，小記都費事嘥氣動之以情。相反，英國領事館連保安都親切啲，有人話英國佬「有錢使得鬼推磨」，計我話人哋係制度靈活，識得酌情處理，金錢換得人性對待，抵畀啦！

3. 外地通關更可靠

香港在東南亞就話國際之都，講真去到歐美十居其九會問：「Hong Kong? Japan? 」咪旨意解釋「香港屬於中國」這個微妙關係，因為對鬼佬嚟講總言之係China！留學生Bonnie就試過在墨西哥轉機，職員甫見特區護照上的China，就死命堅持要辦簽證才可入境，解釋極Hong Kong免簽都不被受理，只好掏出另一本BNO護照先順利過關！穩陣計真係要有本BNO傍身囉。