黃翠如北歐打工假期!! 7個難忘工作經歷～率先睇!

Jul 8 2016

香港奴隸獸出名工時超長，每周工作 50.1小時，平均比印度外賣仔還要多7個鐘！若然生在北歐，打工命運就更加截然不同──北歐人每周工作30小時、月薪3萬5港紙；你睇梗呢篇報道時，佢哋已經計劃梗長達一個月的暑假，逃離市中心、搬去海濱度假屋盡攬陽光！係咪覺得投錯胎？為了探索一下北歐「風流工」有幾輕鬆，黃翠如早前就「復出」拍旅遊節目，去了芬蘭、瑞典兩星期，體驗愉快「外勞」生活！

撰文：Kat | 圖片來源：相關機構

最近榮升上市公司主席千金的翠如 BB，為咗證明自己唔離地，去旅館擔抬抬做女傭。

原來黃翠如轉去大台後完全未試過主持個人旅遊節目，對上一次已經係6 年前在 NowTV。 (終於唔使拍劇!)

罐頭魚棚工廠妹

聖誕村打工仔

Candy Crush見習生

＃1 實習精靈童夢應酬班

「其實我真係信有聖誕老人㗎!」翠如BB天真到一個點，有時只有死忠Fans先可以明瞭：「其實因為細個寫過信畀聖誕老人，然後收到回信，所以咪覺得係真有其人囉!」北歐第一份工作，就係去芬蘭 Santa Claus Village受聘成為「初級見習精靈」，負責人潮管理，將進場談夢想的兒童分流,淡季上工，workload 尚算輕鬆!「啲同事好入戲囉！話精靈培訓工時特別長，要儲多二百幾年工作經驗先可以升職做正式助理!」

5月天時，近身觀察無休假的聖誕老人，其實都係一個要懂多國語言的行家(藝人之嘛 ! )，天真翠如忽然覺得夢想幻滅。

最大挑戰係文書工作，負責把來自全球各地的來信分門別類，等聖誕老人逐一回覆，睇到眼矇!

好似啲公司 reception，其中一個工作係引領 Fans 向聖誕老人講夢想，但係精靈就要迴避唔准偷聽。

平時遊客來到 Lapland都係到此一遊，今次翠如打工期間睇見無數遊客出出入入，真正感受到聖誕老人的號召力。

＃2 馴鹿放牧育嬰靠閃避

冬季去芬蘭，多數遊客都會被安排體驗馴鹿拉車，有遊客試過覺得「雪地拖行都幾殘忍」，其實每年夏季都係拉車馴鹿的annual leave ，不用開工，可以自由放牧、拍拖、生BB。不過更殘忍的現實係，好多大型馴鹿場飼養的都係「食用鹿」，「如果照顧完馴鹿B跟住畫面係食佢親戚，會好慘!」所以拍攝團隊選了一個小型鹿場去打工，主要照顧觀光拉車用的馴鹿。

「馴鹿都靠夏天生長的植物做主糧，整個夏天食得肥肥胖胖，迎面而來噸位十足，都好有壓迫感!」

路上偶遇大草原上放牧馴鹿，誰都會心花怒放跑去追鹿，點知去到牧場情景對調……

翠如的工作是餵飼馴鹿，照顧剛出世的鹿 B，一入職就被數十隻馴鹿圍著，嚇到企唔穩!

＃3 樹屋打雜好睇唔好住

Working Holiday最入門級工種，當然就係旅館打工，低技術、易搵食，仲可以賺埋住宿！瑞典夏天無冰酒店，但就有長年開放的百年樹齡森林樹屋:「Harads係只有 6 個房的酒店，好多旅遊節目同雜誌都有介紹，拍出嚟好靚，但真正幫手執房就完全係另一回事!」爬梯孭床單好小兒科，原來仲要執屎！幸好樹屋上面設有高科技環保廁所，大便清理前已是經過焚化，好「乾爽」仲可以欣賞到唔同形狀！

旅館夫人 Lindvall 太太表示下年在湖畔還有新搞作，有興趣可以去 www.treehotel.se 睇睇有冇新工應徵!

房客可放低行李土篋在大堂,換個背囊上樹投宿,翠如就要孭住數十磅的床單毛巾爬梯,無得偷懶……

圓形的飛碟樹屋，空間狹窄，仲有啲焗!

雖然設計獨特，有 UFO 又有玻璃房，但打掃絕對唔輕鬆。

旅館主人表示酒店共有 6個職員，負責除草、劈柴以及維護樹屋。

＃4 絕頂臭魚國寶級腥氣

其實北歐都有「厭惡性工作」，製作傳統臭魚罐頭就係保證識唔到女仔的暑期工！瑞典罐頭魚 Surstromming 堪稱「史上最臭食物」，官方指引是「絕對不能在室內打開」！翠如走到年產20萬罐「臭魚」做工廠妹，由攞魚、斬魚頭、掏內臟到將魚發酵，都一手一腳完成，原來這個工廠也有30年歷史，最後更獲老闆送贈「臭魚」一箱！鯡魚罐頭每年春季捕魚，初夏入罐；8月底有隆重的「開罐儀式」，每罐都好似「超濃縮城門河污水」，食入口又係咩感覺呢?監製表示「口感細嫩」其實 OK，翠如被幕後員工安排試食一罐過期「臭中臭魚」，結果係難以形容的「臭到辣」、「脷麻痺」!

如此極品，慳家的翠如都專程買了兩罐回港，一罐留在家，另一罐打算跟朋友分享⋯⋯

即使在戶外開罐，臭味也能傳到方圓600米外，有如生化武器!

正宗食法係拌著薯仔、洋葱夾麵包，抵消鯡魚「臭到喇損喉嚨」的濃烈口感。

在罐頭工場打工的後生仔向翠如表示「好尊重這傳統食物」，不過代價係「這個打工的夏天，注定識唔到女仔了」!

工場內有魚腥、血水混雜發酵的各式臭味，不過未醃足一年，其實只算是初級臭!

「若然不小心被臭魚的汁濺到衣服，件衫幾乎注定要報銷!」

＃5 科技公司福利多過乜

其實邊個會恨去北歐做擔擔抬抬工作？最令人羨慕當然係 IT 公司，總部在瑞典的Candy Crush 辦公室就係典型遊樂場格局，「實習生同我講，最欣賞的員工福利係任食自助早餐，真係豐富過酒店呀！」一般 Game Room、Open Office已經嚇唔到人，最令黃翠如震撼的，係一個可以模擬四季天氣調節燈光和地板質感的Show Room，「冬天地板行上去真係有冰裂聲」!