【自助餐放蛇起底組】$178放題玩3P 燒肉 x 蒸氣火鍋 x 日菜
一口和牛任食 怪味醃醬雞豬肉
燒肉係以劃紙仔形式落單，肉類有牛舌、牛仔骨、黑豚肉、豬頸肉、雞翼、羊鞍，最估唔到有「一口和牛任食」！仲有海鮮同蔬菜類，例如海中蝦、青口等，望落好豐富！落咗單之後等5分鐘都嚟齊，同埋都執啱份量。
味道嚟講，鹽燒一口和牛、孜然牛舌同羊鞍都唔錯，不過聲稱有芝士、蜜糖、香草嘅肉類就認真麻麻，唔係無味就有陣怪酸！叫咗兩轉燒肉都已經用咗一個鐘去食，得返一個鐘食題同埋蒸氣火鍋！媽~好急呀~~~轉個頭見到有枱，5個人可開兩個爐，咁就可以烤肉、蒸氣鍋同步進行，正呀~~
日式料理選擇多 不過味道就……
日式放題同平時食開嘅放題一樣咁多種類，有刺身、壽司、手卷、炸物、天婦羅、和食料理等，選擇一啲都唔hea，不過正當以為可喪食刺身之際，發現三文魚無味，吞拿魚又多筋，得炸物同天婦羅好啲咋，其他真係…….
蒸氣火鍋 海鮮任攞 不過……
食完燒肉，其實都可以叫店員們幫你換上蒸氣火鍋，放係底部嘅唔係清水，而係胡椒鹹菜豬肚湯；而蒸氣火鍋嘅配料係自助嘅，可以入去任夾海鮮，有海蝦、東風螺同蜆等。
總結：雖然$178呢個價錢可以食到燒肉＋蒸氣火鍋＋日式放題，食法和食物選擇真係好豐富，不過味道方面就真係唔多理想，得燒肉個part可以狂encore，同埋如果要係兩個鐘裡面食勻三樣放題，真係要自己睇住時間(不過如果你多人有得坐大枱有兩個爐咁就會好啲)，多半個鐘要舒服啲！環境方面都好闊落，但抽風系統似乎唔係幾work，食完都有一陣味；服務都ok，店員們都有主動執碟同上菜速度都快手。
總分：6/10
