【自助餐放蛇起底組】元綠地獄加碼 $98火鍋壽司放題
5款湯底揀 肥牛豬肉可任食
用餐時間得90分鐘，細枱就一人一鍋，大枱就要Share。湯底有5款揀，分別是特色咖喱、長崎豬骨湯、熊本蕃茄湯、九州地獄和壽喜燒湯。我哋叫咗長崎豬骨湯和九州地獄湯，地獄湯好快到，但豬骨湯等咗15分鐘都上枱，原來漏咗落單，店員好有禮貌快手補返。
湯底上枱時，店員各拎咗2碟美國肥牛同美國豬肉俾我哋，牛肉色澤偏暗紅，但都完整大件，有少少雪花紋；豬肉望落都正常，切成薄片，一夾好易散。
自助區域選擇少 得15樣嘢食
出面自助區域得15款火鍋配料：蕃茄、芝士腸、蟹子丸、豆卜、翠玉瓜等，另一邊有豆腐及烏冬，超少嘢揀，大部份味道都正常，最伏是烏冬，軟淋淋到完全不用用牙咬，用條脷頂一頂就已經散開，似俾BB食的粉糰，好難食。
任食壽司 地獄滋味
任食壽司有兩盆，第一轉得三文魚壽司，遠睇唔覺有乜事，但近睇就出事啦！！！點解係黑色嫁？好驚呀！！！！勉強揀咗兩件正常少少嚟試，嚿飯無出事，但三文魚完全無三文魚味，一咬落去仲要散開，好唔掂！
第二輪的玉子壽司都同樣出事，睇落好乾身，但食落好甜，而且出水，太恐怖了！！！
最後想食返個雪糕定驚，點知一拎起個雪糕舀，又出事，辣到呀媽都唔認得，雖然出發點係好，但辣到揸唔到，叫人點食呢……..
總分:3/10
放題 Sell 壽司+火鍋，但壽司得2款，而且質素超劣，起碼扣4分。火鍋來說，牛肉還可以，豬肉柴皮，蔬菜丸類選擇少，飲品和雪糕也是求其得很，食咗D壽司無肚痛都算偷笑。我情願俾多$40食XXClub，D肉靚D，蔬菜丸類粉麵選擇多D，坐得舒服D，可自己唧軟雪糕囉之餘，飲品和甜品也有多D選擇。
