元朗地道雲吞麵對決!!! 好到極麵家 VS 好到底麵家
撰文：nk｜攝影：Hai、Kwanyiu、Scott
新舊雲吞麵對決
我知你實會問，咁究竟新店「好到極」和老字號「好到底」，邊個好食啲？唔使急，即刻拿出真金白銀，試齊兩邊細蓉，阿哥鬥細佬，睇下邊個勁。
好到極麵家
年資：開業未夠一個月
背景：由好到底麵家第三代傳人經營
（5粒★滿分）
﹝賣相﹞★★★★
正宗擺位，以瓷碗盛載，感覺高檔，跟足傳統用湯匙墊高麵條和雲吞，避免浸腍；整碗麵色澤亮麗，麵條金黃通透，雲吞皮薄。
﹝雲吞﹞★★★
Size小巧，一啖一粒，雲吞魚尾較長，在湯中顯得滑溜柔美；口感鬆軟，餡料鮮味鹹香，清楚見到粒粒蝦子，整體較老店濃味，惟豬肉比例比較多，削弱了蝦味。
﹝麵條﹞★★1/2
麵條分明，頗彈牙，幾爽口，有輕微鹼水味，但尚可接受。
﹝湯底﹞★★★
色澤較為乳白，是加了鯪魚的緣故，飲落有陣陣魚鮮味，再加上豬骨味，甜而醇厚，雖然和麵條的味道平衡，但淨飲湯就偏濃。
﹝價錢﹞★★★
$25/碗（四粒雲吞）
環境服務
優：樓底高、夠光猛，寬敞乾淨，坐得舒
店員親切，會細心留意食客需要，主動跟單
缺：上菜速度比較慢，接近十分鐘先上枱
商業味較重，欠缺風味
好到底麵家
年資：屹立元朗近70年
背景： 由街邊檔起家、六十年代搬入元朗阜財街三層唐樓現址，自家工場造麵，雲吞麵日賣過千碗，2013年起連續四年獲得米芝蓮食店名銜
（5粒★滿分）
﹝賣相﹞★★★
以的骰細膠碗上枱，正宗雲吞麵擺位，麵在頂、雲吞在底，但麵條和雲吞皮的色澤偏向暗啞，呈淡黃色，未夠光澤。
﹝雲吞﹞★★1/2
Size與好到極相若，不過淥得未夠通透，部分收口位略為硬身，欠缺滑溜感；餡料包得比較實，未夠鬆軟；勝在味道有齊肉香和鮮蝦味，但蝦子鹹香不足，近乎吃唔到。
﹝麵條﹞★★★1/2
同樣條條分明，食落滑口不打結，較好到極爽彈，食得出蛋香，完全無鹼水味，吃罷不涸喉。
﹝湯底﹞★★★★
鮮而香甜，順喉清爽，濃度恰到好處，當湯飲都不過鹹。
﹝價錢﹞★★★
$27/碗（五粒雲吞）
環境服務
優：典型麵店格局，木製卡位，有老港風味
上菜夠快，落單五分鐘內有麵食
缺：坐得較為迫夾侷促，光線暗淡
店員服務一般，笑容欠奉
結果
正 所謂，爭咩吖，溝埋一齊咪又係阿爺教出嚟。就唔係小記戴頭盔，事實係兩者的確不相伯仲，食邊間，完全取決於閣下的口味。想感受地道港式麵檔feel，有啲 電影場景感、唔怕熱、唔怕迫，又鍾意同街坊阿公阿婆一齊食麵，好到底就啱你！如果你想摩登啲，坐得舒服啲，去好到極啦！食開口味濃啲嘅，都係去好到極啦。 又或者你Honey唔慣去地痞餐廳嘅， 去好到極吧。相煎何太急呢？
好到底麵家
地址：元朗阜財街67號地下（顯示地圖）
電話：2476 2495
營業時間：星期一至日 8am – 8pm
平均消費：$50/位
備註：只收現金、不設加一
起底好到極麵家 挑機開高檔新Line
原來這裡的老闆，是好到底麵家創辦人的二孫陳仕偉，細細個已經在店內打滾，幫阿爺手執碗、淥麵，細蓉、水餃絕對是由細食到大。他說，現時好到底麵家由兄長打 理，行的是傳統麵家風格和裝潢，多年來生意穩定，今次出來自立門戶，是源於敢試敢闖的進取性格，「阿哥主張平平穩穩，我就求變，不過兩者都是想將阿爺的生 意發揚光大，目標一致的」。話明走新路線，單是店子陳設已有莫大分別，光猛亮麗，再配古色古香的中式木桌椅、屏風，仲有梳化位，感覺比舊店豪華high- class，目的就是要客人坐得舒服。
蝦子撈麵秘密武器
老闆特意將蝦子分成小樽，每樽約有12g，一份蝦子撈麵上枱前，師傅就完整灑上一小樽，咁就唔會有坊間蝦子份量有偏差的情況！
以為環境靚，食物就會加價？未必。對比過兩者的價位，發覺差距不大之餘，新店 的食物選擇更多，除了傳統麵食，更有以蝦膠、蟹皇醬包製的百花蟹皇餃；自家南乳醬炸豬手和秘製辣汁紅油抄手，口味變得多元化，開拓更多新客路。食材全是老 闆自己去搜集貨源，麵底用中環老字號，燕皮用正宗福建貨，就連蝦子也來自澳門蟹粥名店，力求最高品質。
廚房班底是好到底的老師傅，麵食配方和做法相近，只是湯底改用了鯪魚而非蝦殼，避免食客敏感。湯底的顏色比傳統的乳白，味道更重魚鮮味。麵條的品質更為重視，採訪當日 老闆發覺新送來的幼麵鹼水味仍未退散，索性立即不賣幼麵，寧願向客人致歉解釋，足以證明老闆的用心，絕對不是意氣離家，阿爺的名聲，仲喺到。
開店目標：
1.行摩登高檔路線，街坊嚟到元朗都可以舒服食麵
2.款式創新，吸引年輕人、新食客品嘗廣東靚麵
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
