Young Line酒樓 食齊川菜點心靚甜品|銅鑼灣有咩好食|

位處銅鑼灣鬧市，有時想平平哋食餐飯都幾難，最近傳統酒樓集團名苑開設的副線，主打年輕客，平均每人$100就食飽飽！店子一洗Old school酒樓格局，裝修擺設超似cafe，更有面向落地玻璃的大梳化，感覺溫馨舒適。川菜、上海菜，甚至西式焗飯都可以食到，愛川菜的可試古罈酸菜活生魚，用上新鮮大生魚，起骨後與酸菜、大豆芽及辣椒等同煮，湯底酸中帶甜，微辣鮮香。燉湯用料十足，推介天山雪蓮果燉海星， 燉足4小時，清甜滋潤，超養顏，$50有找。想飲茶？這裡有約20款傳統點心，例如焦糖馬拉糕、腸粉等。食點心除飲茶， 還可來杯自家磨製凍豆漿，用上電燈泡盛載，夠破格。西式甜品都有，雪糕吐司最適合相機食先的年輕人，層層烘多士，唧上忌廉及生果，更有倒轉雪糕及棉花糖，份量足三、四人分享！